EZEQUIEL 39 - Dios Rimashcata Quillcashcami

¹ Huañunalla runa, jatun mandac Gog llaqui tucunamanta huillashpa: “Mandac Diosca: Mesec, Tubal llactacunata jatun mandac Goglla, canhuanca piñarishcami cani.

² Cantaca aisashpami, jahua lado llactamanta Israel llacta urcucunata llaquichichun apamusha.

³ Cambac lluqui maquipi charicuc arcotapish quichushami, cambac alli maquipi charicuc flechatapish urmachishami.

⁴ Cambac soldadocunandi, canhuan cac gentecunandimi Israel llacta urcucunapi huañungui. Chaipica volac animalcuna, sacha animalcunami micunga.

⁵ Canca pambapimi urmangui. Chaitaca Mandac Dios ñucami nini.

⁶ Magog llactatapish, mama cucha ladopi causac gentecunatapish ninata churashpami tucuchisha. Shina ruhuacpimi, ñucataca Mandac Dios cashcata yachangacuna.

⁷ Shinami ñuca shutica jucha illac cashcata ñuca acllashca israelcunapac chaupipi ricsichisha. Ñuca shutita yangapi churachunca, jaicapi mana saquishachu. Shina ruhuacpimi, shuctac llactapi causaccunaca ñucataca israelcunapac jucha illac, Mandac Dios cashcata yachangacuna.

⁸ Mandac Dios ñucami nini: Ñuca llaquichina punzhami chayamun. Chaitaca pactachishatacmi.

⁹ Israel llacta llactacunapi causaccunaca macanacuna escudocunatapish, arcocunatapish, flechacunatapish, uchilla flechacunatapish ninapi rupachingapacmi llucshinga. Canchis huatacamanmi yantata ruhuashpa rupachinga.

¹⁰ Chai macanacunami yantaca canga. Chaimantami yantatapish mana apamunga, yuracunatapish mana pitinga. Quichuccunamantami quichunga. Shuhuaccunamantami shuhuanga. Chaitaca Mandac Dios ñucami nini.

¹¹ Chai punzhami Israel llactapica jatun mandac Gogta maipi enterranata ricuchisha. Inti llucshina lado, mama cuchaman rina pambapimi jatun mandac Gogtapish, paipac gentecunatapish enterranga. Chaita puriccunapish, mana ashtahuan chaita pasangachu. Chai pambataca Hamón-gogtami shutichinga.

¹² Chai huañushcacunataca canchis quillacamanmi enterranga. Chashna enterracpimi, Israel llactaca mapa illac saquiringa.

¹³ Tucui chai llactapi causaccunami huañushcacunataca enterracunga. Ñucata sumacyachina punzhaca paicunapacca shuc yuyarina punzhami canga. Chaitaca Mandac Dios ñucami nini.

¹⁴ Canchis quillata purishpa, tucui chai saquirishca huañushcacunata tucui llactacunapi mashcashpa enterrachunmi, trabajac gentecunata japinga. Chashnami Israel llactata mapa illacta saquinga.

¹⁵ Chai mashcaccuna maijan tulluta tarishpaca, huañushcata Gogpac soldadocunapac pambapi enterrangacamanmi chai ladopi shuc señalta churanga.

¹⁶ Chai llactataca ‘soldadocunapac llacta’ nishpami shutichinga. Chashnami Israel llactataca mapa illacta saquinga.

¹⁷ Huañunalla runa, Mandac Dios ñucaca: Canca tucuilaya volac animalcunata, tucuilaya sacha animalcunataca: Tucui ladomanta tandarishpa, Israel urcucunaman shamuichic ningui. Chaita huañuchishpa, carashpami yahuarta ubiachisha.

¹⁸ Sinchi runacunapac aichatami micunguichic. Llactata mandaccunapac yahuartami ubianguichic. Paicunaca Basán urcupi huirayashca cari ovejacuna, maltón ovejacuna, cari chivocuna, huagracuna shinami.

¹⁹ Ñuca cancunaman carashca huirataca mana nictami micunguichic. Yahuartapish machangacamanmi ubianguichic.

²⁰ Ñuca miza jahuapica caballocunatapish, caballopi ric sinchi runacunatapish, macanacuc soldadocunatapish huañuchishpami churasha. Chaicunataca mana nictami micunguichic. Chaitaca Mandac Dios ñucami nini.

²¹ Chai shinami ñuca podertaca shuctac llactacunapi causaccunaman ricuchisha. Shina ruhuacpimi, tucui llactapi causaccunaca ñuca ima shina taripashpa, llaquichic cashcata yachangacuna.

²² Chai punzhamantami israelcunaca ñucataca Mandac Dios cashcata yachangacuna.

²³ Chashna ruhuacpimi, shuctac llactapi causaccunaca israelcuna juchata ruhuashpa mana cazushcamanta prezurishcata yachangacuna. Paicunamanta caruyashpami, piñaccunapac maquipi churarcani. Shina churacpimi, tucui paicuna jatun macanacuipi huañurca.

²⁴ Paicunaca millana juchacunatami ruhuarca. Ñucata mana cazurcachu. Chaimantami paicunatapish chashnallatac llaquichishpa, paicunamanta caruyarcani.

²⁵ Chaimantami Mandac Dios ñucaca: Cunanca Jacobopac huahua huahuacunataca pushamushpami israelcunata cuyac cashcata ricuchisha. Chashnami ñuca shutica jucha illac cashcata ricuchisha.

²⁶ Paicunapac llactapi imatapish mana manchashpa, cushilla causacushpaca, ñucata mana cazushpa, juchata ruhuashcamantaca mana pingangachu. Chaitaca cungaringami.

²⁷ Shuctac gentecunapac chaupimanta, paicunata piñaccunapac llactamanta llucchimushpa, tauca llactacunapi causaccunapac ñaupapi jucha illac cashcata ñuca ricuchicpimi, chashnaca tucunga.

²⁸ Shuctac llactacunaman prezu cachashpapish quipataca tucuita tandachishpami paicunapac llactallapitac causachun churasha. Shina ruhuacpimi, ñucataca Mandac Dios cashcata yachangacuna.

²⁹ Ñucaca jaicapi paicunataca mana saquishachu. Ashtahuanpish paicunapica ñuca Espiritutami churasha nini” ninmi ningui» nirca.