GÉNESIS 11 - Dios Rimashcata Quillcashcami

Babel torreta shayachishcamanta

¹ Cai pachapi causaccunaca shuclla rimaitami rimac carca.

² Inti llucshina llactamanta llucshishpaca, Sinar llactapimi shuc jatun pambata tarishpa, chaipi causai callarirca.

³ Paicuna yuyarinacushpaca: «Jacuchic, ladrillota ruhuashpa, ninapi cusashunchic» ninacurca. Chashnami paicunaca rumipac randica ladrillohuan, turupac randica asfaltohuan ruhuarca.

⁴ Chai quipaca: «Cunanca, shuc pueblotapish, jahua pachaman alto shuc torretapish chayachingapac jacuchic. Shina ruhuashpami, mana caita chaita rishpa, cai pachapica tucui gentecunapac alli nishca causashun» ninacurca.

⁵ Chaimantami Mandac Diosca runacuna ruhuacuc pueblotapish, jatun torretapish ricungapac urai shamurca.

⁶ Mandac Diosca: «Paicunaca shuc shinalla tucushpami shuc rimaillata charincuna. Chaimantami caita ruhuanata callarishca. Cai ruhuaitaca imapish mana jarcai pudingachu.

⁷ Cunanca, paicunapac rimaita chican chicanta ruhuangapac urai rishunchic. Shina ruhuacpimi, caishuc chaishuc imata rimacushcata mana entendingacuna» nirca.

⁸ Chashnami Mandac Diosca paicunata cai pachapi caita chaita cachashpa, chai llactata ruhuanata saquichirca.

⁹ Mandac Diosca paicunapac rimaita chican chicanta ruhuashpami, chai llactataca Babelta shutichirca. Chai llactamantami tucui cai pachata shic-huarishpa causagrirca.

Sempac huahua huahuacunamanta

¹⁰ Caicunami Sempac huahua huahuacunaca. Semca yacu juizhu tucurishca ishcai huata quipa, patsac huatayuc cashpami, Arfaxad churita charirca.

¹¹ Semca Arfaxad churita charishca quipaca, pichca patsac huatata causashpami churicunatapish, ushicunatapish charirca.

¹² Arfaxadca quimsa chunga pichca huatayuc cashpami, Sela churita charirca.

¹³ Arfaxadca Sela churita charishca quipaca, chuscu patsac quimsa huatata causashpami churicunatapish, ushicunatapish charirca.

¹⁴ Salaca quimsa chunga huatayuc cashpami Heber churita charirca.

¹⁵ Salaca Heber churita charishca quipaca, chuscu patsac quimsa huatata causashpami churicunatapish, ushicunatapish charirca.

¹⁶ Heberca quimsa chunga chuscu huatayuc cashpami, Peleg churita charirca.

¹⁷ Heberca Peleg churita charishca quipaca, chuscu patsac quimsa chunga huatata causashpami churicunatapish, ushicunatapish charirca.

¹⁸ Pelegca quimsa chunga huatayuc cashpami, Reu churita charirca.

¹⁹ Pelegca Reu churita charishca quipaca, ishcai patsac iscun huatata causashpami churicunatapish, ushicunatapish charirca.

²⁰ Reuca quimsa chunga ishcai huatayuc cashpami, Serug churita charirca.

²¹ Reuca Serug churita charishca quipaca, ishcai patsac canchis huatata causashpami churicunatapish, ushicunatapish charirca.

²² Serugca quimsa chunga huatayuc cashpami, Nacor churita charirca.

²³ Serugca Nacor churita charishca quipaca, ishcai patsac huatata causashpami churicunatapish, ushicunatapish charirca.

²⁴ Nacorca ishcai chunga iscun huatayuc cashpami, Taré churita charirca.

²⁵ Nacorca Taré churita charishca quipaca, patsac chunga iscun huatata causashpami churicunatapish, ushicunatapish charirca.

²⁶ Tareca canchis chunga huatayuc cashpami Abram, Nacor, Harán churicunata charirca.

Tarepac huahua huahuacunamanta

²⁷ Tarepac huahua huahuacunaca: Abram, Nacor, Haranmi carca. Haranca Lot churitami charirca.

²⁸ Haranca paipac taita Taré manarac huañucpimi, pai huacharishca caldeocuna causana Ur llactapi huañurca.

²⁹ Abrampish, Nacorpish cazararcami. Abrampac huarmica Saraimi carca. Cutin Nacorpac huarmica Milcami carca. Haranca Milcapacpish, Iscapacpish taitami carca.

³⁰ Saraica mana huahuata chari pudic cashpami, mana huahuayuc carca.

³¹ Tareca paipac churi Abramtapish, paipac nieto Lottapish, paipac nuera Saraitapish pushashpami, caldeocuna causana Ur llactamanta llucshirca. Shinami Harán llactaman chayashpa, chaipi causai callarirca.

³² Tareca ishcai patsac pichca huatata causashpami, Harán llactapi huañurca.