GÁLATAS 4 - Dios Rimashcata Quillcashcami

¹ Shinallatac caitapish nisha ninimi: Shuc huahuaca taitapac tucui charishca paipac cacpipish, huahuarac cashpaca shuc servic shinallami.

² Taita ima punzhamanta “chai charishcata ricungui” nishcacamanmi, shuccuna chai huahuataca yachachishpa mandancuna.

³ Chai shinami ñucanchicpish huahuacuna shina cashpaca, cai pachapi imapish ruhuanacunallata cazushpa, huatashca shina causacurcanchic.

⁴ Shina cacpipish cachana punzha pactacpimi, Diosca shuc huarmimanta huacharichun paipac Churitaca cacharca. Paica Moisés mandashcacunataca tucuitami cazushpa causarca.

⁵ Paica mandashcacunata ñucanchic pactachishpa huatashca shina causacushcamanta cacharichishpa, Diospac huahuacuna tucuchunmi shamurca.

⁶ Ñucanchic ña paipac huahuacuna cacpica, Diosca paipac Churipac Espiritutami ñucanchic shunguman cacharca. Chai Espiritumi: “Ñuca Taitalla” nishpa mañachun ñucanchictaca yuyachicun.

⁷ Shina cacpica cancunapish ña mana huatashca shina serviccunachu canguichic, ashtahuanpish Diospac huahuacunami canguichic. Paipac huahuacuna cashcamantami, Dios munashcamanta pai cusha nishcata japiccuna canguichic.

Huatashca shina causanamanca ama tigrachun nishpa, Pablo rimashcamanta

⁸ Cancunaca Diosta ñaupaman mana ricsishcamantami, manapish dioscunata cazushpa serviccuna carcanguichic.

⁹ Cunanca Diosta ricsiccunami canguichic, ashtahuancarin Diosmi cancunata ricsin. ¿Shina cashca jahuachu cutinllatac imapish mana valic, yanga ruhuanacunallata cazushpa, huatashca shina causashun ninguichic?

¹⁰ Cancunaca acllashca punzhacunatapish, quillacunatapish, cushicuna punzhacunatapish, shinallatac huatacunatapish yupashpa huacaichiccunami canguichic.

¹¹ Ñucaca cancunaman ima yachachishcapish yanga cana cashcatami manchani.

¹² Cuyashca criccuna, ñucaca cancuna shinami tucurcani. Chaimantami cancunapish ñuca shina tucuchun mañani. Cancuna ñucaman ima mana allita ruhuashcataca mana yuyanichu.

¹³ Callaripi alli huillaita cancunaman huillacushpaca, ungushca cashpami huillarcani. Chaitaca cancunallatacmi yachanguichic.

¹⁴ Ñuca ungushca cashcamanta mana chasquipac cacpipish, mana millarcanguichicchu, mana piñarcanguichicchu. Chaipac randica Diospac angelta shina, shinallatac Cristo Jesusta chasquic shinami ñucataca chasquircanguichic.

¹⁵ ¿Utcaman cushi cashcataca ñachu cungarircanguichic? Utcamanca ima shina ñahuita llucchishpa cunalla cacpica, llucchishpa cunguichicmanmi carcanguichic. Cancuna chashna cashcataca ñucallatacmi alli yachani.

¹⁶ ¿Cancunaman cashcata huillashcamantachu ñucataca piñanguichic?

¹⁷ Chai gentecunaca cancunatami paicunapura tucuchun munancuna. Shina cacpipish paicunapac yuyaica mana allichu. Paicunaca cancuna ñucanchicmanta raquirishpa, paicuna yachachishcata uyachunmi munancuna.

¹⁸ Shuccuna alli yuyaicunahuan cacpica, paicunapura tucunaca allimi. Chashnaca mana ñuca cancunahuan cacllapichu alli can, ashtahuanpish tucui punzhacunami chashna ruhuana can.

¹⁹ Cuyashca huahuacuna, cutinllatacmi shuc huarmi sajuarina nanaihuan llaquita apacuc shina, cancunamanta llaquita apacuni. Cancuna Cristo causashca shina causangacamanmi llaquita apacushalla.

²⁰ Chaimantami cunanllata cancunapacman rishpa, ñuca imata yuyacushcata sumacta rimana yuyaihuan cani. Cancunata imata ninata mana yachanichu.

Agar, Sara huarmi ima shina causashcata yachachishcamanta

²¹ Mandashcacunata cazushpa causanaca allimi niccunamanmi caita tapuni: ¿Manachu cancunaca Moisés mandashcacuna imata nicushcataca yachanguichic?

²² Chaipica Taita Abrahamca ishcai churicunatami charirca. Shuctaca paipac servic huarmihuan, shuctaca quiquin huarmihuan ninmi.

²³ Chai servic huarmihuan charishca huahuaca shuctac huahuacuna shinallatacmi tiyarca, ashtahuanpish paipac quiquin huarmihuan charishca huahuaca, Dios cusha nishcamantami tiyarca.

²⁴ Caica shuc alli yuyarinatami yuyachin: Ishcai huarmicunaca ishcai ari nishcatami ricuchin. Agar huarmica Sinaí urcupi cushca ari nishcatami ricuchin. Maijanpish chaipac caccunaca huatashca shina cangapacmi huacharin.

²⁵ Agarca Arabia llactapi tiyac Sinaí urcutami nisha nin. Chai urcuca Jerusalenpi causaccunatapish, huatashca shina causacuc tucui paipac huahuacunatapish nisha ninmi.

²⁶ Ashtahuanpish jahua pachapi tiyac Jerusalenca mana huatashca shinachu. Ñucanchicca paipac huahuacunami canchic.

²⁷ Dios quillcachishcapica: «¡Mana huicsayuc tucuc, mana huahuata charic huarmi cushicui! ¡Sajuarina nanaita mana charic huarmi cushicushpa asiyari! Cusayuc huarmita atishpami, shitashca cac huarmica ashtahuan huahuacunata charinga» ninmi.

²⁸ Cuyashca criccuna, ñucanchicca Isaac shinami, Dios cusha nishca huahuacuna canchic.

²⁹ Chashna cacpica huahuacuna tiyac shina tiyashca huahuaca, Diospac Espiritumanta tiyashca huahuatami mana ricunayachishpa llaquichirca. Chashnallatacmi cunanpish tucun.

³⁰ Ashtahuanpish Dios quillcachishcapica, ¿imatatac nin? Chaipica: «Huatashca shina cac huarmitaca paipac huahuandi llucchishpa cachai. Chai huarmipac huahuaca quiquin huarmipac huahuahuan japina cashcataca mana pacta pacta japingachu» ninmi.

³¹ Shina cashcamanta cuyashca criccuna, ñucanchicca huatashca shina cac huarmipac huahuacuna shinaca mana canchicchu, ashtahuanpish cacharishca shina quiquin huarmipac huahuacuna shina canchic.