EZEQUIEL 38 - Dios Rimashcata Quillcashcami

Jatun mandac Gogta llaquichinamanta

¹ Mandac Dios ñucata rimashpaca:

² «Huañunalla runa, Magog llactata ricushpa, Mesec, Tubal llactacunata jatun mandac Gog llaqui tucunata

³ huillashpa: “Mandac Diosca: Mesec, Tubal llactacunata jatun mandac Goglla, canhuanca piñarishcami cani.

⁴ Cantaca jazhapi fierro ganchota churashpami, cambac soldadocunandi, caballocunandi, caballopi ric soldadocunandi llucchisha. Tucui cancunami jatun escudocunahuan, uchilla escudocunahuan, espadacunahuan canguichic.

⁵ Shinallatac Persia, Etiopía, Libia llactacunapi causaccunapish canhuanmi ringa. Paicunapish escudocunahuan, cascocunahuanmi cancuna.

⁶ Shinallatac Gomer llacta gentecunapish, paicunapac soldadocunandi, jahua ladopi cac Bet-togarma llacta gentecunapish, paicunapac soldadocunandimi canhuan ringa. Shuctac gentecunapish canhuanmi canga.

⁷ Canpish, canhuan tandanacushca soldadocunapish allichirichic. Canmi paicunataca pushangui.

⁸ Achca punzhacuna quipaca Israel llacta urcucunaman richunmi mandasha. Chai llactaca unai huatacuna quipami llaquimanta quishpiringa. Chai llactamanmi tandanacushpa ringui. Israel llacta urcucunaman shamungui. Chaipi causaccunaca llaquinayaita tucuchishcami carca. Shina cashpapish, cunanca shuctac llactacunamanta llucshimushpami, imata mana manchashpa causan.

⁹ Canca huairahuan tamya ric shina ringui. Cambac tucui soldadocunahuan, achca gentecunahuan rishpa, puyu shina, chai llactata tapangui.

¹⁰ Mandac Dios ñucaca: Chai punzhami cambac shungupica mana allita ruhuanata yuyaringui.

¹¹ Chaimantami canca: ‘Muyundita mana pircashca, punguta mana aldabashca, macanacunata mana yachac llactacunaman rishpa, chai cushilla causac gentecunata llaquichingapacmi rigrini.

¹² Paicunaca shuctac llactamanta cutimushpami, llaquinayai shitashca llactata allichishpa causacun. Cunanca animalcunatapish, ima charishcacunatapish achcatami charin. Chashnami llacta chaupipi causacun’ nicunguimi.

¹³ Sabá, Dedán llactacunapi causaccunapish, Tarsis llactamanta randishpa catushpa causaccunapish, tucui mandaccunapish cantaca: ‘¿Ima charishcacunata quichungapacchu shamurcangui? ¿Cullquitapish, curitapish, animalcunatapish, tucuita apangapacchu, cai tucui gentecunahuan shamurcangui?’ ningami” ningui.

¹⁴ Chaimanta huañunalla runalla, jatun mandac Gog llaqui tucunata huillashpa: “Mandac Diosca: Chai punzhapimi canca ñuca acllashca israelcuna imata mana manchashpa causacushcataca yachangui.

¹⁵ Cambac llactamantapish, jahua lado caru llactacunamantapish sinchi gentecunahuan tandanacushpami caballocunapi chayangui.

¹⁶ Puyu shina rishpa, ñuca acllashcacunata tucuita tapashpa llaquichingui. Jatun mandac Goglla, quipa punzhacunapimi shuctac llactacunapi causaccunapac ñaupapi ñuca jucha illac cashcata ricuchichun, ñuca acllashcacunata llaquichichun cantaca ñucallatac cachasha.

Jatun mandac Gog ima tucunata huillashcamanta

¹⁷ Mandac Diosca: Ñaupa huatacunamanta canmanta ñucata serviccunata Israel huillaccunata huillachircani. Chai huillaccunami israelcunata ñuca llaquichinamanta huillarca. Chaitaca pactachishatacmi.

¹⁸ Israel llactata jatun mandac Gogta llaquichicui punzhacunallatacmi ñucaca nina japiric shina yallita piñarisha. Chaitaca Mandac Dios ñucami nini.

¹⁹ Chai punzhacunapi nina japiric shina ñuca piñaricpimi, Israel llactapica yallita allpa chucchui tiyanga.

²⁰ Mama cuchapi causac challuacunapish, volac animalcunapish, sacha animalcunapish, allpapi llucashpa puric animalcunapish, cai pachapi causac gentecunapish ñuca ñaupapimi chucchunga. Urcucunapish tuñiringami, quingraicunapish urmangami, pircacunapish tucuimi pambayanga.

²¹ Tucui ñuca urcucunamantami jatun mandac Gog huañuchichun, jatun macanacuiman cayasha. Chaipica huauquinditami espadahuan huañuchinga. Chaitaca Mandac Dios ñucami nini.

²² Jatun mandac Gogtaca ungüihuan huañuchishpami, yallita llaquichisha. Paipac soldadocunatapish, paihuan cac gentecunatapish manchana tamya runduhuan, nina azufrehuanmi yallita llaquichisha.

²³ Shina ruhuashpami, ñucaca jatun cashcata, jucha illac cashcata shuctac llactacunaman ricuchisha. Shina ruhuacpimi, ñucataca Mandac Dios cashcata yachangacuna” ninmi ningui.