GÁLATAS 2 - Dios Rimashcata Quillcashcami

Jesús acllashca caishuc huillaccunapish Pablota chasquishcamanta

¹ Chunga chuscu huata quipami Bernabehuan cutin Jerusalén puebloman ricushpaca, Titotapish apashpa rircani.

² Chaimanca Dios “rinami cangui” nicpi, rishpami criccunata pushaccunallahuan tandanacushpa ñuca punta huillacushcapish, cunan huillacushcapish ama yanga cachun nishpa mana israelcunaman quishpirinamanta huillacushcataca allita yachachircani.

³ Chashna yachachicpica ñucahuan shamuc Titotaca mana Israel cacpipish, mana pi circuncisionta ruhuachun mandarcachu,

⁴ ashtahuanpish mandashcacunamanta cacharirishpa, Jesucristohuan shuc shinalla tucushpa causacucta ricungapacllami, “cricmi canchic” nishpa maijancunaca pacalla yaicurcacuna. Paicunaca paicuna shina mandashcapi huatashca shina causachunmi munancuna.

⁵ Cashcata nic alli huillaita cancuna mana pandarishpa alli catichunmi, paicuna ima nishcataca ashallatapish mana uyashun nircanchic.

⁶ Chai pushaccunaca alli nishca cashpapish, ima mushuc yachanacunataca mana yachachircacunachu. Chaimantami paicuna utcaman catic cashcapish ñucamanca ima mana canchu. Diosca mana ñahuita ricushpallachu chasquin

⁷ Mushuc yachanacunata cunapac randica, Dios Pedrota israelcunaman huillachun cachashca shina, ñucatapish mana israelcunaman quishpirinamanta alli huillaita huillachun cachashcatami yachac chayarcacuna.

⁸ Pedrota israelcunapacman huillachun cachac Diosllatacmi, ñucatapish mana israelcunaman huillachun cacharca.

⁹ Chaimantami criccuna alli nishca Pedropish, Jacobopish, Juanpish Dios ñucata cuyashpa, mana israelcunaman alli huillaita huillachun cachashcata yachac chayarcacuna. Ñucapish, Bernabepish paicuna shina huillaccuna cachunmi apanacuita ricuchishpa ñucanchicca mana israelcunaman, paicunaca israelcunaman huillagrina cashcata ricuchishpa maquita curcacuna.

¹⁰ Shinallatac huacchacunatapish yuyarichunmi nircacuna. Chaitaca tucui shunguhuanmi pactachina yuyailla cani.

Antioquía pueblopi Pedrota Pablo sinchita rimashcamanta

¹¹ Antioquía puebloman Pedro chayacpica, pai mana allita ruhuacushcamantami ñahui ñahui sinchita rimarcani.

¹² Jacobo cachashcacuna manarac chayacpica, Pedroca mana israelcunahuanpish micucllami carca. Shina cashpapish “circuncisionta ruhuanaca allimi” niccuna chayacpica, paicunata manchashpami mana israelcunahuan micunata saquishpa raquirircalla.

¹³ Pedro chashna mana shuc yuyailla tucushpa, mana allita ruhuacta ricushpaca, caishuc cric israelcunapish chai shinallatacmi mana allita ruhuarcacuna. Shinallatac Bernabecamanmi pandarishpa mana allita ruhuarca.

¹⁴ Chaimantami cashcata nic huillashca shina mana ruhuacushcamantaca, tucui tandanacushca criccunapac ñaupapi Pedrotaca: «Canca Israel cashca jahuami, mana Israel shina causacungui. ¿Chashna cashca jahuachu, mana israelcunataca israelcuna shina causachun ningui?» nircani.

Israelcunapish, mana israelcunapish crishpa quishpirinamanta

¹⁵ Ñucanchicca huacharishcamanta pachami israelcuna canchic. Mana israelcuna shina juchayucmi nishcaca mana canchicchu.

¹⁶ Shina cacpipish Moisés mandashcacunata pactachishcallamantaca, Diosca pitapish mana paihuan alli tucuchun chasquinchu, ashtahuanpish Jesucristota crishcallamantami paihuan alli tucuchun chasquin. Chaitaca yachanchicmi. Chaimantami ñucanchicpish mana Moisés mandashcacunata pactachishcallamanta, ashtahuanpish Jesucristota crishcallamanta Dios-huan alli tucushca cangapac crishcanchic.

¹⁷ Jesucristota crishcallamanta Dios-huan alli tucunata munashpaca, ñucanchicpish juchayuc cashcatami ricuchinchic. Shina cacpica, “¿Jesucristomi ñucanchicta juchata ruhuachicun” nishunchu? ¡Chashnaca mana ninachu canchic!

¹⁸ Tucui mana allicunata chingachishca jahua cutinllatac chai yuyaicunata charishpaca, ñucallatacmi juchallini.

¹⁹ Mandashcacunata ruhuangapacca huañushca shinami cani. Shina cashpapish mandashcallatacmi Diospaclla causachun mandarca.

²⁰ Ñucaca Cristohuanmi chacatashca shina cani. Ña mana ñucallachu causacuni, ashtahuanpish Cristomi ñucapica causacun. Cunan aichapi causacushpapish Diospac Churita crishpami causani. Paica ñucata cuyashpami, ñucamanta huañurca.

²¹ Dios mai cuyashcataca mana yangapichu churani. Mandashcacunata pactachishpalla Dios-huan alli tucuna cacpica, Cristo huañushcaca yangamantami canman.