GÉNESIS 2 - Dios Rimashcata Quillcashcami

¹ Diosca jahua pachatapish, cai pachatapish, chaipi tucui imalla tiyashcatapish ruhuanataca tucuchircami.

² Diosca pai ruhuana cashcataca canchis punzhapimi tucuchirca. Tucuita ruhuashpaca, canchisniqui punzhapica samarircami.

³ Chai canchisniqui punzhatami Diosca bendiciashpa, paipaclla cachun ruhuarca. Chai punzhapimi Diosca tucui cai pachapi ruhuanata tucuchishpa samarirca.

⁴ Chashnami cai pachapish, jahua pachapish callarirca. Mandac Dios cai pachata, jahua pachata ña ruhuashca quipaca,

Edén huertapi Adanta Dios churashcamanta

⁵ manarac tamyarcachu. Chaimantami cai allpapica ima yurapish, quihuapish manarac huiñarca. Shinallatac allpata allichic runapish manarac tiyarcachu.

⁶ Shina cacpipish, allpamanta samai shina yacu llucshishpami, tucui allpataca jucuchicurca.

⁷ Chaimantami Mandac Diosca ñuto allpamanta runata ruhuashpa, singapi causaita cuc samaita pucurca. Chaimantami runaca causaiyuc carca.

⁸ Chai quipami Mandac Diosca inti llucshic ladopi Edén huertata ruhuashpa, pai ruhuashca runataca chaipi churarca.

⁹ Mandac Diosca chai huertapica tucuilaya sumac micunalla granocunata pucuc yuracunatami huiñachirca. Shinallatac huerta chaupipica causaita cuc yuratapish, alli cashcata, mana alli cashcata yachachic yuratapish huiñachircami.

¹⁰ Chai Edén huertata parcungapacca shuc jatun yacumi llucshicurca. Chai yacumi chuscu ladota chaupirishpa ricurca.

¹¹ Chai chaupirishca shucniqui yacuca Pisonmi. Chai yacumi curi tiyac tucui Havila llactata muyun.

¹² Chai allpapi tiyac curica mai allimi. Chai allpapica bedelio yuracunapish, ónice rumicunapish tiyanmi.

¹³ Ishcainiqui yacuca Gihonmi. Chai yacumi tucui Cus llactata muyun.

¹⁴ Quimsaniqui yacuca Hidekelmi. Chai yacuca Asiria llactamanta inti llucshic ladotami ricun. Chuscuniqui yacuca Eufratesmi.

¹⁵ Mandac Diosca chai Edén huertapimi pai ruhuashca runataca trabajashpa, cuidashpa causachun churarca.

¹⁶ Chashna churashpami, Mandac Diosca chai runataca: «Tucui huertapi tiyac yuracunapi pucushcata micui pudinguimi.

¹⁷ Ashtahuanpish alli cashcata, mana alli cashcata yachachic yuramantaca ama micunguichu. Ima punzhami chai yuramanta micungui huañunguitacmi» nirca.

¹⁸ Chai quipaca Mandac Diosca: «Carica pailla causanaca mana allichu. Chaimanta paipac allipac shuc ayudacta ruhuasha» nirca.

¹⁹ Mandac Diosca allpamantami tucui cai pachapi causac animalcunatapish, jahuata volac animalcunatapish ruhuarca. Chashna ruhuashpami, shutita churachun, Adanpacman apamurca. Tucui animalcunaca Adán shutichishcami.

²⁰ Chashnami Adanca sacha animalcunatapish, jahuata volac animalcunatapish, shinallatac charina animalcunatapish shutichirca. Chashna shutichishpapish paipac allipac ayudactaca mana charircachu.

²¹ Chaimantami Mandac Diosca Adanta yallita sueñuchishpa, shuc costillasta llucchishpa, aichataca allichirca.

²² Carimanta llucchishca costillasmantami Mandac Diosca shuc huarmita ruhuashpa, Adanman curca.

²³ Chaimantami Adanca: «Caica ñuca tullumanta, ñuca aichamanta ruhuashcami. Paica carimanta ruhuashca cashcamantami “Huarmi” canga» nirca.

²⁴ Chaimantami carica taita mamata saquishpa, paipac huarmihuan tandarishpa, shuclla tucunga.

²⁵ Adanpish, paipac huarmipish lluchullami carca. Shina cashpapish, mana pingarcacunachu.