GÉNESIS 20 - Dios Rimashcata Quillcashcami

Abrahammantapish, jatun mandac Abimelecmantapish

¹ Abrahamca pai causacushca llactamanta rishpaca, Neguev llactamanmi chayarca. Chaipimi Cades-huan, Shur shitashca pambahuan tupanacuipi tiyac Gerarpi asha punzhacunata causarca.

² Abrahamca chaipica paipac huarmi Sarataca: «Ñuca panimi» nicmi carca. Chaimantami Gerar llactata jatun mandac Abimelecca Sarata apamuchun cacharca.

³ Ashtahuanpish Dios tuta muscuipi ricurishpami, jatun mandac Abimelectaca: «Riqui, chai huarmita apamushcamantaca huañugringuimi. Chai huarmica cusayucmi» nirca.

⁴ Ashtahuanpish Abimelecca Abrahampac huarmi Sarapi manarac chayarishca cashcamantami paica: «¿Mandac Dioslla, ima millaita mana ruhuashca cacpipish huañuchinguichu?

⁵ ¿Manachu Abrahamllatac: “Ñuca panimi” cutin huarmica: “Ñuca turimi” nirca? Chaimantami ñuca chuya maquihuan, alli shunguhuan apamushpa, chaita ruhuarcani» nirca.

⁶ Shina nicpimi, Mandac Diosca muscuipi ricurishpaca: «Ari, can alli shunguhuan chashna ruhuashcataca yachanimi. Chai huarmipi chayarishpa, ñuca mandashcata paquishpa, juchallichunpish cantaca mana saquircanichu.

⁷ Cunanca, cai huarmita paipac cusaman cutichi. Paica ñuca ima nishcata huillacmi. Paica can ama huañuchunmi, ñucata mañanga. Cai huarmita mana cutichishpaca, canpish, canhuan causaccunapish huañunguichictacmi» nirca.

⁸ Shina nicpimi, jatun mandac Abimelecca tutamanta jatarishpa, tucui paita serviccunata cayashpa, ima shina muscushcata huillarca. Shina huillacpica, yallitami chai serviccunaca mancharirca.

⁹ Chai quipa Abimelecca Abrahamta cayachishpaca: —¿Imatatac ruhuarcangui? Ñucatapish, ñuca mandacuc llactatapish jatun juchata ruhuachingapac shamuchunca, ¿ñucanchicca cantaca ima millaitatac ruhuashcanchicyari? Mana ruhuana cashcatami ruhuashcangui.

¹⁰ ¿Ima yuyaihuantac caita ruhuarcangui?— nirca.

¹¹ Shina nicpimi Abrahamca: —Caipica Diosta manchaccunaca mana tiyanchu. Shina cashpaca, ñuca huarmita quichungapac ñucata huañuchingami yuyarcanimi.

¹² Caita ningapacca ñuca mamamanta mana pani cashpapish, ñuca taitamantaca panimi. Chaimantami paihuan cazararcani.

¹³ Ñuca taitapac huasimanta llucshishpa, caita chaita purichun Dios mandacpica, ñuca huarmitaca: “Canca, mai llactaman chayashpapish ñucataca: ‘Paica, ñuca turimi’ ningui” nircani— nirca.

¹⁴ Abimelecca Abrahamman paipac huarmi Sarata cutichishpaca, ovejacunatapish, vacacunatapish, servic caricunatapish, servic huarmicunatapish curcami.

¹⁵ Chashna cushpapish Abimelecca Abrahamtaca: —Riqui, ñuca llactaca cambac ñaupapimi. Can maipi munangui, chaita acllashpa causagrilla— nirca.

¹⁶ Shinallatac Sarataca: —Riqui, cambac turimanca huaranga cullquitami curcani. Chai cullquimi canhuan cac tucui gentecunapac ñaupapi yuranlla paño shina, chuya cashcata ricuchinga. Chaimantami cantaca pi mana juchanchinga— nirca.

¹⁷ Chaimantami Abrahamca Abimelecmantapish, paipac huarmimantapish, paita servic huarmicunamantapish Diosta mañarca. Chashna mañacpica alliyarcami, shinallatac huarmicunaca cutinllatac huahuacunayuc tucurcami.

¹⁸ Abimelec Abrahampac huarmi Sarata apashcamantami Mandac Dios Abimelecpac huasipi causac huarmicunataca huahuata mana charic pudicta ruhuarca.