GÉNESIS 14 - Dios Rimashcata Quillcashcami

Lotta prezu aparicucpi, Abram quichushcamanta

¹ Jatun mandac Amrafel Sinar llactata mandacui punzhacunapica jatun mandac Ariocca Elasar llactatami mandacurca. Jatun mandac Quedarlaomerca Elam llactatami mandacurca. Cutin jatun mandac Tidalca Goim llactatami mandacurca.

² Paicunami Sodomata jatun mandac Berahuan, Gomorra pueblota jatun mandac Birsahuan, Adma llactata jatun mandac Sinabhuan, Zeboim pueblota jatun mandac Semeberhuan, Zoar nishca Bela llactata jatun mandac-huan macanacurca.

³ Tucui cai pichca jatun mandaccunami Sidim pambapi tandanacurca. Chai pambapimi Cachi yacu cuchaca can.

⁴ Chai mandaccunami jatun mandac Quedarlaomertaca chunga ishcai huatata servishpa causarca. Shina cashpapish, chunga quimsa huatapica jatun mandac Quedarlaomerhuan macanacungapac jatarircami.

⁵ Chunga chuscu huatapica jatun mandac Quedarlaomerca paihuan apanacuc jatun mandaccunahuan shamushpami, Astarot Karnaiam llactapi causac refaitacunatapish, Ham llactapi causac zuzitacunatapish, Save-quiriataim pueblopi causac emitacunatapish,

⁶ Seir urcupi causac horeocunatapish shitashca pamba ladopi cac Parán pambacaman macashpa catirca.

⁷ Paicunaca En-mispat nishca Cades llactamanmi catirca. Chashna cutishpami, amalecitacuna causana llactatapish, Hazezon-tamarpi causac amorreocunatapish tucuchirca.

⁸ Shina cacpimi, Sodoma, Gomorra, Adma, Zeboim, Zoar nishca Bela llactacunamanta jatun mandaccuna llucshishpa, Sidim pambapi macanacungapac allichirirca.

⁹ Paicunami Elam llactata jatun mandac Quedarlaomerhuan, Goim llactata jatun mandac Tidalhuan, Sinar llactata jatun mandac Amrafelhuan, Elasar llactata jatun mandac Arioc-huan macanacurca. Chashnami chai chuscu mandaccunaca caishuc pichca jatun mandaccunahuan macanacurca.

¹⁰ Sidim pambapica asfalto llucchishca achca jutcumi tiyarca. Chai jutcucunapimi Gomorrata jatun mandacpish, Sodomata jatun mandacpish chai macanacuimanta miticushpa callpacushpaca urmarca. Shuctac mandaccunaca urcucunapimi miticurca.

¹¹ Chai macanacuita atishpaca, Sodomapi, Gomorrapi ima tiyashcacunatapish, micunatapish apashpami rircacuna.

¹² Abrampac sobrino Lotca Sodomapimi causarca. Chaipi cacpimi, paita prezushpa, pai ima charishcacunatapish apashpa rirca.

¹³ Chai macanacuimanta miticushpa shamuc shuc runami Lotta prezushcata hebreopuramanta Abramman huillac shamurca. Abramca amorreopuramanta Mamrepac encina yuracuna tiyac pambapimi causarca. Mamreca Escolpac, Anerpac huauquimi carca. Paicunaca Abrampac yuyaitami charirca.

¹⁴ Abramca paipac sobrinota prezushcata yachashpami, paipac huasipi huacharishca paita servic quimsa patsac chunga pusac runata tandachishpa, Lotta prezuccunataca Dan llactacaman catirca.

¹⁵ Ña tuta cacpimi, Abrampish, paipac serviccunapish cungailla japishpa macarca. Cashna macashpami, Damascomanta jahuaman saquiric Hoba llactacaman catirca.

¹⁶ Chashnami paipac familia Lottapish, paipac imalla charishcacunatapish, familiapac huarmicunatapish, shuctac runacunatapish tucui quichushpa apamurca.

Melquisedec Abramta bendiciashcamanta

¹⁷ Abram Quedarlaomertapish, caishuc jatun mandaccunatapish atishpa macashpa cutimucpica, Sodomamanta jatun mandacca Save pambapimi tupangapac rirca. Chai pambataca jatun mandacpac pamba nincunami.

¹⁸ Chaipimi Salem llactata jatun mandacpish, jahua pacha Diospacta ruhuac Melquisedec curapish tandata, vinota llucchishpa:

¹⁹ llucchishpaca: «Jahua pachata, cai pachata ruhuac Dios canta bendiciachun.

²⁰ Canta piñaccunata cambac maquipi churac, jahua pachapi causac Diosca alli nishca cachun» nirca. Chaimantami Abramca tucui quichushcacunamanta chungamanta shucta Melquisedecman curca.

²¹ Chai quipami, Sodoma pueblota jatun mandacca Abramtaca: —Gentecunata ñucaman cui, imata quichushcacunataca can apailla— nirca.

²² Shina nicpimi, Abram Sodoma pueblota jatun mandactaca: —Can: “Ñucami cantaca chayucyachini” ama nichunmi, jahua pachatapish, cai pachatapish ruhuac Mandac Diosman

²³ “Ñucaca shuc puchcallatapish, shuc ushuta huatanallatapish mana japishachu” nishpa ari nircani.

²⁴ Ñucaca, ñucahuan cac quipa huiñai huambracuna micushcallamantami imata mana cutichina cani. Aner, Escol, Mamremi paicuna japina cashcataca japinga— nirca.