GÉNESIS 13 - Dios Rimashcata Quillcashcami

Abramhuan, Lothuan raquirinacushcamanta

¹ Abramca Egiptomantaca paipac huarmita pushashpa, tucui charishcata apashpami, Neguev llactaman huichai rirca. Shinallatac Lotpish paihuanmi rirca.

² Abramca yalli chayuc cashpami, curitapish, cullquitapish, animalcunatapish achcata charirca.

³ Pai Neguevmanta cutishpaca, ashancaman rishpami, Bet-el puebloman chayarca. Chashnami Bet-el pueblo, Hai llacta chaupipi, ñaupaman carpa huasi cashcallamantac chayarca.

⁴ Ñaupaman altarta ruhuashcallamantac chayashpami, Mandac Diosta mañarca.

⁵ Abramhuan ric Lotpish achca ovejacunata, vacacunata, carpa huasicunatami charirca.

⁶ Chaimantami michina allpaca mana pactarca. Chaillapitac ishcaita causanataca mana pudircachu.

⁷ Abrampac michiccunaca Lotpac michiccunahuanmi piñanacuc carca. Shinallatac cananeocunapish, ferezeocunapish chaillapitacmi causarca.

⁸ Chashna cacpimi, shuc punzha Abramca Lotta cayashpaca: «Ñucanchicca huasi ucupurami canchic. Ñucanchicpura mana piñanacunachu canchic. Shinallatac ñuca michiccunapish cambac michiccunahuan mana piñanacunachu can.

⁹ Cai tucui allpaca cambac ñaupallapitacmi. Chaimanta ñucamanta raquirichunmi munani. Can lluqui maqui ladoman ricpica, ñucaca alli maqui ladomanmi risha, cutin can alli maqui ladoman ricpica, ñucaca lluqui maqui ladomanmi risha» nirca.

¹⁰ Shina nicpimi, Lotca huichailla ricushpaca, Jordán tucui pambata ricurca. Chai pambaca Edén huerta shina, parcuc yacuyuc, shinallatac Mandac Dios manarac Sodomata, Gomorrata tucuchicpi, Zoar llacta chimba ladopi cac Egipto llacta shinami carca.

¹¹ Chaimantami Lotca tucui Jordán pambata acllashpa, inti llucshina ladoman rirca. Shinami caishuc chaishuc raquirinacurca.

¹² Abramca Canaanpimi causai callarirca. Cutin Lotca chai pugru pambapi tiyac llactacunapimi Sodoma pueblocaman caipi chaipi carpa huasicunata shayachishpa, causai callarirca.

¹³ Sodomapi causaccunaca millai gentecuna, mancharina juchacunata ruhuashpa, Mandac Diosta piñachiccunami carca.

¹⁴ Lotmanta raquirishca quipami Mandac Diosca Abramtaca: «Can maipi cashcamanta uratapish, jahuatapish, inti llucshina ladotapish, inti tigrana ladotapish ricui.

¹⁵ Tucui can ricushca allpataca tucui causaipacmi canmanpish, cambac huahua huahuacunamanpish cusha.

¹⁶ Cambac huahuacunataca ñuto allpata shinami, achcata mirachisha. Ñuto allpata maijan yupai pudishpaca, cambac huahua huahuacunatapish yupangami.

¹⁷ Jatarishpa, llactacunata sunimanpish, anchomanpish purishpa ricugri, canmanmi chai allpataca cugrini» nirca.

¹⁸ Shina nicpimi, Abramca carpa huasicunata apashpa, encina yuracuna tiyac Mamre pambapi causagrirca. Chaica Hebrón pueblo cuchullapimi carca. Chaipimi Mandac Diosman shuc altarta ruhuarca.