GÉNESIS 16 - Dios Rimashcata Quillcashcami

Agarmantapish, Ismaelmantapish

¹ Abrampac huarmi Saraica mana huahuata chari pudicchu carca. Shina cashpapish, Egiptomanta Agar shuti servic huarmitami charirca.

² Chaimantami Saraica Abramtaca: —Ñucataca Mandac Diosllatacmi mana huahuayucta ruhuashca. Chaitaca canllatac yachanguimi. Chaimanta ñucata servic Agarpi chayari. Paimanta huahuayuc tucushapishchari— nirca. Shina nicpica, Abramca paipac huarmi Sarai mañashcata uyarcami.

³ Chunga huatata Canaanpi causacushpami, Saraica Egiptomanta paita servic Agarta paipac cusa Abramman paipac huarmi cachun curca.

⁴ Agarpi Abram chayaricpica, huicsayucmi tucurca. Chashna huicsayuc cashpami, Agarca paipac ama Saraitaca mana valichi callarirca.

⁵ Chaimantami Saraica paipac cusa Abramtaca: —Ñucata servic Agar huicsayuc tucushpaca, ñucata yalli tucushpami, mana valichi callarin. Canmi juchayuc cangui. Cunanca, Diosllatac ñuca, mana cashpaca can mana allita ruhuashcata ricuchun— nirca.

⁶ Shina nicpi, Abramca Saraitaca: —Riqui, canta servic huarmica cambac maquillapitacmi. Can imata ruhuasha nishpaca, cambac allipac ruhuailla— nirca. Agarca Sarai sinchita llaquichicpimi, paipac ñaupamanta miticushpa rirca.

⁷ Chashna rishpa, Shur shitashca pambaman rina ñan ladopi tiyac yacu jundu ladota ricucpimi, Mandac Dios cachashca ángel tupashpaca:

⁸ —Saraita servic Agar, ¿maimantatac shamucungui? ¿Maimantac ricungui?— nirca. Shina nicpimi paica: —Ñuca ama Saraipac ñaupamantami miticushpa ricuni— nirca.

⁹ Shina nicpimi, Mandac Diospac angelca: —Cambac ama Saraipac ñaupallamantac cutishpa, pai mandashcata cazugri.

¹⁰ Cambac huahua huahuacunataca maita mana yupaipactami achcata mirachisha.

¹¹ Cunanca, huicsayucmi cangui, shuc cari huahuatami charingui. Chai huahuataca Dios cambac llaquita uyashcamantami Ismaelta shutichingui.

¹² Paica yalli piñami canga. Paica tucuihuanmi piñanacunga. Shinallatac tucuimi paita piñanga. Tucui paipac huauquicunahuanmi piñanacushpa causanga— nirca.

¹³ Agarca paihuan rimacuc Mandac Diostaca: «Ñucata ricuc Diosmi cangui» nishpami shutichirca. Shinallatac: «Chaica, ¿manachu ñucata ricuc Diosta ricuni?» nirca.

¹⁴ Chaimantami chai jundutaca: «Ñucata ricucuc, causaiyuc» nishpa shutichirca. Chai junduca Cades-huan, Bered llactahuan tupanacuipimi.

¹⁵ Agarca Abrampactami shuc cari huahuata charirca. Abramca Agar charishca huahuataca Ismaeltami shutichirca.

¹⁶ Agar Ismaelta sajuaricpica, Abramca pusac chunga sucta huatayucmi carca.