FILEMÓN 1 - Dios Rimashcata Quillcashcami

Filemonman Pablo quillcashcamanta

¹ Jesucristomanta prezu japishca Pablomi, Jesusmanta huauqui Timoteondi, ñucanchic shina Diospacta ruhuac cuyashca Filemonman caita quillcashpa cachanchic.

² Shinallatac cambac huasipi tandanacuc criccunamanpish, Jesusta crishcamanta pani Apyamanpish, ñucanchic shina mana manchashpa huillac Arquipomanpish quillcanchicmi.

³ Ñucanchic Diospish, Apunchic Jesucristopish cancunata mai cuyashpa, sumac causaita cushca cachun ninchicmi.

Filemonca Jesucristota alli cric, cuyac cashcamanta

⁴ Diosta mañacushpaca canta yuyarishpami Diostaca pagui nicunilla.

⁵ Cantaca Apunchic Jesusta alli cric, shinallatac Diospaclla cac tucui criccunatapish cuyac cashcatami uyani.

⁶ Ñucanchic crishcata shuccunaman huillachun, shinallatac Dios cushca allicunata Jesucristomanta chasquishcatapish alli entendichun nishpami, canmantaca Diosta mañacuni.

⁷ Cuyashca huauqui, cambac cuyaihuanmi Diospaclla cac tucui criccunataca cushichishcangui. Chaimantami ñucapish cushicushpa, Diospacta ruhuana yuyailla cani.

Onesimota Filemón chasquichun nishpa, Pablo mañashcamanta

⁸ Ñucaca Cristo acllashca huillac cashcamantaca, can imapish alli caipactaca ruhuachun mandai pudini.

⁹ Chashna cashpapish ñucanchic cuyanacushcamantami, canmanca cuyaihuan mañani. Ñucaca ña yuyacmi cani. Cunancarin Jesucristomanta prezu japishcami tiyacuni.

¹⁰ Ñuca caipi prezu cacpimi, Onesimoca Jesucristota crishpa ñuca huahua shina tucurca. Cunanca paita alli chasquichunmi mañani.

¹¹ Ñaupamanmi Onesimoca mana allita ruhuac carca. Cunanca canmanpish, ñucamanpish allita ruhuacmi.

¹² Paitaca cambacllamantacmi cachani. Ñucata chasquic shinallatac, paitaca chasquiyari.

¹³ Alli huillaita huillashcamanta ñuca prezu tiyacucpi cambac randi ñucaman allita ruhuachunmi, caipi saquirichun munani.

¹⁴ Chashna cashpapish can ima nishcata manarac yachashpaca, ñuca munaimantaca imata mana ruhuasha ninichu. Can ima allita ñucaman ruhuasha nishpaca, ama ñuca nishcallamanta ruhuanguichu, ashtahuanpish can munashca shina ruhuangui.

¹⁵ Onesimoca canmanta ashata caruyashpapish, cunanca huañungacamanmi canhuanca canga.

¹⁶ Cunanca ña mana cambac randishca runa shinachu, ashtahuanpish Jesusta crishcamantaca shuc cuyashca huauqui shinami ñucamanca tucushca. Cancarin yallimari cuyana cangui. Mana shuc yanga runalla shinachu cuyana cangui, ashtahuanpish Apunchic Jesusta cric cashcamantami, ashtahuan cuyana cangui.

¹⁷ Jesusta crishcamanta shuclla cashcamantaca ñucata chasquic shinallatac, paitaca chasquingui.

¹⁸ Pai ima mana allita ruhuashca cacpi, imata canman mana cutichishca cacpica, ñucata ningui. Paimantaca ñucami ricusha.

¹⁹ Caita rimacuc Pablollatac, caita quillcashpami cantaca: “Onésimo imata canman cutichina cashca cacpica, paimantaca ñucami cutichisha.” Can quishpirishcamanta ñucaman ima allicunata ruhuana cacpipish, chaitaca mana ninichu.

²⁰ Cuyashca huauqui, Jesusta cric cashcamanta ñuca nishcacunata ruhuashpa cui. Chashna ruhuashpa ñuca shunguta cushichishpami, Apunchic Jesucristomanpish allita ruhuangui.

²¹ Cai ñuca nishcata cazushpa, ashtahuan caicunamanta yallita ruhuana cashcata yachashpami, cai quillcata cachani.

²² Cancuna Diosta mañacushcamanta, “Diosca ñucata cutinllatac cancunapacman cachangami” nishpami shuyacuni. Chaimanta ñuca pozanatapish allichicungui nishpami mañani.

Tucuchingapac “allilla cashca cachun” nishcamanta

²³ Jesucristomanta prezu japishca huauqui Epafraspish, “allilla cashca cachun” nishpami cachan.

²⁴ Ñucahuan Diospacta ruhuac Marcospish, Aristarcopish, Demaspish, shinallatac Lucaspish “allilla cashca cachun” nishpami cachancuna.

²⁵ Ñucanchic Apunchic Jesucristoca paipac sumaimana cuyaita tucui cancunaman cushca cachun. Chashna cachun.