GÁLATAS 1 - Dios Rimashcata Quillcashcami

Galacia llactapi causac criccunaman Pablo quillcashcamanta

¹ Ñucaca mana gentecunalla acllashca, ni cachashca, ashtahuanpish Diospish, pai causachishca Jesucristopish huillachun cachashca Pablomi cani.

² Tucui caipi cac criccunahuan tucushpami, Galacia llactapi causac tandanacushca criccunataca:

³ Ñucanchic Diospish, Apunchic Jesucristopish mai cuyashpa, cancunamanca sumac causaita cushca cachun ninchic.

⁴ Jesucristoca ñucanchic juchacunamanta huañushpami, cai millai pachamanta quishpichishpa, ñucanchic Dios munashcata pactachirca.

⁵ ¡Chaimanta Diosca huiñaita alli nishca cachun! Chashna cachun.

Quishpirinamanta alli huillaica shuclla tiyana cashcamanta

⁶ Jesucristo mai cuyashcamantami, Diosca cancunataca acllarca. Chaimantami cancuna shuctac yachachishcata catishpa, Diosmanta utca caruyacushcata yachashpaca mancharini.

⁷ Quishpirina alli huillaimanta ashtahuan shuctac alli huillaica mana tiyanchu. Ashtahuanpish cancunataca pandachingaraicumi, maijancunaca Cristomanta alli huillaitaca shuctaclayaman yachachishun nincuna.

⁸ Shina cacpica ñucanchic cancunaman huillashca alli huillaita shuctaclayaman huillactaca ñucanchic cacpipish, jahua pachamanta shamuc ángel cacpipish Dios llaquichishca cachun.

⁹ Ñaupaman nishca shinallatacmi cutin nini: ¡Maijanpish quishpirinamanta huillashpa, cancuna ña uyashcamanta shuctaclayaman huillactaca Dios llaquichishca cachun!

Pablo ima shina Jesusmanta huillai callarishcamanta

¹⁰ Chashna nishpaca gentecunalla alli nichunca mana munanichu, ashtahuanpish Dios alli nishca canatami munani. Gentecunalla ñucata alli nichun nishpaca, ña mana Cristopacta ruhuacchu caiman.

¹¹ Cuyashca criccuna, quishpirinamanta ñuca huillashca alli huillaica mana gentecunapac yuyaillamanta cashcatami yachachunmi nini.

¹² Caitaca mana gentecunamantachu chasquircani, mana pimantachu yachacurcani, ashtahuanpish Jesucristomi ñucamanca ricsichirca.

¹³ Ñuca ñaupaman israelcuna yachachishcata caticushpaca, Diospaclla tandanacushca criccunata yallita llaquichishpa, ima shinapish tucuchina yuyaihuan puricushcataca cancunallatacmi uyashcanguichic.

¹⁴ Ñaupa taitacuna yachachishcata allita huacaichic cashpami, israelcuna yachachishcata caticushpaca, ñucahuan huiñai israelcunata atishpa ashtahuan alli cazuc carcani.

¹⁵ Shina cacpipish ñuca manarac huacharicpimi, Diosca ñucata mai cuyashpa, chicanyachishpa acllarca. Chashna acllashpaca, pai munashca pachami

¹⁶ mana israelcunamanpish paimanta huillachun paipac Churitaca ñucaman ricsichirca. Shina ricsichicpimi, pimanpish mana tapurcani.

¹⁷ Shinallatac Jesús acllashca punta huillaccunata Jerusalén pueblopi ricungapacpish mana rircanichu, ashtahuanpish utcashpami Arabia llactaman rircani. Chaimantaca Damasco pueblomanmi cutimurcani.

¹⁸ Quimsa huata quipami Pedrota ricungapac Jerusalén puebloman rircani. Chaipica chunga pichca punzhatami paihuan carcani.

¹⁹ Chaipica Jesús acllashca caishuc huillaccunataca pitapish mana ricurcanichu, ashtahuanpish Apunchic Jesuspac huauqui Jacobollatami ricurcani.

²⁰ Dios ricucucpimi, mana llullashpa caicunataca quillcani.

²¹ Chai quipaca Siria llactaman, Cilicia llactamanmi rircani.

²² Chai punzhacunapica Cristota cric, Judea llactapi causac tandanacushca criccunaca ñucataca mana ñahui ñahui ricsircacunachu,

²³ ashtahuanpish ñucataca: «Ñaupamanca ñucanchicta llaquichishpa tucuchisha nicca, cunanca Jesucristota crinamantami paipish huillacun» nicllatami uyarcacuna.

²⁴ Chaimantami ñucamantaca Diosta “allimari cangui” nircacuna.