GÉNESIS 21 - Dios Rimashcata Quillcashcami

Isaac huacharishcamanta

¹ Mandac Diosca pai nishca shinami Sarataca ricuc shamurca. Pai imata ruhuasha nishca shinallatacmi Saramanca pactachirca.

² Saraca yuyac cashpapish Abrahampacta huicsayuc tucushpami, Mandac Dios nishca punzhallapitac shuc cari huahuata charirca.

³ Abrahamca Sarapi charishca huahuataca Isaactami shutichirca.

⁴ Paipac churi Isaac pusac punzhata charicpica, Dios mandashca shinami circuncisionta ruhuarca.

⁵ Paipac churi Isaac huacharicpica, Abrahamca patsac huatayucmi carca.

⁶ Chaimantami Saraca: «Diosmari cushichishpa, ñucataca asichirca. Maijanpish caita uyashpaca, ñucahuan asingacunami.

⁷ ¿Pitac Abrahammanca paipac huarmi Saraca huahuacunata chuchuchingami nishpa huillanman carca? Pai yuyac cacpipish, shuc churitami Abrahammanca cushcani» nirca.

Agartapish, Ismaeltapish Abrahampac huasimanta llucchishpa cachashcamanta

⁸ Isaac ña huiñacpica, chuchumanta raquircami. Chuchumanta raquishca punzhami Abrahamca jatun micuita ruhuarca.

⁹ Saraca Egiptomanta Agar huarmipi Abraham charishca churi Sarapac huahua Isaacta burlacucta ricurca.

¹⁰ Chaimantami Abrahamtaca: «Cai servic huarmitapish, cambac churitapish llucchishpa cachai. Cai servic huarmipac cari huahuaca ñuca huahua Isaacpac herenciata mana chaupinachu can» nirca.

¹¹ Paipac churi Ismaelta llucchishpa cachachun nishcaca Abrahammanca yalli llaquimi carca.

¹² Shina cacpimi, Diosca Abrahamtaca: «Canta servic huarmimantapish, churimantapish ama llaquirichu, Sara imata nishcata uyailla. Isaacpac huahua huahuacunallami cambac huahua huahuacunaca canga.

¹³ Canta servic huarmipac cari huahuapac huahua huahuacunamantapish cambac huahua cashcamantaca jatun llactatami ruhuasha» nirca.

¹⁴ Shina nicpimi, Abrahamca tutamanta utca jatarishpa micunatapish, shuc puru yacutapish Agarman curca. Shinallatac huahuatapish cushpami, caya minchacaman nishpa cacharca. Agarca Beerseba shitashca pambatami maiman chayanatapish mana yachashpa ricurcalla.

¹⁵ Puru yacuca tucuricpica, paipac huahuataca shuc yura cuchupimi tiyachishpa saquirca.

¹⁶ Paipac cari huahua huañucta mana ricungaraicumi caruman rishpa flecha maicaman chayac shinapi tiyarirca. Chai chimbapurapi mama tiyacucpimi, huahuaca sinchita huacai callarirca.

¹⁷ Huahua huacashca Diosman uyaricpimi, Diospac ángel jahua pachamanta Agarta cayashpaca: «Agar, ¿imatac tucungui? Ama manchaichu, cambac huahua chaipi huacacuctaca Diosca uyarcami.

¹⁸ Ñucami paimantaca shuc jatun llactata ruhuasha. Chaimanta jatarishpa, cambac huahuata maquipi japirishpa jatarichi» nirca.

¹⁹ Chai quipami, Diosca Agarpac ñahuipi shuc yacu junduta ricuchirca. Chaita ricushpami, purupi yacuta jundachishpa, huahuaman ubiachirca.

²⁰ Chai huahuaca Dios ayudacpimi, shitashca pambapi huiñashpaca, arcohuan flechata shitanata alli yachac carca.

²¹ Paica shitashca pamba Paranpimi causacurca. Paipac mamaca Egiptomanta huarmihuanmi cazarachirca.

Abrahampish, Abimelecpish ari nishcamanta

²² Chai huatacunallatacmi jatun mandac Abimelecca paipac soldadocunata mandac Ficolhuan shamushpa Abrahamtaca: —Tucui imata ruhuanapipish Diosca canhuanmi.

²³ Cunanca, ñucatapish, ñuca churitapish, ñuca nietocunatapish, can causacushca llactapi causaccunatapish mana llaquichishpa, ashtahuanpish ñuca canman allita ruhuashca shinallatac allita ruhuangapac cunanllatac Diospac shutipi ari ni— nirca.

²⁴ Shina nicpimi Abrahamca: —Ari, Diospac shutipimi ari nini— nirca.

²⁵ Abrahamca Abimelecpac serviccuna yacu jutcuta quichushcamantami Abimelecta sinchita rimarirca.

²⁶ Chaimantami Abimelecca: —Pi caita ruhuashcata mana yachanichu, canpish ñucamanca mana huillashcanguichu. Cunan punzhacaman caitaca mana yachashcanichu— nirca.

²⁷ Shina nicpimi, Abrahamca ovejacunatapish, vacacunatapish Abimelecman curca. Chai shina ruhuashpami, ishcaimanta mana piñanacungapac ari ninacurca.

²⁸ Abrahamca canchis malta ovejatami chicanyachirca.

²⁹ Shina ruhuacpimi, jatun mandac Abimelecca: —Cai canchis malta ovejacunata chicanyachishpaca, ¿imatatac nisha nin?— nirca.

³⁰ Shina nicpimi Abrahamca: —Cai canchis malta ovejataca yacu jundutaca ñuca allashcata ricuchichunmi, ñuca maquimanta japingui— nirca.

³¹ Shina ishcaita chaipi ari nishcamantami chai allpataca Beersebata shutichirca.

³² Shinami Beerseba llactapi ari ninacurca. Chai quipami Abimelecca paipac soldadocunata mandac Ficolhuan filisteocunapac llactaman cutimurca.

³³ Abrahamca Beerseba pambapimi tamarisco yurata tarpurca. Chaipimi huiñaita causac Mandac Diosta mañarca.

³⁴ Abrahamca achca punzhacunatami filisteocunapac llactapica causarca.