GÉNESIS 15 - Dios Rimashcata Quillcashcami

Mandac Dios Abramman shuc churita cusha nishcamanta

¹ Chai quipa, Mandac Dios Abramman muscuipi shina ricurishpaca: —Abram ama manchaichu, ñucami escudo shina, canta jarcac cani. Sumac japinatami japingui— nirca.

² Shina nicpimi Abramca: —Mandac Dioslla, ¿ñucamanca imatatac cugringuiyari? Ñucaca huahua illacllamari cani. Ñuca charishcacunataca Damasco llactamanta ñucata servic Eliezermi japinga.

³ Ñucataca canllatacmi mana huahuayucta ruhuarcangui. Tucui ñuca charishcacunataca ñuca huasipi huacharishca ñucata servicmi japinga— nirca.

⁴ Mandac Dios cutinllatac rimashpaca: —Cambac charishcacunataca mana paichu japinga, ashtahuanpish cambac quiquin churimari japinga— nirca.

⁵ Shina nishpa, Mandac Dios Abramta canzhaman pushashpa, jahua pachata ricuchishpaca: —Lucerocunata yupanata pudishpaca yupai. Chashnami cambac huahua huahuacunaca canga— nirca.

⁶ Abramca Mandac Dios nishcata crircami. Chaimantami Abramtaca: “Canca cashcata ruhuacmi cangui” nishpa chasquirca.

⁷ Shina chashquishpaca: —Ñucaca canta Mandac Diosmi cani. Ñucami cai allpata canman cungapac caldeocuna causana Ur llactamanta llucchircani— nirca.

⁸ Shina nicpimi Abramca: —Mandac Dioslla, ¿ima shinatac cai allpata ñucaman cuna cashcataca yachashayari?— nirca.

⁹ Shina nicpimi, Mandac Diosca: —Shuc quimsa huatayuc vaquillata, shuc quimsa huatayuc huarmi chivota, shuc quimsa huatayuc cari ovejata, shuc urpita, shuc huahua palomata apamui— nirca.

¹⁰ Abramca Mandac Dios nishca shinami, animalcunata apamushpa chaupishpa, chimbapurachishpa churarca. Cutin volac animaltaca mana chaupircachu.

¹¹ Chai aichaman ullachucuna shamushpa, micusha nicpica, Abramca manchachishpami cachacurca.

¹² Ña inti tigrashca quipa, Abram yallita sueñucucpimi, yallita amsayashpa tutayarca. Chaimantami paica yalli mancharicurca.

¹³ Mandac Diosca Abramtaca: —Caitami alli yachana cangui. Cambac huahua huahuacunaca shuctac llactapimi causagringa. Chaipimi catushca shina servinga. Chai llactapica chuscu patsac huatatami llaquita causanga.

¹⁴ Chai llactapi causaccuna llaquichishcamantaca paicunatapish ñucaca llaquichishami. Chai quipaca, tucui charishcacunandimi chai llactamanta llucshinga.

¹⁵ Shina cacpipish, canca sumacta causashpami cushilla yuyacyashpa huañungui. Chashna huañucpimi, cantaca enterranga. Chashnami cambac ñaupa taitacunahuan tandarigringui.

¹⁶ Cambac huahua huahuacunaca chuscu cutincaman huahua huahuacuna tucushca quipami, caiman cutimunga. Chaicamanca amorreocunaca manarac yalli millai tucungachu— nirca.

¹⁷ Ña inti tigrashpa, amsa tuta tucucpimi, Abramca shuc hornomanta cushni llucshicuctapish, chaupishca animalcunapac chaupita nina jagan nishpa, pasacuctapish ricurca.

¹⁸ Chai punzhapi Mandac Diosca Abramhuanca pactachingapac ari nishpaca: —Cambac huahua huahuacunamanca allpataca cai Egipto jatun yacumanta Eufrates jatun yacucamanmi cusha.

¹⁹ Cai ceneocunapac, cenezeocunapac, cadmoneocunapac,

²⁰ heteotacunapac, ferezeocunapac, refaitacunapac,

²¹ amorreocunapac, cananeocunapac, gergeseocunapac, jebuseocunapac allpatami cambac huahua huahuacunamanca cusha— nirca.