EZEQUIEL 37 - Dios Rimashcata Quillcashcami

Chaquishca tullucunamanta

¹ Mandac Dios ñucata sinchiyachicpimi, paipac Espirituca tullucuna siricuc pambaman pusharca.

² Chaiman pushashpaca, tullucuna siricuc muyunditami caiman chaiman purichirca. Chaipica chaquishca achca tullucunami carca.

³ Chaipi Mandac Dios ñucata tapushpaca: —Huañunalla runa, ¿cai tullucunaca causaringachu?— nirca. Shina nicpimi ñucaca: —Mandac Dioslla, canllami yachangui— nircani.

⁴ Chaimantami Mandac Diosca: —Cai tullucunaman huillashpa: “¡Chaquishca tullucuna, Mandac Dios rimashcata uyaichic!

⁵ Mandac Diosca: Ñucami cancunapica causaita cuc samaita churani. Chaimantami causaringuichic.

⁶ Cancunapica angucunatapish, aichatapish churashpami jahuataca carahuan tapasha. Causaita cuc samaita churashpami, causaiyucta ruhuasha. Chaita ricushpami, ñucataca Mandac Dios cashcata yachanguichic” ninmi ningui— nirca.

⁷ Ñucaca pai mandashca shinami chai tullucunamanca huillarcani. Chashna huillacucpimi, tulun nishpa, allpa chucchushca uyarirca. Chaipimi chai tullucunaca paicunapura tandanacurca.

⁸ Chai tullucunataca angucunahuan, aichahuan, chai jahuataca carahuan tapashcatami ricurcani. Ashtahuanpish causaita cuc samaica manarac tiyarcachu.

⁹ Chaimantami Mandac Diosca: «Huañunalla runa, causaita cuc samaiman huillashpa, Mandac Diosca: “¡Causaita cuc samai, cai pacha chuscu ladomanta shamushpa, cai huañushcacunapac jahuapi pucui! ¡Shina ruhuacpica, causaringallami!” ninmi ningui» nirca.

¹⁰ Mandac Dios mandashca shinami huillarcani. Chaimantami causaita cuc samai paicunapi yaicucpi, causarishpa shayarirca. ¡Paicunaca soldadocuna shina yalli achcami carca!

¹¹ Mandac Dios cutinllatac rimashpaca: «Huañunalla runa, cai tullucunaca israelcunami. Paicunaca: “Ñucanchic tullucunaca chaquishcami. Ñucanchicca ima shuyanatapish mana charinchicchu. Tucuimi tucurishcanchic” nincunami.

¹² Chaimanta paicunaman huillashpaca, Mandac Diosca: Ñuca acllashcacunalla, cancunataca enterrashca jutcucunata pascashpa, llucchishpami Israel llactaman pushamusha.

¹³ Ñuca acllashcacunalla, enterrashca jutcucunata pascashpa, cancunata llucchicpimi, ñucataca Mandac Dios cashcata yachanguichic. Chaitaca Mandac Dios ñucami nini.

¹⁴ Ñuca cancunapi causaita cuc samaita churashpa, causachishpami, cancunapac llactallapitac samachisha. Shina ruhuacpimi, Mandac Dios ñuca nishcata pactachic cashcata yachanguichic» nirca.

Judá llactahuan, Israel llactahuan tandanacushcamanta

¹⁵ Mandac Dios ñucata rimashpaca:

¹⁶ «Huañunalla runa, cunanca shuc caspita japishpa, chaipica: “Judapacpish, paihuan apanacuc israelcunapacpishmi” nishpa quillcai. Quipaca shuc caspita japishpa chaipica: “Efrainpac, Josepac huahuacunapacpish, paicunahuan apanacuc israelcunapacpishmi” nishpa quillcai.

¹⁷ Chai quipaca shuclla tucuchun, ishcai caspita tandachi. Cambac maquipica shucllami tucunga.

¹⁸ Cambac llactapi causaccuna chaita ricushpaca: “Chashna ruhuashpaca, ¿imatatac nisha ningui? Chaitaca huillaiyari” nicpica canca:

¹⁹ “Mandac Diosca: Ñucami Efrainpac maquipi cac Josepac huahuacunapac caspitapish, paicunahuan apanacuc israelcunapac caspitapish japishpa, Judapac huahuacunapac caspihuan tandachishpa shucllata ruhuasha. Shina ruhuacpimi, ñuca maquipica shuclla caspi tucunga” ninmi ningui.

²⁰ Can quillcashca caspicunata paicunapac ñaupapi cambac maquihuan japishpa:

²¹ “Mandac Diosca: Shuctac llactaman rishca tucui israelcunatami tandachishpa, paicunapac llactallaman cutichimusha.

²² Paicunata Israel llacta urcucunapi churashpa, shuclla llactata ruhuashpami, shuclla jatun mandacta churasha. Ashtahuanpish ña mana ishcai llactachu canga. Mana ishcai mandacchu tiyanga.

²³ Paicunaca ruhuashcalla dioscunata adorashpapish, millana juchacunata ruhuashpapish, tucuilaya juchacunata ruhuashpapish ña mana ashtahuan mapayangachu. Ashtahuanpish ñucata mana cazushpa, juchallishcataca pichashami. Tucuita pichashpami ñuca acllashcacunata ruhuasha. Ñucaca paicunapac Diosmi casha.

²⁴ Ñucata servic Davidmi paicunapac jatun mandac canga. Shuclla michicmi tiyanga. Paicunaca ñuca yachachishcacunatapish, mandashcacunatapish, rimashcacunatapish pactachishpami causanga.

²⁵ Ñucata servic Jacoboman cushca, ñaupa taitacuna causana llactapimi causanga. Chaipimi paicunapish, huahuacunapish, nietocunapish huiñaita causanga. Ñucata servic Davidmi huiñaita paicunapac jatun mandac canga.

²⁶ Huiñaita cushilla causangapacmi paicunahuanca ari ninacusha. Paicunata chaipi causachun churashpaca, achcatami mirachisha. Ñucapaclla huasitapish huiñaipacmi, paicunapac chaupipi shayachisha.

²⁷ Ñucapaclla carpa huasipish paicunapac chaupipimi canga. Ñucaca paicunapac Diosmi casha. Paicunaca ñuca acllashcacunami canga.

²⁸ Ñucapaclla huasitapish paicunapac chaupipimi huiñaipac shayachisha. Shina ruhuacpimi, shuctac llactacunaca israelcunata ñucapaclla cachun chicanyachishcata yachangacuna” ninmi ningui» nirca.