EZEQUIEL 46 - Dios Rimashcata Quillcashcami

Fiesta punzhapi imata ruhuanamanta

¹ Mandac Diosca: Inti llucshina ladoman cac ñucapac huasi ucu pambaman yaicuna punguca sucta punzhacamanmi huichcashca canga. Ashtahuanpish samana punzhapi, llullu quilla punzhapimi pascashca canga.

² Mandacmi canzha pamba punguta yaicushpa, ucu canzha pungu umbral ladopi shayaringa. Paica ñucaman cushca animalta tucui rupachingacaman, ñucahuan alli tucungapac ofrendata cungacamanmi pungu umbral ladopi shayacunga. Quipaca pungu umbral jahuapi cungurishpa, Diosta adorashpami llucshinga. Ashtahuanpish chai punguca tutayangacamanmi pascashca canga.

³ Cutin samana punzhapi, llullu quilla punzhapica cai llactapi causaccunami punguman shamushpa, Mandac Dios ñucapac ñaupapi adoranga.

⁴ Mandacca samana punzhapica mana ima tucushca sucta maltón ovejata, shuc carnero ovejatami Mandac Diosman cushpa, tucui rupachinga.

⁵ Cada carnero ovejahuanmi shuc efa harinata cunga. Maltón ovejahuanca mashnata charishca shinami cunga. Cada efa harinahuanca shuc hin aceitetami cunga.

⁶ Llullu quilla punzhapica mana ima tucushca becita, sucta maltón ovejata, shuc carnero ovejatami cunga.

⁷ Chai cada becihuan, cada carnero ovejahuanca shuc efa harinatami cunga. Maltón ovejacunahuanca mashnata charishca shinami cunga. Cada efa harinahuanmi shuc hin aceiteta cunga.

⁸ Ñucapaclla huasiman mandac yaicungapacca ucu pambaman yaicuna pungutami yaicunga, shinallatac chaillatatacmi llucshinga.

⁹ Ashtahuanpish cai llactapi causaccuna tandanacui punzhapi ñuca ñaupaman shamuccunamanta maijan jahua lado punguta yaicucca ura lado pungutami llucshinga. Ura lado punguta yaicucca jahua lado pungutami llucshinga. Mana yaicushcallatatac llucshinachu can.

¹⁰ Paicuna yaicucpica, mandacca paicunahuanmi yaicunga. Paicuna llucshicpica, paicunallahuantacmi llucshinga.

¹¹ Shinallatac fiesta punzhapipish, tandanacui punzhapipish shuc efa harinatami cada becihuan, cada carnero ovejahuan cunga. Cutin maltón ovejahuanca mashnata charishca shinami cunga. Shuc efa harinahuanca shuc hin aceitetami cunga.

¹² Ashtahuanpish mandacca pai munashcamanta mashnata charishca shina animalta cushpa rupachigricucpi, Mandac Dios ñucahuan alli tucungapac ofrendata cugricucpica, inti llucshina lado pungutaca pascangami. Chaita yaicushpaca, samana punzhapi ruhuac shinallatac, animalta tucui rupachina shinallatacmi alli tucungapac ofrendata cunga. Pai chaita ruhuashpa, llucshishca quipaca pungutami huichcanga.

Punzhanta Diosman cushpa animalta huañuchinamanta

¹³ Punzhanta mana ima tucushca shuc maltón ovejata Mandac Diosman cushpa, tucui rupachingui. Cada tutamanta animalta cushpa huañuchingui.

¹⁴ Chai maltón ovejahuanca shuc efa harinata suctapi chaupishcahuan cungui. Alli harinahuan chapungapacca shuc litro aceiteta cungui. Caicunaca Mandac Diosman huiñaita cuchun mandashcami.

¹⁵ Cada tutamanta maltón ovejatapish, shuc efa harinatapish, aceitetapish ñucaman cushpa tucui rupachingui.

Mandacpac japina cashcamanta

¹⁶ Mandac Dios cutinllatac rimashpaca: Maijan mandac allpata paipac churicunaman cucpica, chai allpaca paipac churicunapacmi canga. Paicunapac herenciami canga.

¹⁷ Ashtahuanpish maijan mandac allpata paita servicman cucpica, chai allpaca servishpa causana huata pactangacamanmi servic runapac canga. Cutichina huata pactacpica, mandacllamantacmi cutichinga. Chai allpaca churicunapacmi canga.

¹⁸ Mandacca chai llactapi causaccunapac allpataca mana quichunachu can. Paipac churicunamanca paipac allpatami cuna can. Shina ruhuacpimi, ñuca acllashcacunaca mana allpa illac saquiringa. Shucllapish paicunapac allpamantaca mana llucshinachu can” ninmi ningui» nirca.

¹⁹ Chai quipaca chai runaca ura lado pungu lado, curacunapac ucumanmi pusharca. Chai huashapica shuc ucutami ricurcani. Chaica inti tigrana ladomanmi carca.

²⁰ Chaimantaca: «Caipimi curacunaca juchamanta, mana allita ruhuashcamanta ñucaman cushca animal aichataca yanunga. Canzhaman mana llucchishpami, grano ofrendataca chai ucullapitac yanunga. Canzhaman llucshicpica, gentecuna ñucapaclla tucungami» nirca.

²¹ Chai quipaca canzha pambaman llucchishpami, chai pamba chuscu esquinacunata purichirca. Chaipica cada esquinacunapimi uchilla pamba tiyarca.

²² Chai huasi pungu pamba chuscu esquinacunapi cac pambaca muyundita pircashcami carca. Chai pambaca chuscu ladotami ishcai chunga metro largo, chunga pichca metro ancho carca. Chai pambaca chuscu ladotami chashnallatac medirca.

²³ Chai uchilla pambacunaca chuscu ladotami pircashca carca. Chai muyundi pirca ladopica nina japichinacunami tiyarca.

²⁴ Chaipica: «Cai huasipi servishpa causaccunaca Diosman cushca ofrendataca cai ucupimi yanunga» nirca.