GÉNESIS 18 - Dios Rimashcata Quillcashcami

Dios Abrahamman shuc huahuata cusha nishcamanta

¹ Abrahamca Mamre pambapi tiyac encina yura ladopi causacushpami, chaupi punzha rupai yalli cacpi, carpa huasi pungupi tiyacurca. Chaipimi Mandac Diosca encina yuracuna cuchupi paiman ricurirca.

² Abraham huichailla ricushpaca, paipac ñaupapi quimsa runacuna shayacuctami ricurca. Abraham chaita ricushpa, chai carpa huasi pungumanta callpa rishpa, paicunahuan tupashpa, pambacaman cumurishpaca:

³ —Amito, ñuca cambac ñahuipi alli ricurishca cacpica, ñuca huasi cuchumanta ama utca richuyari.

⁴ Cancunapac chaquita jahuangapac yacuta apamungacaman shuyaichic, quipaca yura llandupi samaringuichic.

⁵ Cancuna micuchunca, asha micunata apamugrisha. Ña micushpaca ringuichicllami. Cancunata servic ñucapac huasi ladota pasacushpaca micushpami rina canguichic— nirca. Shina nicpimi paicunaca: —Can nishca shina ruhuailla— nirca.

⁶ Shina nicpimi, Abrahamca carpa huasi ucuman callpashpa Sarataca: —Chuscu chunga libra alli harinamanta tandata ruhuashpa, utca cusai— nirca.

⁷ Abrahamca huagracuna shayanaman rishpami, shuc ashtahuan alli becita acllashpa yanuchun, servic runaman curca.

⁸ Abrahamca lechetapish, mantequitapish, yanushca beci aichatapish apamurcami. Abrahamca paicuna micungacamanca yura ladopimi shayacurca.

⁹ Chai quipaca runacunaca: —¿Maipitac cambac huarmi Saraca?— nirca. Chashna tapucpimi Abrahamca: —Carpa huasi ucupimi— nirca.

¹⁰ Shina nicpimi paicunaca: —Cunan shina shamuc huatami caiman cutimusha. Chaica, chashnatacmi canga. Chai punzhami cambac huarmi Saraca shuc cari huahuata charinga— nirca. Chashna parlanacucuctaca Saraca Abrahampac huasha carpa huasi pungupimi uyashpa shayacurca.

¹¹ Abrahampish, Sarapish ña yallita yuyaccunami carca. Shinallatac Saraca quilla ungüitapish ña mana ungucchu carca.

¹² Chaimantami Saraca paipac shungullapi asishpaca: «Ñucapish, ñuca cusapish ña yuyaccunami canchic. Chashna cashpaca, ¿maitatac ñuca cusahuan chayarina munaitaca charishayari?» nirca.

¹³ Chaimantami Mandac Diosca Abrahamtaca: —¿Ima nishpatac Saraca: “Ña yuyacca, ¿maitatac huahuayuc tucushayari?” nicun?

¹⁴ Mandac Diosmanca, ¿imapish mana ruhuaipacca tiyanchu? Cunan shina shamuc huata ñuca cutimucpica, Saraca ñami shuc cari huahuata charinga— nirca.

¹⁵ Shina nicpimi, Sara manchaihuan cashpaca: —Ñucaca mana asicurcanichu— nishpa llullarca. Shina nicpimi, Mandac Diosca: —Mana chashnachu, asircanguitacmi— nirca.

Abraham Sodoma pueblomanta mañashcamanta

¹⁶ Chai quipami angelcunaca shayarishpa, Sodoma puebloman ri callarirca. Chashna rigricpimi, Abrahamca ashata compañashpa rirca.

¹⁷ Chaipimi Mandac Diosca: «Ñuca imata ruhuagricushcataca Abrahammanca, ¿mana huillashpa pacashachu?

