GÉNESIS 1 - Dios Rimashcata Quillcashcami

Cai pachata Dios ruhuashcamanta

¹ Imapish manarac tiyacpimi, Diosca jahua pachatapish, cai pachatapish ruhuarca.

² Cai pachaca chushaclla, manchaipac pura, imaman ricchapish mana carcachu. Diospac Espiritullami caiman chaiman yacu jahuapi cuyuricurca.

³ Chashna cacpimi Diosca: «Achic tiyachun» nirca. Shina nicpica, achic tucurcallami.

⁴ Diosca chai punzhataca alli cashcatami ricurca. Shinami punzhataca puramanta chicanyachirca.

⁵ Chai achictaca «Punzha» nishpami shutichirca. Shinallatac purataca «Tuta» nishpami shutichirca. Chashnami chishiyashpa punta punzha tucurca. Chashnami callari punzhaca saquirirca.

⁶ Chai quipaca Diosca: «Cai pacha yacuta uraman jahuaman shuc chicanyachic tiyachun» nirca.

⁷ Chashnami Diosca shuc parte yacutaca jahuaman, shuc parte yacutaca uraman chicanyachicta ruhuarca. Chashnami saquirirca.

⁸ Chai chicanyachictaca Diosca «Jahua pacha» nishpami shutichirca. Chashnami chishiyashpa, ishcainiqui punzha tucurca.

⁹ Shinallatac Diosca: «Chaquishca allpa tiyachun, cai pacha yacuca shucllaman tandarichun» nirca. Shina nicpica, chashnatacmi saquirirca.

¹⁰ Quipaca chai chaquishcataca «Allpa» nishpami shutichirca. Tandarishca yacutaca «Mama cucha» nishpami shutichirca. Diosca chaitaca alli cashcatami ricurca.

¹¹ Chai quipami Diosca: «Cai allpapica granota, muyuta pucuc tucuilaya quihuacunapish, yuracunapish huiñachun» nirca. Shina nicpica, chashnatacmi saquirirca.

¹² Chashna nicpica, chashnami allpapica verdinlla quihuapish, imalaya pucuc quihuapish, muyuta cuc yurapish huiñashpa pucurca. Chashnami imalaya muyupish chai yuracunapi tiyarca. Diosca chaitaca alli cashcatami ricurca.

¹³ Chashnami chishiyashpa, quimsaniqui punzha tucurca.

¹⁴ Chai quipami Diosca: «Punzhacunapish, huatacunapish tiyashcata yachangapac tutahuan punzhahuan chicanyachic achicyachiccuna tiyachun.

¹⁵ Cai pachata achicyachichunca jahua pachapi shuc achicyachic tiyachun» nirca. Shina nicpica, chashnatacmi saquirirca.

¹⁶ Diosca ishcai jatun achicyachiccunatami ruhuarca. Shuc jatun achicyachictaca punzha achicyachichun, uchilla achicyachictaca tuta achicyachichunmi ruhuarca. Shinallatac lucerocunatapish ruhuarcami.

¹⁷ Cai achicyachiccunataca cai allpata achicyachichunmi, Diosca jahua pachapi churarca.

¹⁸ Chaicunataca punzhapish, tutapish achicyachichun, shinallatac amsamanta achicta chicanyachichunmi ruhuarca. Diosca chaitaca alli cashcatami ricurca.

¹⁹ Chashnami chishiyashpa, chuscuniqui punzha tucurca.

²⁰ Chai quipami Diosca: «Yacupi causac animalcunapish tiyachun, jahuata volac animalcunapish chicanyachishca jahua pachapi tiyachun» nirca.

²¹ Diosca mama cuchapi jatun manchana animalcunatapish, tucui causaiyuc animalcunatapish ruhuarcami. Yacupi causac animalcunapish, volac animalcunapish miranacuchunmi chaipurallata ruhuarca. Diosca chaitaca alli cashcatami ricurca.

²² Dios chai animalcunata bendiciashpaca: «Achcata mirashpa, achca tucushpa, mama cuchapi jundarichun shinallatac jahuata volac animalcunatapish, cai pachapi achca tucushpa jundarichun» nircami.

²³ Chashnami chishiyashpa, pichcaniqui punzha tucurca.

²⁴ Chai quipami Diosca: «Allpapica tucuilaya animalcuna, sacha animalcunapish, pambata aisarishpa puric animalcunapish, chaipuralla miranacuchun» nirca. Shina nicpica, chashnatacmi tucurca.

²⁵ Diosca allpapi tiyac sacha animalcunatapish, pambata aisarishpa puric animalcunatapish, charina animaltapish chaipurallatami ruhuarca. Diosca chaitaca alli cashcatami ricurca.

²⁶ Shinallatac Diosca: «Ñucanchic shina cachun, shuc runata ruhuashun. Mama cuchapi causac animalcunapish, jahuata volac animalcunapish, sacha animalcunapish, charina animalcunapish, allpata aisarishpa puric animalcunapish paipacmi canga» nirca.

²⁷ Diosca pai shinatami runataca ruhuarca. Chashnami caritapish, huarmitapish ruhuarca.

²⁸ Dios paicunata bendiciashpaca: «Achcata mirarishpa, achca tucushpa, cai pachapi jundarichic, shinallatac cazuchichic. Mama cuchapi tiyac challuacunatapish, jahuata volac animalcunatapish, tucui cai pachapi tiyac animalcunatapish mandaichic» nirca.

²⁹ Chai quipami Diosca: «Riquichic, cai allpapi tiyac muyuta pucuc yuracunatapish, micuna granota pucuc granotapish, muyuta cuc yuracunatapish cunimi. Tucui caicunamantami micui pudinguichic.

³⁰ Allpapi tiyac sacha animalcunaman, jahuata volac animalcunaman, tucui causaiyuc animalcunaman, allpata aisarishpa puric animalcunamanca verdinlla quihuatami cuni» nirca. Chashnami tucurca.

³¹ Diosca tucui pai ruhuashcacunataca mai alli cashcatami ricurca. Chashnami chishiyashpa, suctaniqui punzha tucurca.