EZEQUIEL 44 - Dios Rimashcata Quillcashcami

¹ Quipaca chai runaca inti llucshina ladoman cac Diospac huasi canzha pungumanmi pusharca. Chai punguca huichcashcami carca.

² Chaipimi Mandac Diosca: «Cai pungutaca israelcunata Mandac Dios ñucami yaicurcani. Chaimantami cai pungutaca pi mana yaicunga, shinallatac pi mana pascanga. Huichcashcallami canga.

³ Ashtahuanpish shuc mandacllami Mandac Dios ñucapac ñaupapi micungapac tiyaringa. Paica churanata huacaichina punguta yaicushpaca, chaillatatacmi llucshinga» nirca.

Maijanlla Diospac huasiman yaicunamanta

⁴ Chai quipaca Diospac huasi jahua lado pungutami chai huasi ñaupaman pusharca. Chaipimi Mandac Diospac sumaimana achic nicuc paipac huasipi jundashcata ricushpa, pambacaman cumurircani.

⁵ Chaipimi Mandac Diosca: «Huañunalla runa, ñuca huasipi ima ruhuanamanta ñuca canman huillashcatapish, mandashcacunatapish, allita uyashpa, allita entendingui. Ñucapac huasiman maijanlla yaicuna cashcata, maijanlla mana yaicuna cashcata alli yachacungui.

⁶ Chai mana cazuc israelcunata rimashpa: “Mandac Diosca: ¡Israelcunalla, chai tucui millaicunata ruhuanata saquichic!

⁷ Cancunaca shungupipish, aichapipish circuncisionta mana ruhuashca caru llacta gentecunatami ñuca huasiman yaicuchishpa mapayachircanguichic. Shinallatac huiratapish, yahuartapish, tandatapish cushpa rupachishpami, ñucahuan ari nishcata yangapi churarcanguichic.

⁸ Shinallatac ñucapaclla ruhuanacunata caru llacta gentecuna ruhuachunmi paicunaman curcanguichic.

⁹ Chaimantami Mandac Dios ñucaca: Israelcunapurapi causac shungupipish, aichapipish circuncisionta mana ruhuashca caru llacta gentecunaca manatac ñuca huasimanca yaicungachu nini.

¹⁰ Israelcuna ruhuashcalla dioscunata adorangapac ñucamanta caruyacta ricushpaca, levitacunapish ñucamanta caruyarcami. Chaimantami paicunapish llaqui tucunga.

¹¹ Paicunaca ñuca huasi pungucunata cuidashpami servinga. Paicunami tucui rupachina animalcunatapish, israelcuna ñucaman cushca animalcunatapish huañuchinga. Israelcunata servishpami causanga.

¹² Paicunaca ruhuashcalla dioscunata servishpami, israelcunata pandachirca. Chaimantami paicunata llaquichisha. Chaitaca Mandac Dios ñucami nini.

¹³ Levitacunaca mana curacuna shina, ñucata servic pudingachu. Ñucapaclla cashcacunapipish, ñucapaclla chicanyachishcacunapipish mana tupari pudingachu. Ashtahuanpish millaita ruhuashcamantaca pingaichishcami canga.

¹⁴ Paicunataca ñuca huasita cuidashpa, servichunmi churasha.

Curacuna imata ruhuana cashcamanta

¹⁵ Ashtahuanpish Sadoc curapac huahua huahua levita curacunaca, israelcuna ñucamanta caruyacpipish ñuca huasipi servishpami catirca. Chaimantami paicunaca ñucapaclla huasipi, ñucapac ñaupapi servishpa catinga. Ñucaman cushca huiratapish, yahuartapish ñuca ñaupapimi rupachinga. Chaitaca Mandac Dios ñucami nini.

¹⁶ Paicunami ñuca huasiman yaicushpa, ñuca mizaman cuchuyashpa ñucata servinga.

¹⁷ Ñuca huasi ucu pambamanca lino churanata churashcami yaicunga. Ñucapaclla huasi ucupi servingapac yaicushpaca, millma churanataca, mana churarinachu can.

¹⁸ Lino turbanteta umapi churarishca, lino calzoncillota churarishcami yaicunga. Imapish jumbichictaca cinturapica mana churarinachu can.

¹⁹ Canzha pamba gentecunapacman llucshishpaca, ñucata servingapac churarishca churanataca chicanyachishca ucucunapimi saquina can. Chai churanacunallahuantac llucshishpa, canzhapi cac gentecunata ñucapacllata mana ruhuangapacmi shuctac churanata churarina can.

²⁰ Uma acchatapish mana yallita pitinachu, yalli huiñachunpish mana saquinachu, ashtahuanpish ashallatami pitina can.

²¹ Ñuca huasi ucu pambaman yaicungapacca maijan curapish ama vinota ubiachun.

²² Curacunaca viuda huarmihuanpish, cusa shitashca huarmihuanpish ama cazarachun. Ashtahuanpish israelcunapuramanta carihuan manarac chayarishca solterahuan, mana cashpaca curapac huarmi cana viuda huarmihuan cazarachun.

²³ Ñuca acllashca gentecunataca imacunalla ñucapaclla cashcata, mana ñucapaclla cashcatami yachachina can. Shinallatac imacunalla mapa cashcata, mana mapa cashcatami ricuchishpa, yachachina can.

²⁴ Piñanacuicuna tiyacpica, curacunami ñuca mandashca shina taripashpa allichina can. Tucui jatun fiesta punzhacunapica ñuca mandashca shina, ñuca imata ruhuachun nishca shinami ruhuana can. Chashnami samana punzhacunatapish ñucapaclla cachun chicanyachina can.

²⁵ Huañushcapi tuparishpa ama mapayachun. Huañushcapica taita, mama, churi, ushi, huauqui, mana cashpaca, soltera pani cacllapimi tuparina can.

²⁶ Mapayashpaca armarinami can. Chai quipaca canchis punzhatami chuyayana can.

²⁷ Ñucata servingapac ñucapac huasi ucu pambaman yaicui punzhaca juchamanta animalta cushpa, ñucaman rupachichun. Chaitaca Mandac Dios ñucami nini.

²⁸ Curacuna japinaca ñucami cani. Israel llacta allpataca ama cunguichicchu. Ñucami paicuna causana allpa shinaca cani.

²⁹ Paicunaca ñucaman cushca grano ofrendata, juchacunamanta animalta cushcata, animalta rupachishcatami micunga. Israelcuna tucui ñucapaclla cachun chicanyachishcacunaca paicunapacmi canga.

³⁰ Shinallatac tucui punta pucushca granopish, ñucaman cushcacunapish paicunapacmi canga. Cancunapac huasicunapi ñuca bendiciachunca, alli harina masashcatami paicunaman cuna canguichic.

³¹ Curacunaca paicunallatac huañushca volac animalcunatapish, pamba animalcunatapish, mana cashpaca shuctac animalcunatapish mana micunachu can.