GÉNESIS 24 - Dios Rimashcata Quillcashcami

Abraham Isaacman huarmita mashcashcamanta

¹ Abrahamca achca huatata causashpami, ña yuyacyarca. Mandac Diosca tucui causaipimi paimanca bendiciashca carca.

² Abrahamca paipac serviccunapuramanta paipac huasipi mandac yuyac runata cayashpaca: —Cambac maquita ñuca changa jahuapi churai.

³ Ñuca causacuc cananeocunapac ushita ñuca churipac huarmi cachun mana apamungapac jahua pachata, cai pachata Mandac Diospac shutipi ari ni.

⁴ Ashtahuanpish ñuca causana llactaman rishpa, ñuca aillupuramanta apamungapac ringui— nirca.

⁵ Shina nicpimi, chai servicca: —Ashtahuanpish chai huarmi ñucahuan mana shamusha nicpica, ¿imatatac ruhuasha? ¿Cambac churitachu chai can llucshishca llactaman pushangapac cutimusha?— nirca.

⁶ Shina nicpimi Abrahamca: —¡Ñuca churitaca amatac chaiman pushanguichu!

⁷ Ñuca taitapacmanta, ñuca aillucuna causana allpamanta llucchic jahua pachapi causac Mandac Diosca: “Canmanpish, cambac huahua huahuacunamanpish cai allpata cushami” nishpa, paipac shutipi ari nirca. Paillatac paipac angelta cambac ñaupata cachacpimi, chai llactamanta huarmita ñuca churiman pushamungui.

⁸ Chai huarmi mana canhuan shamusha nicpica, Diospac shutipi can ari nishcapish, mana ari nishca shinami canga. Shina cacpipish, ñuca churitaca chaimanca amatac pushanguichu— nirca.

⁹ Shina nicpimi, servicca Abrahampac changapi maquita churashpa, Diospac shutipi ari nirca.

¹⁰ Chaimantami servicca amopac camellocunamanta chunga camellocunata japishpa, amopac tucuilaya acllashca convidanacunata apashpa, Mesopotamia llactapi cac Nacor llactaman rirca.

¹¹ Chai servicca camellocunataca llacta canzhapi cac yacu jundu ladopimi samachirca. Ña chishimi carca. Chai horasmi solteracunaca yacuta apangapac llucshic carca.

¹² Chaipi servic runa Diosta mañashpaca: «Ñuca amo Abrahamta Mandac Dioslla, alli tupangapac ayudai, ñuca amo mañashcatapish llaquishpa uyaiyari.

¹³ Cunanca, llactapi causaccunapac ushicuna yacuta apangapac llucshina yacu ladopimi cani.

¹⁴ Ñuca maijan solterata: “Ñucaman yacuta ubiachingapac puñuta uricuchi” nicpi: “ubiailla, shinallatac cambac camellocunamanpish ubiachishami” nic soltera canta servic Isaacpac huarmi cachun. Chaita ricushpami, can ñuca amo mañashcata llaquishpa cuc cashcata yachac chayasha» nirca.

¹⁵ Chai servic mañacucpiracmi, Betuelpac ushi Rebeca solteraca rigra jahuapi puñuta apashca ricurircalla. Betuelca Abrahampac huauqui Nacorpac shinallatac Milcapac huahuami carca.

¹⁶ Paica carihuan manarac chayarishca, alaja solterami carca. Paica yacu junduman chayashpami, puñupi yacuta jundachishpa cuticurca.

¹⁷ Chaipimi servicca callpashpa rishpaca: —Cambac puñumanta asha yacuta ubiangapac convidai— nishpa mañarca.

¹⁸ Shina mañacpica, chai solteraca: —Ñuca amitolla, ubiailla— nishpami, chai rato puñuta rigra jahuamanta uricuchishpa ubiachirca.

¹⁹ Ña paiman ubiachishpaca: —Cambac camellocunamanpish mana nicta ubiachingapac yacuta llucchisha— nirca.

²⁰ Utcashpami cutin cutin yacuta apamushpa, rumi bateapi tallishpa, tucui camellocunaman ubiachirca.

²¹ Chashna ruhuacpica, chai servicca: “Mandac Diosca ñuca purinapi allichu pushacun imami” nishpa, yachangapac upalla shayacurca.

²² Ña camellocuna yacuta ubiacpica, chai servic sucta gramosta pezac curi sortijasta, patsac gramosta pezac ishcai manillata cushpaca:

²³ —¿Pipac ushitac cangui? ¿Cambac taitapac huasipica ñucanchic pozangapacca ucu tiyanchu? Huillaiyari— nirca.

²⁴ Shina tapucpimi, chai solteraca: —Ñucaca Nacorpac shinallatac Milcapac churi Betuelpac ushimi cani.

