EZEQUIEL 42 - Dios Rimashcata Quillcashcami

¹ Chai quipami jahua lado canzha pambaman pushashpa, chai pamba ñaupapi tiyac uchilla huasiman pusharca. Chai huasica Diospac huasi jahua ladomanmi carca.

² Jahua ladoman cac pungu ñaupaca largomanca pichca chunga metro, anchomanca ishcai chunga pichca metromi carca.

³ Chunga metrota medic ucu lado pamba ñaupapi, sumacta empedrashca canzha lado pamba ñaupapica quimsa altoyuc huasimi tiyarca. Chai quimsa altocunaca quimsatacmi chimbapurashca carca.

⁴ Chai huasicuna ñaupapica shuc corredormi tiyarca. Chai corredorca anchomanca pichca metro, largomanca pichca chunga metromi carca. Chai huasicunapac pungucunaca jahua ladomanmi carca.

⁵ Tucuri altoca callari altomantapish, chaupipi cac altomantapish ashtahuan quichquimi carca. Chaica corredorcuna yalli jatun cashcamantami chashna carca.

⁶ Chai quimsa altoyuc huasicunaca mana canzhapi tiyac huasicuna shina pilarcunata charircachu. Chaimantami callari altotapish, chaupipi tiyac altotapish atishpa, ashtahuan quichqui carca.

⁷ Uchilla huasicunapac ñaupapi cac canzha pamba pircaca ishcai chunga pichca metro largomi carca.

⁸ Jatun huasi canzha pamba ladoman cac huasicunaca ishcai chunga pichca metromi carca. Cutin Diospac huasi ladopi cac huasicunaca pichca chunga metromi carca.

⁹ Jatun huasi canzhapi cac huasicunamanca canzha pambatami yaicuna carca. Chai punguca inti llucshina ladomanmi carca.

¹⁰ Canzha pamba ñaupapi, Diospac huasi ñaupapica uchilla huasicunami tiyarca. Caicunaca ura ladomanmi carca.

¹¹ Chai uchilla huasicunapac ñaupapi tiyac corredorca jahua ladopi tiyac corredor shinallatacmi carca. Chashnallatacmi anchopish, largopish, llucshina pungucunapish, yaicuna pungucunapish carca.

¹² Ura ladopi tiyac huasicunapac pungupish, jahua ladopi tiyac huasi pungucuna shinallatacmi carca. Chai huasicunamanca inti llucshina lado pircapi cac pungutami yaicuna carca.

¹³ Chai runaca ñucataca: «Jahua lado, ura lado canzha pambapi cac huasicunaca Diospacllami. Chai huasicunapimi Mandac Diospacman cuchuyac curacunaca Diospaclla chicanyachishca ofrendacunata micunga. Chaipimi juchacunamanta cushcacunatapish, pandarishcamanta cushca animalcunatapish huacaichinga. Chai ucucunaca Diospaclla chicanyachishcami canga.

¹⁴ Curacunaca Diospaclla ucumanta canzha pambamanca mana chai churanallahuantac llucshinachu can. Ashtahuanpish Diospacta ruhuangapac churanacuna Diospaclla cashcamantami, chai churanata ucullapitac saquishpa, shuctac churanata churarishpa gentecunapacmanca llucshina can» nirca.

¹⁵ Diospac huasi ucuta medishca quipaca, inti llucshina ladopi cac punguta llucshishpami, tucuita muyundita medirca.

¹⁶ Medina caspihuan inti llucshina lado muyundita medicpica, ishcai patsac pichca chunga metromi carca.

¹⁷ Jahua lado muyunditapish medircami. Chaica ishcai patsac pichca chunga metromi carca.

¹⁸ Ura ladoca ishcai patsac pichca chunga metromi carca.

¹⁹ Chai quipaca inti tigrana lado muyunditami medirca. Chaica ishcai patsac pichca chunga metromi carca.

²⁰ Chashnami chuscu ladotatac medirca. Chai pircaca largomanpish, anchomanpish ishcai patsac pichca chunga metromi carca. Chai pircami Diospaclla huasihuan, gentecuna purina pambahuan chicanyachic carca.