GÉNESIS 22 - Dios Rimashcata Quillcashcami

Dios Abrahamta paipac churita rupachichun nishcamanta

¹ Chai quipaca, Diosca Abraham crishcata ricungapac cayashpaca: —Abraham— nirca. Shina cayacpimi Abrahamca: —Caipimi cani— nirca.

² Shina nicpimi Diosca: —Cambac cuyashca shuclla churi Isaacta Moriah llactaman aparishpa, ñucaman cushpa rupachi. Maijan urcupi rupachina cashcataca ñucami huillasha— nirca.

³ Chai cayandi tutamanta utca jatarishpami, Abrahamca burrota parejashpa, paita ishcai serviccunatapish, paipac churi Isaactapish, rupachina yantatapish apashpa, Dios maiman richun nishcaman rirca.

⁴ Ña quimsa punzha quipami, Abrahamca carumanta chai rupachina pushtutaca ricurca.

⁵ Shina ricushpami paita serviccunataca: —Cancunaca caillapi burrohuan saquirichic, ñucaca huambrahuanmi Diosta allimari cangui ningapac rigrini. Chai quipaca cutishallami— nirca.

⁶ Abrahamca rupachina yantata paipac churi Isaaman apachishpami, paica cuchillotapish, ninatapish apashpa, ishcaita rirca.

⁷ Isaacca taita Abrahamtaca: —Ñuca Taitito— nirca. Shina nicpimi Abrahamca: —¿Imatac ningui huahua? Caipimi cani— nirca. Shina nicpimi paica: —Caipica ninahuan, yantallahuanmi charinchic. Ashtahuanpish, ¿Diosman cushpa rupachina ovejaca maipitacyari?— nirca.

⁸ Shina nicpimi Abrahamca: —Ñuca huahualla, Diosllatacmi rupachina ovejataca cunga— nirca. Shina nishpaca, purishpa catircacunallami.

⁹ Abrahamca maipimi Dios ricuchishcaman chayashpaca, shuc altarta ruhuashpami, chai jahuapi yantata churashpa, paipac churi Isaacta chacnashpa yanta jahuapi churarca.

¹⁰ Shina churashpami Abrahamca cuchillota japishpa, paipac churita huañuchigrirca.

¹¹ Shina huañuchigricpimi, Mandac Diospac ángel jahua pachamanta cayashpaca: —¡Abraham! ¡Abraham!— nirca. Shina nicpimi Abrahamca: —Caipimi cani— nirca.

¹² Shina nicpimi angelca: —Huambrapac jahuapica ama maquita churaichu, ama imata ruhuaichu. Diosta manchashpa, cambac cuyashca shuclla churita mañacpi, mana misashcataca ña yachanimi— nirca.

¹³ Abraham huichailla ricushpaca, gachusapa oveja zarza casha angupi gachucuna churarishca shayacuctami ricurca. Chai ovejatami paipac churipac randi Diosman cushpa rupachirca.

¹⁴ Chaimantami Abrahamca chai urcutaca: «Mandac Diosca ima illashcata cunllami» nishpa shutichirca. Cunancamanmi chai urcutaca: «Mandac Diosca ima illashcata cunllami» nishpa cayancuna.

¹⁵ Jahua pachamanta ángel Abrahamta cutin cayashpaca:

¹⁶ —Mandac Diosca: “Cambac cuyashca shuclla churita mana misashcamantaca ñuca shutipi,

¹⁷ yallita bendiciashpami, cambac huahua huahuacunataca jahua pacha lucerocuna shina, mama cucha tiyu shinata mirachisha. Chashnallatac paicunata piñaccunataca mishacungallami.

¹⁸ Ñuca nishcata pactachishcamantaca canmantami tucui cai pachapi causaccuna bendiciashca canga” ninmi— nirca.

¹⁹ Abrahamca paita serviccunapacman cutircami. Chai quipaca, tucui mashna jatarishpa, Beersebaman cutishpami, chaipi causangapac saquirirca.

²⁰ Chai quipami Abrahamtaca: «Cambac huauqui Nacorpac huarmi Milcapish huahuayucmi tucushca» nishpa huillarca.

²¹ Punta huacharishca churica Uzmi. Uzpac quipaca Buzmi, Buzpac quipaca Quemuelmi. Paimi Arampac taita carca.

²² Chai quipaca Quesed, Hazo, Pildas, Jidlaf, Betuelmi huacharirca.

²³ Betuelca Rebecapac taitami carca. Cai pusac huahuatami Milcaca Abrahampac huauqui Nacorpactaca charirca.

²⁴ Chaipac jahuapica Nacorca caishuc Reúma huarmipipish huahuacunata charircami. Paicunaca Teba, Gaham, Tahas, Maacami carca.