GÉNESIS 19 - Dios Rimashcata Quillcashcami

Sodomatapish, Gomorratapish chingachishcamanta

¹ Ña chishiyagricucpimi, ishcai angelcunaca Sodoma puebloman chayarca. Chai pueblo yaicunapimi Lotca tiyacurca. Angelcuna ricuricpica, paicunata chasquingapacmi jatarishpa pambacaman cumurirca.

² Chashna cumurishpaca: —Ñuca amitocunalla, cancunata servic ñuca huasipi pacaringapac shamuichic, chaipi chaquitapish jahuanguichic. Cayaca ñanta catishpa ringuichicllami— nirca. Shina nicpimi angelcunaca: —Mana, cunan tutaca canzhallapimi pacarishun— nirca.

³ Shina mana yaicusha nicpipish, Lot shamuichic nicurcallami. Shina nicucllapimi angelcunaca huasiman yaicurca. Lotca sumac micunata ruhuashpami, levadura illac tandatapish cararca. Shinami micurca.

⁴ Ashtahuanpish paicuna manarac sueñungapac siriricpimi, Sodomamanta tucui gentecuna shamushpa, Lotpac huasita muyurcacuna. Huambracunamanta callarishpa, yuyaccunacamanmi tucui tandanacushpa muyurcacuna.

⁵ Chaipimi Lotta cayashpaca: —¿Maipitac cunan tuta cambacman shamuc runacunaca? ¡Paicunahuan sueñungapac canzhaman llucchi!— nirca.

⁶ Shina nicpimi, Lotca paicunata tupangapac canzhaman llucshishpa, punguta huichcashpa,

⁷ shayarishpaca: —Ñuca huauquicunalla, cai jatun llaquitaca ama ruhuaichicchu.

⁸ Uyaichic, carihuan manarac chayarishca ishcai ushitami charini. Paicunata canzhaman llucchisha, paicunataca cancuna munashcata ruhuaichiclla, ashtahuanpish cai ñuca huasipi pozaccunataca ama imata ruhuaichicchu— nirca.

⁹ Shina nicpimi paicunaca: —¡Caimanta anchuri! ¿Can maimanta shamucllachu ñucanchicta mandagringui? Cantacarin paicunata yallimi llaquichishun— nishpami, Lottaca macai callarirca. Punguta paquingapacmi punguman cuchuyarca.

¹⁰ Shina ruhuacucpimi, chai ishcai pozaccunaca Lotta aisashpa, ucuman yaicuchishpa, punguta huichcarca.

¹¹ Huasi pungupi cac gentecunataca huambracunamanta callarishpa, yuyaccunacamanmi mana ricucta ruhuarca. Chaimantami chai gentecunaca punguta mashcacushpalla shaicurcacuna.

¹² Chaimantami chai ishcai pozaccunaca Lottaca: —¿Caipica maijan familia ashtahuan tiyanracchu? Cambac churicunatapish, ushicunatapish cusacunandi, caipi tiyac tucui familiacunatapish caimanta llucchi.

¹³ Cai pueblotaca chingachigrinchicmi. Cai pueblopi causaccunaca allita mana allita ruhuaccunami nishpa caparishcaca Mandac Diospac ñaupamanmi chayashca. Chaimantami Mandac Diosca caipi causaccunata chingachichun, ñucanchictaca cacharca— nirca.

¹⁴ Chaimanta Lot llucshishpa, paipac ushicunahuan cazaragricuc yernocunataca: —¡Mandac Diosca cai llactata llaquichigrinmi! Chaimanta jatarichic, llucshichic— nirca. Shina nishcaca paipac yernocunamanca burla shinallami carca.

¹⁵ Ña achicyamucucpimi, angelcunaca Lottaca: —¡Cai llactata llaquichicpi, mana huañungapacca jatarishpa, cambac huarmitapish, caipi cac ishcai ushicunatapish apashpa, utca llucshi!— nirca.

¹⁶ Lot mana utcacpimi, chai ishcai angelcunaca Mandac Dios llaquishcamanta paitapish, paipac huarmitapish, ishcai ushicunatapish maquimanta aisashpa, chai llactamanta canzhaman llucchirca.

¹⁷ Chashna llucchishpaca: —Cancuna quishpirisha nishpaca, ama huashata chapanguichicchu. Shinallatac chai pambacunapipish ama shayaringuichicchu, ashtahuanpish urcupi miticugrichic, mana cashpaca huañunguichicmi— nirca.

