EZEQUIEL 9 - Dios Rimashcata Quillcashcami

Jerusalenta llaquichinamanta

¹ Chai quipa, ñucata sinchita caparishpaca: «¡Huañuchic runacuna maquipi macanacunata apashpa, cai pueblota chingachingapac shamucunmi!» nirca.

² Jahua lado pungutami sucta runa macanacunata apashca shamucuctami ricurcani. Paicunapac chaupipica lino churanata churashca quillcana tintata cinturapi apashcami shamucurca. Paicuna yaicushpaca, broncemanta ruhuashca altar cuchupimi shayarirca.

³ Israelcunata Mandac Diospac sumaimana achic nicucca querubinpac jahuamanta anchurishpami, Diospac huasi umbralpi tiyaringapac huichai rirca. Chaimantaca lino churanata churarishca, quillcana tintata cinturapi apashca runatami Mandac Diosca cayarca.

⁴ Mandac Diosca chai runataca: «Jerusalén chaupita rishpa, millaita ruhuashcamanta llaquirishpa, caparishpa huacacuccunapac frentepi shuc señalta churai» nirca.

⁵ Caishuc runacunata sinchita caparishpaca: «Cancunapish chai runata catishpa, pueblo chaupita rishpa huañuchigrichic. Paicunataca ama llaquinguichicchu, ama perdonanguichicchu.

⁶ Ñucapaclla huasipi caccunamanta callarishpa yuyaccunatapish, mosocunatapish, huarmicunatapish, huahuacunatapish tucui huañuchichic. Ashtahuanpish señalta chariccunapacmanca ama cuchuyanguichicchu» nirca. Shina nicpimi, Diospac huasi ñaupapi cac yuyaccunamanta callarishpa huañuchirca.

⁷ Cutinllatac runacunata rimashpaca: «Ñuca huasita mapayachichic. Huañushcacunata canzha pambapi montonashpa llucshichic» nirca. Shina nicpimi, paicuna chaimanta rishpaca, pueblopi causaccunata huañuchi callarirca.

⁸ Chai runacuna tucuita huañuchicucpica, ñucallami saquirircani. Chaimantami ñucaca pambacaman cumurishpa: «Ñucata Mandac Dioslla, can yallita piñarishpa, Jerusalenta llaquichicushpaca, chaipi causac saquirishca israelcunatapish, ¿tucuitachu chingachigringui?» nishpa mañarcani.

⁹ Shina mañacpimi paica: «Israelcunapish, Judá llactapi causaccunapish yallitami millaita ruhuashcacuna. Cai llactapica huañuchiccunami yalli tiyan, cai pueblopi causaccunaca millaita ruhuana yuyaillami. Paicunaca: “Mandac Diosca ñucanchicmanta anchurishcami, paica mana ricucunchu” nincunami.

¹⁰ Chaimantami paicuna millaita ruhuashca shinallatac paicunatapish llaquichisha. Manatac perdonashachu, manatac llaquishachu» nirca.

¹¹ Lino churanata churashca, quillcana tintata cinturapi charicuc runaca: «Can mandashca shinami tucuita pactachircani» nirca.