²⁵ Ñucanchic huasipica cancuna tuta samarinapish, shinallatac camellocuna micuna ucshapish achcami tiyan— nirca.

²⁶ Chaita uyashpami, chai servicca cumurishpa, Mandac Diosta alli nishpaca:

²⁷ «¡Ñuca amo Abrahampac Mandac Dioslla, cantaca alli nichun! ¡Canca llaquic cashpa, shinallatac imatapish cashcata nic cashpami, ñuca amopac familiapacmantac ñucataca pushamushcangui!» nirca.

²⁸ Rebecaca callpa rishpami, paipac mamapac huasipi tucui ima tucushcata huillarca.

²⁹ Paica shuc turitami charirca. Chai turica Labanmi carca. Paimi yacu junduman callpashpa, servic runahuan tupangapac rirca.

³⁰ Labanca paipac pani Rebeca maquipi manillatapish, jagan nicuc sortijastapish charicuctami ricurca. Chai runa imallata nishcata paipac pani parlacuctami uyarca. Chaita uyashpami, chai runapacman Labanca rirca. Chai runaca yacu jundu ladollapitacmi camellocunandi carca.

³¹ Labán chaiman chayashpaca: —Mandac Dios bendiciashca runa, allimi shamushcangui. ¿Imamantatac cai canzhapi saquiringuiyari? Ñami huasipica can samarinatapish, camellocuna maipi huatanatapish allichircani— nirca.

³² Chashna nicta uyashpami, chai servicca Labanpac huasiman rirca. Ña chayacpica, camellocuna aparishcata uricuchishpaca, camellocunaman quihuatapish, tamotapish churarcami. Chai servicmanpish, paihuan caccunamanpish chaquita jahuachun yacuta curcami.

³³ Shinallatac micunatapish curcami. Shina cucpimi, Abrahamta servicca: —Ñuca imapac shamushcata manarac huillashpaca, mana micushachu— nirca. Shina nicpimi paica: —Imapac shamushcataca huillailla— nirca.

³⁴ Chashna nicpimi, chai servicca: —Ñucaca Abrahamta servicmi cani.

³⁵ Mandac Diosca ñuca amomanca imatapish achcata bendiciashpami chayucyachishca. Chaimantami ovejacunatapish, vacacunatapish, cullquitapish, curitapish, servic caricunatapish, servic huarmicunatapish, camellocunatapish, burrocunatapish charin.

³⁶ Chashnallatac ñuca amo Abrahampac huarmi Saraca ña yuyac cashpapish shuc cari huahuatami charirca. Paimanmi ñuca amoca tucui charishcata curca.

³⁷ Ñuca amoca: “Ñuca churihuan cazarachunca, cai ñuca causacuc Canaán llactapi causac solteracunataca ama pushamunguichu.

³⁸ Ashtahuanpish ñuca churipac huarmi cachunca, ñaupa ñuca causashca llactaman rishpa, ñuca taitapac familiapuramanta pushamungui” nishpa, ari nichirca.

³⁹ Shina nicpimi, ñucaca: “Soltera ñucahuan mana shamusha nicpica, ¿imatatac ruhuasha?” nircani.

⁴⁰ Shina nicpi, ñuca amoca: “Ñucaca Mandac Diosta cazushpami causarcani. Paica shuc angelhuan cantaca allita pushanga. Chaimantami canca mana ima tucushpa rishpa, ñuca familiapuramanta ñuca taitapac huasi ucupuramanta shuc solterata ñuca churihuan cazarachingapac pushamungui.

⁴¹ Can ñuca familiacunapacman chayacpi, ñuca familiacuna ushita mana cachasha nicpica, can Diospac shutipi ari nishcapish ña mana ima cangachu” nircami.

⁴² Chashna nicpi, yacu junduman chayamushpa, Mandac Diosta mañashpaca: “Ñuca amo Abrahamta Mandac Dioslla, canmi ñuca purina ñanpi allita pushamushcangui.

⁴³ Cunanca, cai yacu jundu cuchupimi cani. Maijan soltera cashpapish cai yacu jundumanta yacuta apangapac shamucpica: Cambac puñumanta asha yacuta ubiangapac convidai” nishami.

⁴⁴ Shina nicpi, paica: “Caica, ubiailla, cambac camellocunamanpish yacuta llucchishpa, ubiachisha” nicmi can acllashca, ñuca amopac churipac huarmica canga nicurcanimi.

⁴⁵ Mañanata manarac tucuchicpimi, ñapish Rebecaca rigra jahuapi puñu apashca ricurircalla. Pai yacu junduman chayashpa, yacuta llucchishpa cutishpa rigricpimi ñuca: “Cambac puñumanta asha yacuta ubiangapac convidai” nircani.

