GÁLATAS 5 - Dios Rimashcata Quillcashcami

Mana cutin huatashca shina tucunamanta

¹ Ama huatashca shina causachunmi, Cristoca ñucanchicta cacharichirca. Shina cashcamanta ama cutinllatac huatashca shina tucunata yuyaichicchu.

² ¡Uyaichic! Ñucaca cancunapac ricsishca Pablomi cashna nini: Cancuna circuncisionta ruhuashpa caticucpica, Cristo imata ruhuashcaca yangamantami canga.

³ Chaimantami cutinllatac nini: Maijanpish circuncisionta ruhuaccunaca mandashcacunatami tucui pactachina can.

⁴ Maijan cancunapurapi mandashcacunata pactachishpalla Dios-huan alli tucushun nishpaca, Cristomanta caruyashpami Dios mai cuyashcamantapish chicanyarishcacuna.

⁵ Shina cacpipish ñucanchic crishcallamanta, shinallatac Diospac Espíritu imatapish ruhuaclla cashcamantaca, Dios-huan alli tucuna yuyaillami canchic.

⁶ Shina cashcamanta Cristo Jesus-huan shuc shinalla cashpaca, circuncisionta ruhuashca cashpa, mana ruhuashca cashpapish mana ima canchu, ashtahuanpish Cristota criccuna cashcamanta cuyanacushpa causanami ashtahuan alli.

⁷ Cancunaca allimi caticurcanguichic. Cashcata nic huillashcata cazushpa caticucpica, ¿pitac cancunataca saquichun nircayari?

⁸ Cancunata cayac Diosca mana chashna cachun munanchu.

⁹ Ashalla levadurami tucui chaputa punguillichin.

¹⁰ Jesucristohuan shuc shinalla tucushcamantaca, cancuna mana pandarina cashcatami yachani. Diosca maijan pandachishpa purictaca, pita cashpapish llaquichingami.

¹¹ Cuyashca criccuna, ñuca cancunaman “circuncisionta ruhuanaca allimi” nishpa puricpica, judiocunaca mana piñanmanchu carca, shinallatac Jesucristo ñucanchicmanta cruzpi huañushcata huillashcapish ña mana paicunata piñachinmanchu.

¹² “Circuncisionta ruhuanaca allimi” nishpa pandachishpa puriccunataca, ¡paicunapactarac tucui pitishpachari alli canman ninimi!

¹³ Cuyashca criccuna, cancunataca ña ama huatashca shina causachunmi cayarca. Cunanca “ña mana huatashca shinachu canchic” nishpaca, imapish mana alli munaicunataca ama ruhuanguichicchu. Chaipac randica caishuc chaishuc-huan cuyanacushpa, ayudanacushpa causaichic.

¹⁴ Moisés mandashcacunata tandachishcapica: «Can ima shinami cuyaringui, shinallatac shuccunatapish cuyangui» ninmi.

¹⁵ Cancunaca piñanacushpa, caishuc chaishuc llaquichinacushpaca chingaringuichicmi.

Mana alli munaicunamantapish, Diospac Espíritu yuyaita cushcamantapish

¹⁶ Chaimantami cancunataca: “Diospac Espíritu munashca shina causaichic, millai munaicunataca ama ruhuaichicchu” nini.

¹⁷ Millai munaicunaca Diospac Espiritupac munaitaca piñanmi. Diospac Espiritupish millai munaicunataca piñanllatacmi. Chashna ishcaimanta mana apanacuc cashcamantami, ima munashcatapish mana ruhuai pudinguichic.

¹⁸ Shina cacpipish Diospac Espíritu cancunata pushacucpica, mandashcacunaca ña mana mandacunchu.

¹⁹ Millai munaicunata ruhuaccunataca ricunallami. Paicunaca huainayaccunami, imapish millaita ruhuaccunami, imapish munana viciota ruhuaccunami,

²⁰ ruhuashcalla dioscunata adoraccunami, brujocunami, pitapish mana allichu nishpa piñaccunami, macanacuccunami, celaccunami, imamantapish jahualla piñariccunami, piñanacuipi churaccunami, gentecunata chicanyachiccunami, ñucanchiclla cashun niccunami,

²¹ shuccuna ama charichun nishpa munaccunami, huañuchiccunami machaccunami, yalli micunallata munaccunami, shinallatac shuctac chashnalaya mana allita ruhuaccunami. Cancunataca utcaman nishca shinallatacmi: “Chashna ruhuaccunaca Dios mandacucpica imata mana charingachu” nishpa, cutinllatac nini.

²² Ashtahuanpish Diospac Espíritu yuyaita cushca causaccunaca cuyaccunami, cushi causaccunami, sumacta causaccunami, mana utca piñariccunami, llaquiccunami, cuccunami, Diospi shunguta churaccunami,

²³ mana jatun tucuccunami, shinallatac mana allimanta jarcariccunami. Chashna causaccunataca mana allichu nic mandashcaca mana tiyanchu.

²⁴ Maijanpish Cristohuan caccunaca cai pacha jucha munaicunandi, imapish mana alli yuyaicunandimi chacatashca shina causacun.

²⁵ Diospac Espiritumanta causacushpaca, Diospac Espiritullatac yuyaita cushpa pushachun saquishunchic.

²⁶ Ñucanchicpurapica ama jatun tucushun, ama shuccunahuan piñanacushun, shinallatac shuccuna charishcata ama munashunchic.