GÉNESIS 10 - Dios Rimashcata Quillcashcami

Noepac huahua huahuacunamanta

¹ Noepac huahua huahuacunaca: Sem, Cam, Jafetmi carca. Paicunaca cai pachapi yacu juizhu tiyashca quipa charishca churicunami.

² Jafetpac churicunaca: Gomer, Magog, Madai, Javán, Tubal, Mesec Tirasmi carca.

³ Gomerpac churicunaca: Askenaz, Rifat, Togarmami carca.

⁴ Javanpac churicunaca: Elisa, Tarsis, Quitim, Dodanimmi carca.

⁵ Paicunaca mama cucha lado llactacunapimi causarca. Paicunaca quiquin rimaita rimashpami, paicunapac aillucunapuralla causarca.

⁶ Campac churicunaca: Cus, Mizraim, Fut, Canaanmi carca.

⁷ Cuspac churicunaca: Seba, Havila, Sabta, Raama, Sabtecami carca. Raamapac churicunaca: Seba, Dedanmi carca.

⁸ Cusca Nimrod churitami charirca. Paimi cai pachapica ñaupaca sinchi runa carca.

⁹ Nimrodca Dios ayudacpi, sacha animalcunata japinata alli yachacmi carca. Chaimantami paitaca: «Nimrod shina sacha animalcunata japinata alli yachacmari» nincuna.

¹⁰ Callaripica Nimrodca Sinar llacta Babel, Erec, Acad, Calne llactacunatami mandacurca.

¹¹ Cai llactamantaca Asiria llactaman rishpami, Nínive, Rehobot, Cala llactacunata shayachirca.

¹² Nínive llactahuan, Cala pueblohuan tupanacuipica Resén jatun llactatami shayachirca.

¹³ Mizraimca Ludim, Anamim, Lehabim, Naftuhim,

¹⁴ Patrusim, Caftorim, Casluhim churitami charirca. Casluhimmantami filisteocunaca mirarirca.

¹⁵ Canaanca ishcai churitami charirca. Punta churica Sidón, quipa churica Hetmi carca.

¹⁶ Shinallatac jebuseocunapish, amorreocunapish, gergeseocunapish,

¹⁷ heveocunapish, araceocunapish, sineocunapish,

¹⁸ arvadeocunapish, zemareocunapish, hamateocunapish Canaanpac huahua huahuacunapurallatacmi carca. Chai quipami cananeocunaca caita chaita rishpa, causai callarirca.

¹⁹ Cananeocunapac llactaca Sidonmanta Gerar ladota rishpa, Gaza llactacamanmi carca. Shuc ladomanca Sodoma, Gomorra, Admacamanmi carca. Shinallatac Seboimantaca Lasa llactacamanmi carca.

²⁰ Caicunami Campac huahua huahuacunaca carca. Paicunaca aillupuralla quiquin rimaita rimashpa, quiquin allpapi, quiquin llactapimi causarca.

²¹ Jafetpac punta huauqui Sempish churicunata charircami. Semca Heberpac huahua huahuacunapac punta taitami carca.

²² Sempac churicunaca: Elam, Asur, Arfaxad, Lud, Arammi carca.

²³ Arampac churicunaca: Uz, Hul, Geter, Masmi carca.

²⁴ Arfaxadca Sala churitami charirca. Salaca Heber churitami charirca.

²⁵ Heberca ishcai churitami charirca. Punta churitaca chai punzhacunapi cai pachapi chicanyarinacui tiyashcamantami Pelegta shutichirca. Paipac huauquica Joctanmi carca.

²⁶ Joctanca Almodad, Selef, Hazar-mavet, Jera,

²⁷ Adoram, Uzal Dicla,

²⁸ Obal, Abimael, Seba,

²⁹ Ofir, Havila, Jobab churicunatami charirca. Tucui paicunami Joctanpac churicuna carca.

³⁰ Paicuna causana llactaca Mesa llactamanta Sefar llactaman, inti llucshina jatun urcucunacamanmi carca.

³¹ Paicunami Sempac huahua huahuacunaca carca. Paicunaca aillupuralla quiquin rimaita rimashpa, quiquin allpapi, quiquin llactapimi causarca.

³² Caicunami Noepac churicunapac aillucunaca carca. Paicunaca quiquin llactacunallapitac ima shina mirarishca shinallatacmi causarca. Paicunamantami cai pachapi yacu juizhu tucurishca quipaca caita chaita rishpa, llacta tucushpa causarca.