EZEQUIEL 4 - Dios Rimashcata Quillcashcami

Jerusalén pueblo llaqui tucunamanta

¹ Huañunalla runa, shuc adobeta japishpa, cambac ñaupapi churashpa, chaipi Jerusalenta dibujai.

² Quipaca Jerusalenta piñaccuna muyundi shayacucta, macanacuna torrecunata, baluartecunata ruhuai. Chai ñaupapica soldadocunapac carpa huasicunatapish, caspicunahuan ruhuashpa, ariete nishcacunatapish muyundita ruhuai.

³ Shinallatac shuc fierro planchata japishpa, pirca shinata chai Jerusalenhuan, canhuan chicanyachic jatun pirca shinata ruhuai. Chai quipaca, chai pueblota can llaquichingapac chimbapurashpa chapacuc shinata ruhuangui. Chai fierroca can ama ricuchun jarcac shinami canga. Chaimi israelcunamanca señal canga.

⁴ Canca lluqui ladoman siririshpa, israelcunapac juchacunata cambac jahuapi shina churangui. Mashna cutin lluqui ladoman sueñushpaca, paicunapac juchacunatami apangui.

⁵ Israelcunaca quimsa patsac iscun chunga huatatami juchallirca. Cada huatamantami shuc punzhata canca llaquita apana cangui.

⁶ Ña chai punzhacunata pactachishca quipaca, alli ladoman siriringui. Shina siririshpaca, Judá llactapi causaccunapac juchacunata apangapacmi chuscu chunga punzhacunata siriringui. Israelcuna juchallishca cada huatamantami shuc punzhata llaquita apana cangui.

⁷ Chai quipaca Jerusalenta muyundita shayacucta ricushpaca, rigrata alzashpa, Jerusalenpi causaccuna llaqui tucunata ñuca shutipi sinchita huillangui.

⁸ Chai llaqui punzhacuna pactangacamanmi maimanpish ama tigrarichun cantaca huascahuan alli huatagrini.

⁹ Canca trigotapish, cebadatapish, habastapish, lentejatapish, mijo nishcatapish, avenatapish shuc puñupi tandashpa churangui. Chaicunataca can lluqui ladoman siricushca quimsa patsac iscun chunga punzhacamanmi tandata ruhuashpa micungui.

¹⁰ Chaitaca punzhanta chaupi librata micuna horaspi micungui.

¹¹ Shinallatac yacutapish, ubiana horaspi chaupi litrota ubiangui.

¹² Chai cebada tandataca tucuipac ricuipi mapata rupachishpa, cusashpa micungui» nirca.

¹³ Cutinllatac Mandac Dios rimashpaca: «Chashnami israelcunaca mai llactaman ñuca llucchishpa cachacpica, mapa micunata micunga» nirca.

¹⁴ Shina nicpimi ñucaca: «¡Mandac Dioslla! Ñucaca huahuamanta pacha cunancaman jaicapi mana mapayashcanichu. Huañushca aichatapish, sacha animal huañuchishca aichatapish, ima shuctac mapa aichatapish mana micushcanichu. Mana shimipi churashcanillapishchu» nircani.

¹⁵ Shina nicpimi paica: «Tandata gentecunapac mapahuan cusanapac randica, huagra huanuhuanmi cusachun saquini» nirca.

¹⁶ Shinallatac cutin rimashpaca: «Huañunalla runa, Jerusalenpica micuna illangami, pezashcallatami llaquilla micunga. Yacutapish medishpallami manchaihuan ubianga.

¹⁷ Micunapish, yacupish tucuricpica, mancharishpami caishuc chaishuc ñahuipura ricunacunga. Paicunallatac juchata ruhuashcamantami ismushpa tucuringa.