⁴⁶ Shina nicpimi, utcashpa puñuta rigra jahuamanta uricuchishpa: “Caica ubiai, cambac camellocunamanpish ñami ubiachigrini” nirca. Shina nicpica ubiarcanimi, shinallatac ñuca camellocunamanpish yacuta ubiachircami.

⁴⁷ Chai quipami ñuca tapushpaca: “¿Pipac ushitac cangui?” nicpimi paica: “Nacorpac churi Betuelpac ushimi cani, ñuca mamaca Milcami” nirca. Shina nicpica, shuc sortista singapi churachircanimi. Shinallatac maquipipish manillata churachircanimi.

⁴⁸ Shinallatac cumurishpami, Mandac Diosta pagui nircani. Ñuca amota Mandac Diostaca maimi alli nircani. Paimi ñuca amopac churipac huarmi cachun, ñuca amopac huauquipac ushita apachun, allita pushamushca.

⁴⁹ Cunanca, ñuca amota llaquishpa ari nina cacpipish, ari nichicyari, mana nina cacpipish, mana nichicyari. Ñucaca alli ladota rina cacpipish rishallami, lluqui ladota rina cacpipish rishallami— nirca.

⁵⁰ Shina nicpi, Labanpish, Betuelpish rimashpaca: —¡Tucui caicunaca Mandac Diospac munaimantami! Chaimanta ñucanchicca aritapish, manatapish mana ni pudinchicchu.

⁵¹ Riqui, Rebecaca cambac ñaupapimi, Mandac Dios nishca shina cambac amopac churipac huarmi cachun apailla— nirca.

⁵² Chaita Abrahamta servic uyashpaca, Mandac Diospac ñaupapimi pambacaman cumurirca.

⁵³ Chai quipaca cullquimanta, curimanta ruhuashca sumaccunata, sumac churanacunata llucchishpami Rebecamanpish, paipac turimanpish, mamamanpish curca.

⁵⁴ Chai servicca paihuan shamuc runacunandimi micushpa ubiashpa, chaipi pacarirca. Cayandi tutamanta jatarishpaca: —Cunanca, ñuca amopac huasiman cachaiyari— nirca.

⁵⁵ Shina nicpi, Rebecapac turipish, mamapish rimashpaca: —Rebecaca cai chunga punzhacunallatac ñucanchic-huan saquirichun, chai quipaca canhuan ringallami— nirca.

⁵⁶ Shina nicpimi, chai servicca: —Mandac Diosmi tucuipi allita caiman pushamushca. Chaimanta ama jarcaichicchu, ashtahuanpish ñuca amopacman cutichun saquichiclla— nirca.

⁵⁷ Shina nicpimi paicunaca: —Shinashpaca, Rebecata tapushunchic— nirca.

⁵⁸ Rebecata cayashpaca: —¿Canca cai runahuan risha ninguichu?— nicpi, paica: —Ari, risha ninimi— nirca.

⁵⁹ Shina nicpimi, Rebecataca huiñachic mamandi, Abrahamta servictapish paihuan shamuc runacunandi richun saquirca.

⁶⁰ Rebecata bendiciashpaca: «Pani Rebecalla, huaranga huarangapac mamami tucungui. Cambac huahua huahuacunaca piñaccunataca mishashpa, llactacunata japinga» nishpa cacharca.

⁶¹ Shina nishca quipami, Rebecaca jatarishpa, servic solteracunata pushashpa, camellocunapi tiyarishpa, chai servic-huan rirca. Chashnami chai servicca Rebecata pushashpa rirca.

⁶² Isaacca Neguev llactapi causac cashcamantami «Ñucata ricushpa causac» nishca yacu jundu ladomanta shamucurca.

⁶³ Isaacca yuyarishpa puriringapacmi chishi lado chai pambaman llucshishca carca. Chaipi cashpami huichailla ricushpaca, camellocuna shamucucta ricurca.

⁶⁴ Rebecapish huichailla Isaacta ricushpami, camellomanta uricurca.

⁶⁵ Shina uricushpa chai servictaca: —¿Pitac chai pambata ñucanchicpacman shamucun?— nirca. Shina nicpimi, chai servicca: —Paimi ñuca amoca— nirca. Shina nicpimi, Rebecaca ñahuita pacana pañohuan ñahuita pacarca.

⁶⁶ Abrahamta servicca tucui imalla tucushcatami Isaacmanca huillarca.

⁶⁷ Chai quipami Isaacca Rebecata paipac mama Sara causana carpa huasiman pushashpa, paihuan cazararca. Isaacca Rebecata mai cuyashpaca, paipac mama huañushcamanta llaquilla cashpapish cushillami tucurca.