EZEQUIEL 47 - Dios Rimashcata Quillcashcami

Diospac huasimanta yacu llucshishcamanta

¹ Chaimantaca chai runaca Diospac huasi pungumanmi cutichimurca. Chaipica chai huasi pungu umbral ucumanta yacu llucshishpa, inti llucshina ladota ricuctami ricurcani. Diospac huasica inti llucshina ladomanmi carca. Chai yacuca Diospac huasi alli lado ucuta llucshishpami, altar ura ladota ricurca.

² Chai quipaca jahua lado punguta llucchishpami, tucui muyundita pushashpa, inti llucshina lado punguman pusharca. Chaipimi ura ladomanpish yacu llucshicucta ricurcani.

³ Chai runaca inti llucshina ladoman rishpami, cordelta japishpa, pichca patsac metrota medishpa, chai yacuta pasachirca. Chai yacuca sanpicamanmi carca.

⁴ Cutinllatac pichca patsac metrota medishpami, chai yacuta pasachirca. Chai yacuca mucucamanmi carca. Cutin pichca patsac metrota medishpa, chai yacuta pasachicpica, cinturacamanmi carca.

⁵ Cutinllatacmi pichca patsac metrota medirca. Chai yacu yallita mirashcamantami chaquillahuanca ña mana pasaipac carca. Ashtahuanpish nadashpallami pasana carca.

⁶ Chaipimi ñucataca: «Huañunalla runa, ¿caicunataca allichu ricurcangui?» nirca. Chaimantaca cutichimushpami, jatun yacu pataman pusharca.

⁷ Chaipica caishuc ladomanpish, chaishuc ladomanpish achca yuratami ricurcani.

⁸ Chaimantami ñucataca: «Cai yacuca inti llucshina lado llactamanmi ricun. Arabá pambata urai rishpaca, Cachi Cuchaman chayashpami, mishqui yacu tucunga.

⁹ Tucui causaita chariccuna cai yacupi yaicucpica, cai yacu maita pasacpipish, challuami yallita miranga. Cai yacuca mishquimi tucunga.

¹⁰ Shinallatac challuata japiccunapish chai yacu ladopimi canga. En-gadi llactamantaca En-eglaim llactacamanmi linchicunata tendinga. Mama cuchapi shinami tucuilaya achca challua tiyanga.

¹¹ Guzu yacucuna, cucha yacucunaca mana mishquichu tucunga, ashtahuanpish cachi yacumi saquiringa. Cachita llucchinallami canga.

¹² Cutin cai ishcai yacucuna patapica caishuc ladomanpish, chaishuc ladomanpish chican granocunata pucuc yuracunami huiñanga. Pangacunapish mana urmangachu, micunapish chai yuracunapica mana tucuringachu. Ashtahuanpish cada quillami mushuc granota pucunga. Chai yacucunaca Diospaclla huasimantami llucshicunga. Chaimantami chai yuracunapi granoca pucuna punzhacunallapitac pucunga. Granoca micungapac, pangacunaca jambiringapacmi alli canga.

Allpa linderocunamanta

¹³ Mandac Diosca: Chunga ishcai Israel aillucunaman allpata chaupishpaca, cai linderocunata churanguichic. Joseca ishcai parte allpatami japinga.

¹⁴ Cai allpataca caishucman, chaishucman cunguichic. Cai allpata ñaupa taitacunaman cungapacmi ari nircani. Chaimantami cai allpaca cancunapac canga.

¹⁵ Jahua lado linderoca mama cuchamantaca Hetlón llactaman rina ñanta catishpa, Zedadcaman canga. Liderocunaca

¹⁶ Berota shinallatac Sibrayin llactacamanmi canga. Simbraim puebloca Damascohuan, Hamathuan chaupipimi can. Shinallatac Haurán llacta linderopi cac Jazar-enán llactacamanmi canga.

¹⁷ Jahua lado linderoca mama cuchamantaca, Hazar Enán llactacamanmi canga. Damasco pueblopish Hamat llacta lindero jahua ladomanmi saquiringa.

¹⁸ Inti llucshina lado linderoca Haurán llacta, Damasco chaupita catishpa, Galaad llacta, Israel llacta chaupita catishpa, Jordán yacucamanmi canga. Inti llucshina ladopi cac jatun cucha patapi tiyac Tamar pueblocaman medinguichic. Shinami inti llucshina lado linderoca canga.

¹⁹ Ura lado linderoca Tamar llactamantaca Meriba yacucaman, Cades llactamanta Egipto llacta tupanacuipi tiyac yacuta catishpa, mama cuchacamanmi canga.

²⁰ Inti tigrana lado linderoca mama cuchamantaca Hamat llactaman yaicuna chimba ladocamanmi canga. Shinami inti tigrana lado linderoca canga.

Allpata chaupinamanta

²¹ Cai allpataca Israel aillucuna mashna cashcata ricushpa, tucuiman cunguichic.

²² Cai allpataca cancunamanpish, cancunahuan causac caru llacta gentecunamanpish, cancunapurapi charishca churicunamanpish, israelcunamanpish suerteta ruhuashpa cunguichic. Israel llactapi huacharishca huahuacunataca cancunapura cashca shinata yuyanguichic. Israel aillucunamanpish suerteta ruhuashpa cunguichic.

²³ Caru llactamanta shamuccuna maijan ailluhuan causacucpica, chaillapitac allpata cunguichic. Chaitaca Mandac Dios ñucami nini.