¹⁸ Shina nicpimi Lotca: —Ñuca amitocunalla, mana ri pudishachu.

¹⁹ Cancunata servic ñucaca cancunapac ñahuipica allimi ricurishcani. Huañuimanta quishpichishpami, mai cuyashcata ricuchishcanguichic. Shina cacpipish, urcuman miticungapac mana ri pudishachu. Manarac chayacpimi, llaqui japishpa huañuchinga.

²⁰ Riqui, ñuca miticungapacca chai cuchullapimi shuc uchilla llacta tiyan. Chai uchilla llactapi ñuca miticugrichun saquichiclla. Chaipimi mana huañushpa quishpichisha— nirca.

²¹ Shina nicpimi, paicunapuramanta shucca: —Riqui, can mañashcata uyashcanimi. Can mañashcamantaca can mañashca llactataca mana tucuchishachu.

²² Chaipi utca miticungapac callpai. Can chaiman chayangacamanca, imata mana ruhuashachu— nirca. Chai llacta uchilla cashcamantami Zoar shuti saquirirca.

²³ Ña inti llucshicucpimi, Lotca chai Zoarman chayarca.

²⁴ Shina cacpica, Mandac Diosca Sodomapipish, Gomorra pueblopipish jahua pachamanta azufrehuan rupacuc ninatami tamyachirca.

²⁵ Chashnami chai llactacunatapish, chaipi causaccunatapish, tucui pambacunatapish, chaipi pucushca granotapish tucuchircami.

²⁶ Chaita Lotpac huarmi tigrarishpa ricushpaca, cachi rumi tucushpami saquirirca.

²⁷ Cayandi tutamantaca Abrahamca Mandac Dios-huan parlanacushca pushtumanmi rirca.

²⁸ Chaiman chayashpami, Abrahamca Sodomamantapish, Gomorramantapish, tucui pambacunamantapish hornomanta cushni llucshicuc shinata ricurca.

²⁹ Chashna chai pueblocunata, pambacunata tucuchishpapish Diosca Abrahamta yuyarishpami, Lotta chingarigricuc pueblomanta llucchishpa quishpichirca.

³⁰ Ashtahuanpish Lotca Zoarpi causanata manchashpami, paipac ishcai ushicunandi huichaiman rishpa, urcupi causangapac rirca. Chaipica shuc machaipimi ishcai ushicunandi causai callarirca.

³¹ Chaipimi punta ushica quipa ushitaca: —Ñucanchic taitaca ña yuyacmi, maijan cazarashpa huahuayuc tucuc shina, ñucanchicpish cazarangapacca cai llactapica caricunaca mana tiyanchu.

³² Cunanca, ñucanchicpish huahuata charingapacca ñucanchic taitaman vinota ubiachishpa, machachishpa paihuan sueñushun. Chashna sueñushpami, taitamanta huahua huahuacunata charishun— nirca.

³³ Chai tutallatacmi punta ushica vinota ubiachishpa, paipac taitahuan sueñurca. Ashtahuanpish taitaca ima horas siririshcatapish, ima horas jatarishcatapish mana yacharcachu.

³⁴ Cayandi punzhaca punta ushica quipa ushitaca: —Riqui, caina tutaca ñucanchic taitahuanmi sueñurcani. Cunan tutapish cutinllatac vinota ubiachishpa machachishun, paihuan sueñungui. Chashna sueñushpami, ñucanchic taitamanta huahua huahuacunata charishun— nirca.

³⁵ Chai tutaca cutinllatacmi taitaman vinota ubiachishpa, quipa ushica taitahuan sueñurca. Ashtahuanpish taitaca ima horas siririshcatapish, ima horas jatarishcatapish mana yacharcachu.

³⁶ Chashnami Lotpac ishcai ushicunaca taitapacta huicsayuc tucurca.

³⁷ Punta ushica shuc cari huahuatami charirca. Chai huahuataca Moabtami shutichirca. Paimi cunan punzha causac moabitacunapac taitaca can.

³⁸ Chai shinallatacmi quipa ushipish shuc cari huahuata charirca. Chai huahuataca Ben-amitami shutichirca. Paimi cunan punzha causac amonitacunapac taitaca can.