EZEQUIEL 43 - Dios Rimashcata Quillcashcami

Sumaimana achic nicuc Mandac Diospac huasipi jundashcamanta

¹ Chai quipaca inti llucshina ladoman cac pungumanmi ñucata pusharca.

² Chaipimi inti llucshina ladomanta Diospac sumaimana achic nicuc shamucta ricurcani. Chaica jatun yacu huaj nic shina shamushpami, cai pachata taparca.

³ Chai muscuipi shina ricushcaca Jerusalenta Mandac Dios llaquichicucta Quebar yacu patapi ñuca muscuipi ricushca shinami carca. Chaita ricushpaca, pambacamanmi cumurircani.

⁴ Mandac Diospac sumaimana achic nicucca inti llucshina lado punguta shamushpami, Diospac huasimanca yaicurca.

⁵ Chaimantaca Diospac Espiritumi chai huasi ucuman pusharca. Chaipimi Mandac Diospac sumaimana achic nicuc paipac huasi ucupi jundashcata ricurcani.

Diospac huasipi imacunallata ruhuana cashcamanta

⁶ Chai runa ñuca ladopi pacta shayacucpimi, Diospac huasimanta shuc rimashcata uyarcani.

⁷ Chaipi rimashpaca: «Huañunalla runa, caipimi ñuca tiyarinaca. Ñuca chaquicunataca caipimi samachisha. Caipimi israelcunahuan huiñaita causasha. Cunanca israelcunapish, jatun mandaccunapish ña mana huainayashpa, jatun mandac huañushca cuerpota lomacunapi tiyac altarcunapi churashpa, ñuca shutita mapayachingachu. Ruhuashcalla dioscunatapish ña mana ashtahuan adorangacunachu.

⁸ Israelcunaca paicunapac umbralcunatapish, pilarcunatapish ñuca huasi pungu umbral ladopi churashpami, ñuca jucha illac shutita yangapi churarca. Chaitaca, chai ladollapi shuc pircallata shayachishpami ruhuarca. Chaimantami ñucaca yallita piñarishpa tucuchircani.

⁹ Paicuna huainayanata saquicpi, jatun mandac huañushca cuerpocunata ñuca ladomanta anchuchicpica, paicunahuanmi huiñaita causasha.

¹⁰ Huañunalla runa, israelcunaman paicuna millaita ruhuashcamanta pingachun, cai huasitapish, cai huasi mashnata medic cashcatapish ricuchingui.

¹¹ Paicuna millaita ruhuashcamanta pingacpica, cai huasita ima shina ruhuana cashcata ricuchingui. Chaica, ima shina shayachinata, maita llucshinata, maita yaicunata ricuchingui. Shinallatac tucui yachachishcatapish, mandashcacunatapish, tucui imata ruhuanata cashcacunatapish pactachishpa causachun yachachingui.

¹² Diospac huasimanta mandashcapica: Jatun urcu loma allpaca tucui muyunditami Diospaclla canga» nicunmi nirca.

Altarta ruhuanamanta

¹³ Altar muyundi canalca chaupi metro ucu, chaupi metro anchomi carca. Altar callari muyundi molduraca ishcai chunga pichca centímetro anchomi carca. Altar chaqui muyundica,

¹⁴ chaquimanta jahua patacamanca shuc metro altomi carca. Cutin chaupi metro anchomi carca. Jahuamanta pambacamanca ishcai metromi carca. Cutin anchomanca chaupi metromi carca.

¹⁵ Rupachina pataca ishcai metromi carca. Altar jahua esquinacunapica chuscu gachumi tiyarca.

¹⁶ Chai altarca largomanpish, anchomanpish sucta metromi carca. Chuscu ladomanmi chashnallatac carca.

¹⁷ Chai altar chaquipi cac pataca largomanpish, anchomanpish canchis metromi carca. Chuscu ladomanmi chashnallatac carca. Chai muyundipica ishcai chunga pichca centímetro ancho llucshishcami carca. Chai muyundi canalca chaupi metro anchomi carca. Gradacunaca inti llucshina ladopimi carca.

¹⁸ Chai quipa cutin rimashpaca: «Huañunalla runa, Mandac Diosca: Animalta ñucaman cushpa tucui rupachingapac, yahuarta chai jahuapi chirapangapac altarta tucuchishca punzhapica caicunatami ruhuana can:

¹⁹ Sadoc curapac huahua huahua levita curacunami ñucata servingapac cuchuyanga. Paicunamanca juchacunamanta cushca shuc becita cungui.

²⁰ Chai yahuarta japishpa, altarpi tiyac chuscu gachucunapi, altar chaqui chuscu esquinapi, altar muyundipi chirapangui. Chashnami chuyayachina can.

²¹ Chai quipaca juchacunamanta cushca beci aichata ñucapac huasi ucumanta canzhaman llucchishpa, rupachina pushtupi rupachingui.

²² Cayandi punzhaca ima mana tucushca chivota juchacunamanta ñucaman cungui. Chai chivo yahuartaca beci yahuarta ruhuashca shinallatac altarpi chirapashpa, mapa illacta ruhuangui.

²³ Quipaca ima mana tucushca becita, shuc ovejata ñucaman cushpa rupachingui.

²⁴ Chaita cushca quipaca curacunami cachita churashpa, ñucaman cushpa tucui rupachinga.

²⁵ Canchis punzhacaman cari chivota, ima mana tucushca becita, maltón ovejata juchacunamanta ñucaman cushpa rupachingui.

²⁶ Altartaca canchis punzhacamanmi animalta rupachishpa, mapa illacta ruhuana can. Shina ruhuacpimi, chai altarca ñucapaclla saquiringa.

²⁷ Chai canchis punzha quipa, ña pusac punzha tucucpica, curacunami cancuna ñucaman cushca rupachinatapish, ñucahuan alli tucungapac cushcacunatapish rupachinga. Shina ruhuacpimi, cancunataca chasquisha. Chaitaca Mandac Dios ñucami nini» nirca.