GÉNESIS 25 - Dios Rimashcata Quillcashcami

Abraham Cetura huarmipi huahuata charishcamanta

¹ Abrahamca cutinmi shuctac huarmita charirca. Chai huarmica Ceturami carca.

² Chai huarmimi Zimram, Jocsán, Medán, Madián, Isbac Súa huahuacunata charirca.

³ Jocsanca Seba, Dedán churicunatami charirca. Dedanca Asurim, Letusim, Leumim churicunatami charirca.

⁴ Madianpac churicunaca: Efa, Efer, Hanoc, Abida Eldaami carca. Tucui paicunami Ceturapac huahuacunaca carca.

⁵ Abrahamca tucui pai charishcatami Isaacman curca.

⁶ Ashtahuanpish caishuc huarmicunapi charishca churicunamanca asha convidanacunallatami curca. Shina cushpami, paipac churi Isaacpac ñaupamanta caruman cacharca. Paicunaca inti llucshina lado caru llactapimi causarca.

Abraham huañushcamanta

⁷ Abrahamca patsac canchis chunga pichca huatatami causarca.

⁸ Abrahamca achca huatacunata causashpa, yallita yuyacyashpami, paipac samaita chingachishpa huañurca. Chashna huañushpami, paipac aillucunahuan tandanacugrirca.

⁹ Pai huañucpica, paipac churi Isaac, Ismaelmi heteocunapuramanta Zoharpac churi Efronpac churipac allpapi tiyac jutcupi enterrarca. Chai jutcuca Mamre chimba ladopi cac Macpela pambapimi carca.

¹⁰ Cai allpataca Hetpac churicunamanmi Abrahamca randirca. Chaipimi Abrahamtapish, paipac huarmi Saratapish enterrarca.

¹¹ Abraham huañushca quipaca, Diosca Abrahampac churi Isaacman bendiciarcami. Isaacca «Ñucata ricushpa causac yacu» cuchupimi causacurca.

Ismaelpac huahua huahuacunamanta

¹² Abrahampac churi Ismaelpac huahua huahuacunaca caicunami. Ismaeltaca Sarata servic Egiptomanta Agarmi charirca.

¹³ Ismaelpac punta huacharishcamanta callarishpa churicunaca caicunami: Nebaiot, Cedar, Adbeel, Mibsam,

¹⁴ Misma, Duma, Massa,

¹⁵ Hadar, Tema, Jetur, Nafis, Cedemami carca.

¹⁶ Caicunami Ismaelpac churicunaca carca. Cai shuticunallahuantacmi uchilla llactacunatapish, carpa huasicunatapish cayac carca. Shinallatac paicunapac aillucunamantami chunga ishcai mandaccuna tiyarca.

¹⁷ Ismael tucui causashca huatacunaca patsac quimsa chunga canchis huatami carca. Paipish samaita chingachishpa huañushpami, paipac aillucunahuan tandanacugrirca.

¹⁸ Ismaelpac huahua huahuacunaca Asiria llactamanta rina Egipto chimba ladopi cac Havila llactamanta Shur llactacamanmi causarca. Ismaelca tucui paipac huauquicunapac ñaupapimi huañurca.

Jacobopish, Esaupish huacharishcamanta

¹⁹ Abrahamca Isaac churitami charirca.

²⁰ Isaacca chuscu chunga huatayuc cashpami, Padan-arammanta arameopuramanta Betuelpac ushi Rebecahuan cazararca. Rebecaca arameocunapuramanta Labanpac panimi carca.

²¹ Isaacca paipac huarmi mana huahuata chari pudishcamantami Mandac Diosta mañarca. Chashna mañacpica, Mandac Diosca uyarcami. Chaimantami paipac huarmica huicsayuc tucurca.

²² Paipac huahuacuna huicsa ucupi tanganacucpimi Rebecaca: «Cashna cacpica, ¿imapactac causacushayari?» nishpa yuyarca. Chaimantami Mandac Diosta mañangapac rirca.

²³ Shina mañacpimi, Mandac Diosca: «Cambac huicsa ucupica, ishcai llactacunami tiyacun. Ishcai llactacunami huicsamanta pacha, chican tucunga. Shuc llactami shuc llactata atishpa, ashtahuan sinchi canga. Punta churimi quipa churita servishpa causanga» nirca.

²⁴ Sajuarina punzha pactacpica, paipac huicsapi ishcai huahuami cashca carca.

²⁵ Punta huacharic huahuaca puca millma carata churashca shina, millmayucmi carca. Paitaca Esautami shutichirca.

²⁶ Chai quipaca Esaupac chaquipi charirashpami, paipac huauquica llucshirca. Paitaca Jacobotami shutichirca. Isaacca paipac huarmi sajuarina punzhapica, sucta chunga huatayucmi carca.

Punta churi japinata Esaú catushcamanta

²⁷ Huahuacunaca huiñarcami. Esauca pambaman llucshishpa, sacha animaltami japinata allita yachacurca. Cutin Jacoboca mana maiman llucshishpa, carpa huasillapimi casilla causarca.

²⁸ Isaacca Esautaca pambapi sacha animalta japishpa carac cashcamantami yallita cuyac carca. Cutin mama Rebecaca Jacobotami yallita cuyarca.

²⁹ Shuc punzhami Jacoboca sumac pucalla micunata yanushca carca. Cutin Esauca pambamanta shaicushca shamushpami,

³⁰ Jacobotaca: —Chai pucalla sumac micunata carai, mai shaicushcami cani— nirca. (Chaimantami Esauca Edom shutipish carca).

³¹ Shina nicpimi Jacoboca: —Can taitamanta punta churi japinata cunanllatac cui— nirca.

³² Shina nicpimi Esauca: —Cunan yarcaihuan huañugricucpica, ¿punta churi japinaca imapactac valingayari?— nirca.

³³ Shina nicpimi Jacoboca: —¡Cunan punzhallatac punta churi japinata cungapac ari ni!— nirca. Chashna nicpimi, punta churi japinata Jacoboman caturca.

³⁴ Shina catucpimi, Jacoboca Esaumanca tandatapish, huirahuan camchashca lentejatapish curca. Shina cucpimi, Esauca micushpa, ubiashpa, jatarishpa rircalla. Chashnami punta churi japina cashcata yangalla cashcata yuyashpa saquircalla.