EZEQUIEL 7 - Dios Rimashcata Quillcashcami

Tucuchina punzha chayamunamanta

¹ Mandac Dios rimashpaca:

² «Huañunalla runa, Mandac Dios ñucaca israelcunataca: “¡Tucuchina punzhaca ñami chayamun! Muyundi llactamantami llaquica shamunga.

³ Cancuna tucurina punzhami ña chayamun. Ñuca yallita piñarishpami cancunata llaquichigrini. Cancuna imata ruhuashcata taripashpami llaquichigrini. Chashnami cancuna imata ruhuashcacunata cancunaman ricuchisha.

⁴ Ñucaca manatac perdonashachu, manatac llaquishachu. Ashtahuanpish cancuna ima shina millaita ruhuashpa causashcata cancunaman ricuchishpami llaquichisha. Shina ruhuacpimi, ñucataca Mandac Dios cashcata yachanguichic nini” ninmi ningui» nirca.

⁵ Mandac Dios rimashpaca: «¡Riquichic, jatun llaquimi catipi, catipi chayamugrin!

⁶ ¡Chaica cancunata tucuchigrinimi, tucuchigrinimi! ¡Llaquica ñami llaquichingapac chayamun! ¡Riquichic, ñamari shamucun!

⁷ ¡Llactapi causaccunalla, cancunata llaquichina punzhaca ñami chayamun! ¡Urcucunapi cushicushpa caparinapac randica, llaquihuan caparina punzhami chayamun!

⁸ Cunanllatacmi cancunata yallita llaquichishpa, ñuca piñarishcata pasachisha. Cancuna imata ruhuashcata taripashpami, cancuna millaita ruhuashcataca ricuchisha.

⁹ Ñucaca manatac perdonashachu, manatac llaquishachu. Ashtahuanpish cancuna millaita ruhuashcata taripashpami cancunaman ricuchisha. Shina ruhuacpimi, ñucataca Mandac Dios cashcata yachanguichic.

¹⁰ ¡Chai punzhaca chayamushcatacmi! Millaita ruhuanapish, jatun tucunapish yallitami mirashca.

¹¹ Millaita ruhuanaca yuracuna huiñac shinami mirashca. Paicunaca achca cashpapish, shucllapish mana saquirishpami tucui tucuringa. Ima charishcapish tucuimi chingaringa.

¹² Chai punzhapish, chai horaspish chayamushcami. Imata randishpapish ama cushicuchun, imata catushpapish ama llaquirichun. Ñuca piñarishpa cachashca llaquicunaca tucuitami llaquichinga.

¹³ Catucca unaita causashpapish pai catushcataca manatac cutin japi pudingachu. Millai runacunata llaquichinata yuyarishcata pactachishatacmi. Millaita ruhuashcamantaca huañungatacmi.

¹⁴ Macanacuiman llucshingapac trompetapi tocacpipish, pi mana llucshingachu. Tucuitami ñuca yallita piñarishpa llaquichisha.

¹⁵ Canzhapica jatun macanacuimi tiyanga. Ucupica ungüipish, yarcaipish tiyangami. Campopi caccunaca jatun macanacuipi, pueblopi caccunaca yarcaihuan, ungüihuanmi huañunga.

¹⁶ Maijan llaquimanta quishpirishcacunaca pambapi causac paloma shinami, urcucunapi miticugringa. Chashnami paicunallatac millaita ruhuashcamantaca huacashpa ringacuna.

¹⁷ Tucuipac maquimi fuerza illac tucunga. Changa mucucunapish yacu shina chucchunga.

¹⁸ Sharpa churanahuanmi llaquihuanpish, yalli manchaihuanpish tiyacunga. Tucuimi pingaihuan cangacuna, uma acchatapish pitiringami.

¹⁹ Paicunapac cullquitapish ñancunapimi shitanga. Curica imapac mana valic millanami tucunga. Mandac Dios ñuca piñarishca punzhapica paicunapac cullquipish, curipish mana quishpichingachu. Yarcaipish mana anchuringachu, micucpipish, huicsapica mana jundangachu. Cullquipish, curipish mitcachic shinami, millaita ruhuachirca.

²⁰ Sumac churanacunata churarishpami, jatun tucurca. Chaicunallahuantacmi millana dioscunatapish ruhuarca. Chaimantami chaicunataca imapac mana valic millanata ruhuarcani.

²¹ Paicunapac charishcacunatapish mana ricsishca gentecuna shuhuachunmi saquircani. Ñucata mana manchac gentecuna quichuchunmi saquircani.

²² Ñucaca paicunamanta anchurishami. Ñucapaclla huasitaca millaita ruhuaccuna yaicushpami yangata ruhuanga.

²³ Caipi causaccunaca llaquichina yuyai jundami, cai llactapi causaccunaca huañuchina yuyaillami. Chaimanta canca fierro cadenata ruhuangui.

²⁴ Paicunapac huasicunata quichuchunca, millai shuctac llacta gentecunatami pushamusha. Chashnami jatun tucushca gentecunataca chingachisha, paicunapac ruhuashcalla dioscunapac huasicunatapish yangatami ruhuasha.

²⁵ ¡Yalli manchaimi shamun! Cushi causaita mashcashpapish mana taringachu.

²⁶ Jatun llaquicunaca catipi, catipimi shamunga. Llaqui huillaccunapish catipi catipimi uyaringa. Ñuca ima nishcata huillactapish yangami mashcanga. Curacunapish mandashcacunata ña mana yachachingachu. Pushac yuyaccunapish mana cunangachu.

²⁷ Jatun mandacpish duelo churanatami churaringa. Pai churashca mandacpish, llaqui churanatami churaringa. Cai llactapi causaccunapac maquicunaca chucchungami. Paicuna imata ruhuashcata taripashpami llaquichisha. Chashna ruhuacpimi, ñucataca Mandac Dios cashcata yachangacuna» nirca.