EZEQUIEL 48 - Dios Rimashcata Quillcashcami

¹ Israelcunapac allpacunaca Dan aillupac allpamanta callarishpa, jahua lado Hetlón llactaman rina ñanta catishpa, Hamat, Hazar Enán llactaman yaicuna ñancamanmi canga. Damasco jahua ladomantaca Hamat llactacaman, inti llucshina ladomantaca inti tigrana ladocamanmi canga.

² Dan aillupac allpa lindero ladopica, Aser aillupac allpami inti llucshina ladomantaca inti tigrana ladocaman canga.

³ Aser aillupac allpa lindero ladopica, Neftalí aillupac allpami inti llucshina ladomantaca inti tigrana ladocaman canga.

⁴ Neftalí aillupac allpa lindero ladopica, Manasés aillupac allpami inti llucshina ladomantaca inti tigrana ladocaman canga.

⁵ Manasés aillupac allpa lindero ladopica, Efraín aillupac allpami inti llucshina ladomantaca inti tigrana ladocaman canga.

⁶ Efraín aillupac allpa lindero ladopica, Rubén aillupac allpami inti llucshina ladomantaca inti tigrana ladocaman canga.

⁷ Rubén aillupac allpa lindero ladopica, Judá aillupac allpami inti llucshina ladomantaca inti tigrana ladocaman canga.

⁸ Judá aillupac allpa lindero ladopica, Diospac huasita ruhuangapac inti llucshina ladomantaca inti tigrana ladocaman chicanyachinguichic. Chai allpaca anchomanca chunga ishcai huaranga pichca patsac metro, largomanca caishuc allpacuna shinallatacmi canga. Chai chaupipimi Mandac Diospac huasica canga.

⁹ Mandac Diosman chicanyachishca allpaca largomanca chunga ishcai huaranga pichca patsac metro, anchomanca chunga huaranga metromi canga.

¹⁰ Chai chicanyachishca allpa ucupica curacunapac allpami canga. Chai allpaca jahua lado linderoca chunga ishcai huaranga pichca patsac metro, inti tigrana lado linderoca pichca huaranga metro anchomi canga. Cutin inti llucshina ladomanca pichca huaranga metro, ura ladomanca chunga ishcai huaranga pichca patsac metromi canga. Chai allpa chaupipimi Diospac huasica canga.

¹¹ Sadocpac huahua huahua curacunaca israelcuna ñucata saquishpa ricpipish, ñucata servishpami catirca. Paicunaca mana levita curacuna shina pandarircachu.

¹² Chaimantami paicunaca levita curacunapac ladollapitac allpataca japinga. Chai allpaca Mandac Diospaclla chicanyachishcami canga.

¹³ Levitacunapac allpaca Sadocpac churi curacunapac ladollapitacmi canga. Chai allpaca largomanca chunga ishcai huaranga pichca patsac metro, anchomanca pichca huaranga metromi canga.

¹⁴ Chai allpaca Mandac Diospaclla chicanyachishca, tucuimanta alli allpami. Chaimantami catunatapish, cambianatapish, shucman cunatapish mana pudinga.

¹⁵ Largomanca chunga ishcai huaranga pichca patsac metro, anchomanca ishcai huaranga pichca patsac metromi canga. Chai allpaca pueblota ruhuangapac, michina pambapacmi canga. Chai allpa chaupipimi puebloca canga.

¹⁶ Chai allpaca jahua ladomanpish, ura ladomanpish, inti llucshina ladomanpish, inti tigrana ladomanpish ishcai huaranga ishcai patsac pichca chunga metrotami canga.

¹⁷ Chai llacta muyundipi tiyac michina pambaca patsac ishcai chunga pichca metro anchomi canga.

¹⁸ Mandac Diospaclla chicanyachishca allpa ladopica pueblopi trabajaccuna tarpunami canga. Chai allpaca inti llucshina ladomanpish, inti tigrana ladomanpish pichca huaranga metro largomi canga.

¹⁹ Tucui chaipi trabajaccunaca Israel aillupuramantami canga.

²⁰ Largomanpish, anchomanpish chunga ishcai huaranga pichca patsac metro cuadrado allpaca Mandac Diospaclla huasipacpish, pueblopacpishmi canga.

Mandacpac allpamanta

²¹ Mandacpac allpaca Diospaclla huasitapish, pueblotapish ruhuangapac chicanyachishca allpa ladopimi canga. Chai allpaca inti llucshina ladomanca chunga ishcai huaranga pichca patsac metro, inti tigrana ladomanca chunga ishcai huaranga pichca patsac metromi canga. Chai ishcai ladopi cac allpacunami mandacpac canga. Chai allpa chaupipica Mandac Diospaclla huasimi canga.

²² Chai shinami mandacpac allpaca levitacunapac allpa ladomantaca pueblota ruhuana ladocaman, Judá aillupac linderomantaca Benjamín aillupac linderocaman canga.

²³ Caishuc aillucunapac allpamanta nishpaca, inti llucshina ladomanta inti tigrana ladocamanca Benjamín aillupacmi canga.

²⁴ Benjamín aillupac allpa lindero ladopica, Simeón aillupacmi inti llucshina ladomanta inti tigrana ladocaman canga.

²⁵ Simeón aillupac allpa lindero ladopica, Isacar aillupacmi inti llucshina ladomanta inti tigrana ladocaman canga.

²⁶ Isacar aillupac allpa lindero ladopica, Zabulón aillupacmi inti llucshina ladomanta inti tigrana ladocaman canga.

²⁷ Zabulón aillupac allpa lindero ladopica, Gad aillupacmi inti llucshina ladomanta inti tigrana ladocaman canga.

²⁸ Gad aillupac allpa linderoca ura ladota catishpa, Tamar llactamanta, Cades pueblopi tiyac Meriba yacucaman, Egiptohuan tupanacui yacuta catishpa, mama cuchacamanmi canga.

²⁹ Cai allpatami Israel aillucunaca suerteta ruhuashpa japinga. Caimi cancuna japina allpacuna can. Chaitaca Mandac Dios ñucami nini.

Jerusalén pungucunamanta

³⁰ Llactaman yaicuna pungucunaca: Jahua ladomanca ishcai huaranga ishcai patsac pichca chunga metromi canga.

³¹ Chaicunaca Israel aillucunapac shuticunahuanmi shutichishca canga. Jahua ladoman cac quimsa pungucunaca shucca Rubén, caishucca Judá, chaishucca Leví shutimi canga.

³² Inti llucshina ladoman cac pircaca huaranga ishcai patsac pichca chunga metromi canga. Chaipi cac quimsa pungucunaca shucca José, caishucca Benjamín, chaishucca Dan shutimi canga.

³³ Ura ladoman cac pircaca ishcai huaranga ishcai patsac pichca chunga metromi canga. Chaipi cac quimsa pungucunaca shucca Simeón, caishucca Isacar, chaishucca Zabulón shutimi canga.

³⁴ Inti tigrana ladoman cac pircaca ishcai huaranga ishcai patsac pichca chunga metromi canga. Chaipi cac quimsa pungucunaca shucca Gad, caishucca Aser, chaishucca Neftalí shutimi canga.

³⁵ Chai llacta muyundica iscun huaranga metromi canga. Chai punzhamanta pachami chai puebloca, ‘Mandac Diosmi cai llactapica’ nishpa shutichishca canga» nirca.