FILIPENSES 1 - Dios Rimashcata Quillcashcami

Filipos pueblopi causac criccunaman quillcashcamanta

¹ Ñucanchicca Apunchic Jesucristopacta ruhuaccuna cashpami, Pablohuan Timoteohuan tucushpa, Filipos pueblopi causac tandanacushca criccunata pushaccunaman, ayudaccunaman, shinallatac Jesucristohuan shuc shinalla tucushca, Diospaclla cac tucui criccunamanpish caita quillcashpa cachanchic.

² Ñucanchicta cuyac Diospish, Apunchic Jesucristopish tucui cancunata mai cuyashpa, sumac causaita cushca cachun ninchicmi.

Pablo criccunamanta Diosta mañashcamanta

³ Cancunata yuyarishpaca, ñuca Diostami pagui nicunilla.

⁴ Diosman ñuca mañacushpaca, tucui cancunamantami cushicuihuan mañani.

⁵ Cancunaca callari punzhamanta pachami, quishpirinamanta alli huillaita ñuca huillacucpica, cunancaman ñucahuan pacta allita ruhuacushcanguichic.

⁶ Cancunapi callarimanta pacha allita ruhuac Diosca Jesucristo cutimuna punzhacaman, chai allita ruhuashpa catina cashcatami yachani.

⁷ Shungupi cancunata charicushcamanta ñuca cashna yuyanaca allillatami. Ñucaca prezu cashpapish, mandaccunapac ñaupapi cashpapish pipish ama yangapi churachunmi: “Quishpirinamanta alli huillaica, chaica chashnatacmari” nishpa huillani. Tucui cancunapish Dios cushcamantami, ñuca shina alli huillaita huillacunguichic.

⁸ Jesucristo cuyac shinallatac, ñuca tucui shunguhuan cancunata cuyacushcataca Diosllatacmi yachan.

⁹ Cancunamanta ñuca Diosta mañacushpaca, ashtahuan cuyaita charichun, shinallatac alli entendishpa Diosmanta allita yachac cachunmi mañani.

¹⁰ Chashna cashpami imapish allicunallata acllashpa, chaicunata ruhuashpa, Cristo cutimuna punzhapica mana juchanchishca canguichic.

¹¹ Cancuna Jesucristollamanta alli grano pucuc shina allita ruhuacpimi, Diostaca “allimari cangui, sumacmari cangui” ningacuna.

Cristopaclla causana cashcamanta

¹² Cuyashca criccuna, caitami yachachun munani: Cashna ñucata carcelpi churacpica, ashtahuanmi alli huillaica maipipish uyarishca.

¹³ Chaimantami ñuca Cristota caticushcamanta caipi prezu cactaca, jatun mandacpac soldadocunapish, tucui caipi caccunapish yachancuna.

¹⁴ Shinallatac ñuca caipi prezu cacta yachashpami, maijancunalla saquirishpa achca criccuna ashtahuan sinchi cric tucushpa, Apunchic Jesusmanta mana manchashpa, Diosmanta alli huillaita huillacuncuna.

¹⁵ Maijancunaca ñuca shina huillac casha nishpa, piñanacungaraicullami Cristomantaca huillancuna. Chashna cacpipish maijancunaca alli shungumantami huillancuna. Chaica chashnatacmi.

¹⁶ Alli shungumanta huillaccunaca: “Quishpirinamanta alli huillaica chashnatacmari” nishpa huillachun Dios ñucata acllashcata yachashpami, cuyaihuan huillancuna.

¹⁷ Ashtahuanpish mana alli shungumanta huillaccunaca, paicuna alli cashcata ricuchingapacllami nic tucushpalla huillancuna. Chashna huillashpaca, ñuca carcelpi cacpipish ashtahuanmi llaquichishun nincuna.

¹⁸ Alli shunguhuan cashpa mana alli shunguhuan cashpapish, Cristomantami huillacuncuna. Chaimantami maijancuna llaquichina yuyaihuan huillacucpipish, ñucaca cushicuni. Shinallatac ashtahuanmi cushicusha.

¹⁹ Cancuna ñucamanta Diosta mañacushcamantapish, Jesucristopac Espíritu ñucata ayudashcamantapish, caimanta llucshina cashcata alli yachashpami, cashnaca cushicuni.

²⁰ Imamanta mana pingaichishca canatami, ñuca tucui shunguhuan munani. Shinallatac ñuca causaipi ima ruhuashcacunahuan, ñuca huañushca quipapish Cristoca tucuipac alli nishca cachunmi munani. Chaimantami cunanpish, tucui punzhacunapish paimanta mana manchashpa huillasha nini.

²¹ Chaimanta ñuca causacushpaca, Cristopacmi causani. Huañushpaca, japina cashcatami japisha.

²² Ashtahuanpish causashcacamanca, Cristopacta ruhuanami alli. Chashna cashcamanta maijanta acllanatapish mana pudinichu:

²³ Huañunapish, causanapish allimi. Shina cacpipish shuc yuyaipica, Cristohuan causagringapac huañushca caiman yuyanimi. Chaimi tucuimanta yalli allica.

²⁴ Ashtahuanpish cancunamanca, cai pachapi ñuca causashpa catinami tucuimanta yallica alli canman.

²⁵ Chashna cacpimi cancuna crishpa ashtahuan cushicushpa sinchiyachunca, manarac huañushpa cancunahuan causanaca alli cashcatatac yuyani.

²⁶ Chashna causacushparac cancunapacman cutimucpimi, Cristo Jesus-huan shuclla tucushcacunaca ñucamanta ashtahuan cushicunguichic.

²⁷ Tucuimanta yallica Cristomanta alli huillaita cazushpa, chai yuyailla alli causachunmi munani. Ñuca cancunata ricungapac ricpipish mana ricpipish, alli huillaita crinamanta pi ima nicucpipish, macanacuipi shayaric shina, tucui mashna shuc yuyailla alli caticushcatami cancunamantaca uyasha nini.

²⁸ Cancunata piñaccunataca ama manchanguichicchu. Cancuna mana manchashpa huillashpaca, paicunaca chingarinalla cashcata, shinallatac cancunaca quishpirishca cashcatami ricuchinguichic. Tucui chaica Diosmantami.

²⁹ Dios cancunata acllashpaca, mana Cristota crichunllachu acllashca, ashtahuanpish paimanta llaquita apachunpish acllarcami.

³⁰ Ñuca ima shina llaquita apactaca, cancunaca ñami ricurcanguichic. Cunanpish llaquita ñuca apacushcataca yachanguichicmi. Chashnami cancunapish, ñucapish alli huillaimantaca llaquita apana cacpipish, mana manchashpa caticunchic.