GÉNESIS 17 - Dios Rimashcata Quillcashcami

Circuncisionta ruhuashcamanta

¹ Abram iscun chunga iscun huatayuc cacpimi, Dios ricurishpaca: —Ñucami tucui imatapish ruhuaclla Diosca cani. Imatapish allita ruhuashpa, ñuca ñaupapi purilla.

² Ñucaca canhuan ari nishcataca pactachishami. Canmantaca achcata mirachishami— nirca.

³ Shina nicpimi, Abramca pambacaman cumurirca. Shina cumuricpimi, Diosca:

⁴ —Riqui, caimi ñucahuan canhuan ari nishcaca. Canca achca gentecunapac taitami cagringui.

⁵ Cantaca achca gentecunapac taita cachunmi churani. Chaimanta cunanca, ña mana Abram shutichu cangui, ashtahuanpish Abraham shutimi cangui.

⁶ Canmantaca achcatami mirachisha. Canmantami jatun llactacunatapish ruhuasha, jatun mandaccunapish canmantami llucshinga.

⁷ Canhuanpish, cambac huahua huahuacunahuanpishmi ari nishcata callarichisha. Cambacpish, cambac huahua huahuacunapacpish Dios cangapacmi, huiñaipac ari nisha.

⁸ Can causacushca tucui Canaán llactatami canmanpish, cambac huahua huahuacunamanpish, cambac quipa miraicunamanpish huiñaipac cusha. Ñucaca paicunapac Diosmi casha— nirca.

⁹ Cutinllatacmi Diosca Abrahamtaca: —Cai ari nishcataca canpish, cambac huahua huahuacunapish pactachinami canguichic.

¹⁰ Ñucahuan, cancunahuan, cambac huahua huahuacunahuan ari nishcaca caimi: Cancunapuramanta tucui caricunami circuncisionta ruhuana canguichic.

¹¹ Caricuna charishcamanta asha aicha carata pitishpami, circuncisiontaca ruhuana canguichic. Caimi ñucahuan cancunahuan ari nishcata ricuchinga.

¹² Huacharishcamanta pusac punzhapimi tucui cancunapuramanta cari huahuacunaca circuncisionta ruhuashca cana can. Huasipi huacharishca cashpapish, caru llactamanta randishca cashpapish, mana cancunapurapi mirashca huahuacuna cashpapish, caitaca ruhuashpami catina canguichic.

¹³ Cambac huasipi huacharishca cashpapish, randishca cashpapish, circuncisionta ruhuanatacmi canguichic. Cancunapac aichapi caita ruhuashca cashpami, ñucahuan ari nishcata huiñai huiñaipac ricuchinguichic.

¹⁴ Cancunapurapi maijan cari pai charishca asha carata pitishpa, circuncisionta mana ruhuashca cacpica, ñucahuan ari nishcata mana cazushcamantami cancunapuramanta anchuchishca canga— nirca.

¹⁵ Diosca Abrahamtaca: —Cambac huarmi Saraitaca ama ashtahuan Sarai nishpa cayanguichu, ashtahuanpish paica Sara shutimi canga.

¹⁶ Paita bendiciashpami, paimanta cari huahuata canman cusha. Ari, paitaca bendiciashatacmi. Chashna bendiciashca cashpami, llactacunapac mama tucunga. Llactata jatun mandaccunapish paimantami llucshinga— nirca.

¹⁷ Shina nicpimi, Abrahamca pambacaman cumurishpa, paipac shungupi asishpaca: «¿Patsac huatayuc runachu huahuata charisha? ¿Sarapish iscun chunga huatayuc huarmichu huicsayuc tucugrin?» nicurca.

¹⁸ Abrahamca Diostaca: —Ismaelca cambac ñaupapi alli causacushpami alli canman— nirca.

¹⁹ Shina nicpimi Diosca: —Ñucaca cashna cana cashcatatacmi nini. Cambac huarmi Saraca shuc cari huahuatami charinga. Chai huahuataca Isaactami shutichingui. Paihuanpish, paipac huahua huahuacunahuanpish ñuca ari nishcataca huiñaita pactachicushallami.

²⁰ Ismaelmantapish uyashcanimi. Riqui, paitapish bendiciashpa mirachishpa, achca gentecunatami ruhuasha. Chaimantami paica chunga ishcai mandaccunapac taita canga. Paimantaca shuc jatun llactatami ruhuasha.

²¹ Ashtahuanpish ñuca ari nishcataca Isaac-huanmi callarichisha. Cambac huarmi Saraca shamuc huata, cai shina punzhapimi cari huahuata charinga— nirca.

²² Dios Abrahamhuan tucui parlanacushpaca, paipac ñaupamanta huichaiman rircallami.

²³ Dios nishca shinami chai punzhallatac Abrahamca paipac churi Ismaeltapish, paipac huasipi huacharishca serviccunatapish, randishca serviccunatapish, tucui huasipi serviccunatapish paicuna charishca asha carata pitishpa, circuncisionta ruhuarca.

²⁴ Abrahamca iscun chunga iscun huatayuc cashpami, pai charishca asha carata pitishpa, circuncisionta ruhuarca.

²⁵ Cutin paipac churi Ismaelca chunga quimsa huatayuc cashpami, pai charishca asha carata pitishpa circuncisionta ruhuarca.

²⁶ Chai punzhallatacmi Abrahampish, Ismaelpish circuncisionta ruhuarca.

²⁷ Paipac huasipi huacharishca serviccunapish, carumanta cullquihuan randishca serviccunapish tucui caricunami paihuan pactami circuncisionta ruhuarca.