GÉNESIS 12 - Dios Rimashcata Quillcashcami

Dios Abramta cayashcamanta

¹ Mandac Diosca Abramtaca: «Cambac allpamantapish, familiamantapish, cambac taitapac huasimantapish llucshishpa, ñuca ricuchigricuc allpaman ri.

² Cambac huahua huahuacunataca shuc jatun llactatami ruhuasha. Canta bendiciashpami, cambac shutitapish tucuipac alli nishcata ruhuasha. Canmantami bendiciashca cangacuna.

³ Canta alli niccunataca alli nishami, mana alli niccunataca mana alli nishachu. Canmantami tucui cai pachapi causaccunaca bendiciashca canga» nirca.

⁴ Mandac Dios nishca shinami, Abramca Haranmanta rirca. Lotpish paihuanmi rirca. Abramca canchis chunga pichca huatayuc cashpami, Haranmantaca llucshirca.

⁵ Abramca paipac huarmi Saraitapish, huauquipac churi Lottapish, chaipi randishca runacunatapish pushashpa, Harán llactapi imata ruhuashcamanta japishcatapish apashpa, Canaanman chayarca.

⁶ Abramca chai llactata rishpami, Siquem llactacaman chayashpa, Moré nishca encina yura ladoman chayarca. Chai llactapica cananeocunami causarca.

⁷ Chaipimi Mandac Dios Abramman ricurishpaca: «Cambac huahua huahuacunamanmi cai allpataca cusha» nirca. Chaipimi Abramca paiman ricurishca Mandac Diosman shuc altarta ruhuarca.

⁸ Chaimantaca Bet-el pueblomanta inti llucshic lado urcuman rishpami, shuc carpa huasita shayachirca. Chaipica Bet-el puebloca inti tigrana ladoman, cutin Hai llactaca inti llucshina ladomanmi saquirirca. Chaipimi cutinllatac shuc altarta ruhuashpa, Mandac Diosta mañarca.

⁹ Chaimantaca Abramca ashancaman rishpami, Neguev llactaman chayarca.

Abram Egiptoman rishcamanta

¹⁰ Chai llactapi yalli yarcai tiyashcamantami Abramca Egiptopi causangapac rirca.

¹¹ Abram Egiptoman chayagricushpami, paipac huarmi Saraitaca: «Riqui, canca sumac huarmimi cangui.

¹² Egipto runacuna canta ricushpaca: “Cai huarmica paipac huarmimi” nishpami, ñucataca huañuchishpa, cantaca mana huañuchinga.

¹³ Cunanca, canmanta tucui alli cachun, shinallatac ñucata ama huañuchichunca canca: “Ñucaca paipac panimi cani” ningui» nirca.

¹⁴ Abram Egiptoman chayacucpica, Egipto runacuna Sarai huarmita ricushpaca, mai sumac cashcatami ricurca.

¹⁵ Jatun mandac Faraón churashca mandaccunapish: “Mai sumac huarmimi” nishpami, Saraitaca Faraonpac huasiman pusharca.

¹⁶ Faraonca Saraimantami Abramtaca cuyarca. Chaimantami ovejacunatapish, vacacunatapish, burrocunatapish, camellocunatapish, servic caricunatapish, servic huarmicunatapish curca.

¹⁷ Ashtahuanpish Mandac Diosca Abrampac huarmi Saraimantami Faraontapish, paipac huasi ucupi causaccunatapish llaquichirca.

¹⁸ Chaimantami Faraonca Abramta cayashpaca: «¿Ima nishpatac caita ruhuangui? ¿Ima nishpatac cai huarmitaca cambac huarmi cashcata mana huillarcangui?

¹⁹ ¿Ima nishpatac canca: “Ñuca panimi” nircangui? Chaimantami ñuca huarmi cachun munarcani. Cunanca cambac huarmita pushashpa rilla» nirca.

²⁰ Chaimantami Faraonca Abramtapish, paipac huarmitapish, tucui pai charishcacunandi llucchishpa cachachun paipac gentecunata mandarca.