¹⁸ ¿Paimanta alli sinchi, jatun llacta tucugricucpi, shinallatac tucui cai pachapi causaccuna paimanta bendiciashca cagricucpichu mana huillana cani?

¹⁹ Abraham tucui paipac causaipi huahuacunamanpish, huahuapac huahuacunamanpish ñuca yachachishcata yachachigricucta, imapish alli cashcallata ruhuanata yachachigricuctami yachani. Shina cacpica, ñuca imallata Abrahamman cusha nishcataca pactachishcami canga» nishpa yuyarca.

²⁰ Chaimantami Mandac Diosca: —Cai Sodomapi, Gomorrapi causaccunaca yallita millai gentecunami nishpa caparinacuctami uyani. Paicunapac juchacunaca yallitami miraricun.

²¹ Cunanca, ñuca uyashca shina, paicuna yallita millaita ruhuashcata, mana cashpaca mana ruhuashcata ricungapacmi rigrini. Chashna rishpami allita yachasha— nirca.

²² Angelcuna chaimanta rishpaca, Sodomamanmi yaicugrirca. Shina ricpipish, Abrahamca Mandac Diospac ñaupamanta mana anchurircachu.

²³ Chaimantami Abraham cuchuyashpaca: —¿Allita ruhuaccunatapish, Diosta mana cazuccunahuan pactachu llaquichigringui?

²⁴ Chai mana allita ruhuaccunapurapi pichca chungallapish allita ruhuaccuna tiyacpica, paicunata llaquishpa, ¿manachu perdonangui?

²⁵ Can Diosca tucui cai pachapi allita ruhuacmi cangui. Chashna cashca jahuaca, ¿allita ruhuaccunataca Diosta mana cazuccunahuan pactachu chingachingui? Chaitaca jaicapi mana ruhuanguichu— nirca.

²⁶ Shina nicpimi, Mandac Diosca: —Sodoma pueblopi allita ruhuaccuna pichca chungallapish tiyacpica, paicunata cuyashcamantami, tucui chaipi causaccunataca perdonasha— nirca.

²⁷ Shina nicpimi Abrahamca: —Riqui, ñucaca ñuto allpa shina, uchupa shina cashpapish ñucata Mandac Dios-huanmi parlai callarini.

²⁸ Cashcata ruhuac pichca chungapac pichca illacpica, ¿chai pichca illashcamanta chaipi tucui causaccunata chingachinguichu?— nirca. Shina nicpimi paica: —Chuscu chunga pichca tiyacpica, mana chingachishachu— nirca.

²⁹ Cutinmi Abrahamca: —¿Caipi chuscu chungallapish tiyacpica?— nirca. Shina nicpimi paica: —Chuscu chungallapish tiyacpica, paicunata llaquishcamantami mana imata ruhuasha— nirca.

³⁰ Shina nicpimi Abrahamca: —Ñuca Mandac Dioslla, cutin parlai callaricpica, ama piñaringuichu. ¿Caipi quimsa chungallapish tiyacpica?— nirca. Shina nicpimi paica: —Quimsa chunga tiyacpipish, mana imata ruhuashachu— nirca.

³¹ Shina nicpimi Abrahamca: —Riqui, ñuca Mandac Dioslla, yalli parlashpami canta piñachi callarini. ¿Ishcai chungallapish allita ruhuaccuna tiyacpica?— nirca. Shina nicpimi paica: —Ishcai chungata llaquishcamanta mana chingachishachu— nirca.

³² Shina nicpimi, cutinllatac Abrahamca: —Ñuca Mandac Dioslla, ama piñaringuichu, ña caillahuanmi tapugrini. ¿Chungallapish tiyacpica?— nirca. Shina nicpimi, Mandac Diosca: —Chungallapish tiyacpica, paicunata llaquishcamanta mana chingachishachu— nirca.

³³ Mandac Dios Abrahamhuan parlanata tucuchishpaca, rircallami. Abrahampish pai causacushcamanmi cutirca.