EZEQUIEL 41 - Dios Rimashcata Quillcashcami

¹ Chai quipaca Diospac huasi ucumanmi pusharca. Chaipimi, chaipi cac pilarcunata medirca. Chai pilarcunaca caishuc ladomanpish, chaishuc ladomanpish quimsa metro anchomi carca.

² Punguca pichca metro anchomi carca. Pungu quingraicunaca cada ladomi ishcai metro chaupi carca. Diospac huasi ucuca anchomanca chunga metro, largomanca ishcai chunga metromi carca.

³ Chai quipaca Diospaclla chicanyachishca ucuman yaicushpami, pungu pilarcunata medirca. Chai pilarcunaca ishcai ladotami shuc metro carca. Yaicunapish, pungupish quimsa metro anchomi carca. Pungu quingraicunaca cada ladomi quimsa metro chaupi carca.

⁴ Diospaclla chicanyachishca ucuca largomanpish, anchomanpish chunga metromi carca. Chai quipami ñucataca: «Caimi Diospaclla chicanyachishca huasica» nirca.

⁵ Chai quipaca Diospac huasi pircacunatami medirca. Chaica quimsa metro anchomi carca. Diospac huasi muyundipi cac uchilla ucucunaca ishcai metro anchomi carca.

⁶ Diospac huasi ladopi cac ucucunaca quimsa altoyucmi carca. Cada altopimi quimsa chunga uchilla ucucuna tiyarca. Diospac huasi muyundipica ashalla pirca llucshishcami carca. Chai pirca ucucuna samachishpa racu caspicunata churashcami carca.

⁷ Ashtahuan jahuapi cac altocunaca ancho ucucunami carca. Chai ucumanta ashtahuan jahuaman ringapacca, muyushpa rina gradami tiyarca.

⁸ Diospac huasi muyundipica sumacta ruhuashca shuc basemi tiyarca. Chai base jahuapimi chai ucucunaca carca. Chai baseca quimsa metro altomi carca.

⁹ Chai ucu pircaca ishcai metro chaupi anchomi carca. Curacunapac ucuca Diospac huasi canzhapi tiyac ucucunamanta,

¹⁰ chunga metro carupimi carca. Chashnami muyundita carca.

¹¹ Chai ucucunaman yaicuna corredor ladomanmi ishcai pungu tiyarca. Shucca jahua ladoman, shucca ura ladomanmi carca. Chai pungucunapica shuc uchilla corredormi muyundita tiyarca. Chaica ishcai metro chaupi anchomi carca.

¹² Inti tigrana ladoman cac canzhapica shuc jatun huasimi tiyarca. Chai huasica quimsa chunga pichca metro ancho, chuscu chunga pichca metro largomi carca. Pircaca ishcai metro chaupi anchomi carca.

¹³ Chai quipaca Diospac huasitami medirca. Chai huasica pichca chunga metro largomi carca. Diospac huasi jatun pambandi, huasindi, muyundipi cac pircacunaca pichca chunga metro largomi carca.

¹⁴ Shinallatac Diospaclla huasindi, inti llucshina ladoman cac jarcashca canzha pambandi medicpica, pichca chunga metrollatacmi carca.

¹⁵ Chai quipaca Diospac huasi huasha ladopi cac huasi largotami medirca. Diospac huasi ladopi tiyac huasimanta caishuc lado huasicamanca pichca chunga metromi carca. Diospac huasi ucupish, churana huacaichina ucucunapish,

¹⁶ Diospac huasi muyundipi cac uchilla ucucunapish quimsa altocamanmi pambamanta jahua ventanacaman tablahuan tapashca carca. Pungu umbralcunatapish, ventanacunatapish tablacunahuan tapashcami carca.

¹⁷ Diospac huasi pungumantaca Diospaclla chicanyachishca ucucamanmi medirca. Chai pircacunapipish, muyundipi cac ucucunapipish, canzhamanpipish ucumanpish,

¹⁸ querubincunata, palmerata dibujashcami carca. Cada querubinpac ladopimi shuc palmerata dibujashca carca. Cada querubinmi ishcai ladoman ñahuita charirca.

¹⁹ Shuc lado ñahuica gentepac ñahui shinami carca. Chai ñahuica shuc ladoman shayacuc palmeratami ricucurca. Caishuc lado ñahuica leonpac ñahui shinami carca. Chai ñahuica caishuc ladoman shayacuc palmeratami ricucurca. Chashnami Diospac huasi muyundica carca.

²⁰ Diospac huasi pircapica pambamanta jahua pungu yaicunacamanmi querubincunata, palmerata dibujashca carca.

²¹ Diospac huasi pungu pilarcunaca cuadradomi carca. Diospaclla ucu ñaupa lado pilarca caishuc ñaupa lado pilar shinallatacmi carca.

²² Caspi altarca altomanca shuc metro chaupimi carca. Largomanpish, anchomanpish shuc metromi carca. Chai altarca tucui ladomi caspimanta carca. Chaita ricuchishpami ñucataca: «Caica Mandac Diospac ñaupapi tiyana mizami» nirca.

²³ Diospac huasipish, Diospaclla cac ucupish ishcai punguyucmi carca.

²⁴ Cada pungumi ishcai ladoman pascanalla carca. Chashnami ishcai ladoman muyucuc pungucuna carca.

²⁵ Diospac huasi pungucunapica pircapi shinallatacmi querubincunata, palmerata dibujashca carca. Diospac huasi pungupi tiyac corredorpipish shuc caspi pungumi tiyarca.

²⁶ Chai corredorpi cac churanata huacaichina ucucunata ruhuashca pircacunapica quichqui ventanacunami tiyarca. Chaipica palmerata dibujashcami carca. Diospac huasi muyundipi tiyac huasicunapish umbralcamanmi chashnallatac carca.