EZEQUIEL 36 - Dios Rimashcata Quillcashcami

Israelcuna alli tucunamanta

¹ Huañunalla runa, Israel llacta urcucunata rimashpaca: “¡Israel llactapi tiyac urcucunalla, Mandac Dios rimashcata uyaichic!

² Mandac Diosca: Cancunata piñaccunaca: ‘Huiñaita tiyac urcucunatapish ñucanchicmanmi cushca’ nishpami burlarca.

³ Chaimanta llaqui tucunata huillashpa, Mandac Diosca: Cancunataca tucui ladomanta shamushpa, muyunacushpami tucuchinga. Shuctac llactamanta shamushpami japinga. Cancunataca gentecuna burlana, mana alli ninatami ruhuanga.

⁴ Chaimanta Israel llacta urcucunalla, Mandac Dios ñuca rimashcata uyaichic. Ñucaca: Urcucunatapish, lomacunatapish, yacu huaicucunatapish, pambacunatapish, rumi montoncunatapish, llaquinayaita tucuchishca llactacunatapish, ima tiyashcacunata quichushca pueblocunatapish, muyundi shuctac llactapi causac mana alli nishca llactacunatapish chashnami rimani.

⁵ Chaimantami Mandac Dios ñucaca: Shuctac llactapi causaccunapish, Edom llactapi causaccunapish, ñuca llactataca cushicushpami japirca. Chaipi causaccunata yallita piñashpami, prezu aparca. Chaimantami ñucaca nina japiric shina yallita piñarishpa rimarcani.

⁶ Chaimanta Israel llactata rimashpa, chai llacta urcucunatapish, lomacunatapish, yacu huaicucunatapish, pambacunatapish rimai. Mandac Diosca: Riquichic, cancunataca shuctac llactapi causaccunaca yallita mana alli nishpami rimarca. Chaimantami nina japiric shina piñarircani.

⁷ Ñucaca ‘cambac muyundi llactapi causaccunaca jatun llaquitami apanga’ nishpami, maquita alzashpa ari nircani.

⁸ Israel llacta urcucunalla, ñuca acllashca israelcunaman granota pucuchun yuracuna huiñachun saquiyari. Ñallami paicunaca cutimunga.

⁹ Riquichic, ñucaca cancunata cuidacunimi. Gentecuna cancunapacman cutimushpa, yapushpa tarpungami.

¹⁰ Israel llactapi causaccunataca yallitami mirachisha. Llactacunapipish achcami causanga, urmashca huasicunatapish cutinmi shayachinga.

¹¹ Gentecunatapish, animalcunatapish achcatami mirachisha. Ñaupa huatacunapi shinami achca causanga. Shina ruhuacpimi, ñucataca Mandac Dios cashcata yachangacuna.

¹² Ucucunapica ñuca acllashca israelcunatami purichisha. Israel urcucunaca cancunaman cushcami canga. Huahuacunatapish ña mana cutin huañuchinguichu.

¹³ Mandac Dios Israel urcucunamanta rimashpaca: Gentecunata micuc, Israel huahuacunata huañuchic nincunami.

¹⁴ Chaimanta gentecunatapish, cambac llacta huahuacunatapish mana huañuchinguichu. Chaitaca Mandac Dios ñucami nini.

¹⁵ Shuctac llactapi causaccunapish ña mana ashtahuan camishpa rimangachu, ña mana burlashpa asingachu. Huahuacunapish mana ashtahuan huañungachu. Chaitaca Mandac Dios ñucami nini” ninmi ningui» nirca.

¹⁶ Mandac Dios ñucata rimashpaca:

¹⁷ «Huañunalla runa, israelcunaca paicunapac llactapi causacushpaca, juchacunata ruhuashpami mapayarca. Paicunapac ruhuashcaca ñucapac ñaupapica quilla ungüihuan mapayashca huarmi shinami carca.

¹⁸ Huañuchishcamanta, ruhuashcalla dioscunata adorashpa mapayashcamantami ñucaca yallita piñarishpa llaquichircani.

¹⁹ Shuctac llactacunaman shic-huashpa cachacpimi, caipi chaipi saquirircacuna. Paicuna ima shina causashca, imata ruhuashca shinami, taripashpa llaquichircani.

²⁰ Ashtahuanpish paicuna shuctac llactacunaman chayacpi, chai llacta gentecunaca: “¡Paicunaca Mandac Diospac acllashca gentecuna cashpapish, paipac llactamantami llucshimushca!” nishpa, burlashpami ñucapac jucha illac shutita yangapi churarca.

²¹ Jucha illac ñuca shutita israelcuna shuctac llactacunapi yangapi churashcamantami yallita llaquirircani.

²² Chaimanta canca israelcunataca: “Mandac Diosca: Israelcunalla, shuctac llactapica jucha illac ñuca shutitaca yangapimi churarcanguichic. Chaimanta caitaca mana cancunamantachu ruhuagrini. Ashtahuanpish jucha illac ñuca shutimantami ruhuagrini.

²³ Shuctac llactapi yangapi churashca ñuca shutitami jatunyachisha. Cancunapac chaupipi ñuca jucha illac shutita jatunyachicpimi, ñucataca Mandac Dios cashcata yachangacuna. Chaitaca Mandac Dios ñucami nini.

²⁴ Cancunataca ñucami shuctac llactacunamanta, shinallatac tucui llactacunamanta tandachishpa, cancunapac llactaman pushamusha.

²⁵ Chaipimi chuya yacuhuan cancunapac juchacunata pichashpa, ruhuashcalla dioscunata adorashpa mapayashcatapish chuyayachisha.

²⁶ Cancunamanca mushuc shunguta, mushuc yuyaitami cusha. Rumi shunguta anchuchishpami cazuc shunguta churasha.

²⁷ Cancunaman ñuca Espirituta cucpimi, ñuca mandashcacunatapish, pactachinacunatapish pactachishpa causanguichic.

²⁸ Ñaupa taitacunaman cushca llactapimi causanguichic. Cancunaca ñuca acllashcacunami canguichic. Ñucaca cancunapac Mandac Diosmi casha.

²⁹ Cancunamantaca tucui mapatami anchuchisha. Yarcai ama tiyachunca achca trigotami pucuchisha. Yarcaica ña mana ashtahuan tiyangachu.

³⁰ Shuctac llacta gentecuna cancuna yarcaihuan cacpi, jaicapi ama rimachunmi yuracunapi pucuc, allpa ucupi pucuc granocunatapish achcata pucuchisha.

³¹ Chaimantami cancunaca mana alli causashcatapish, millana juchacunata ruhuashcatapish yuyarishpa, cancunallatac pingaringuichic.

³² Mandac Dios ñucami nini: ¡Israelcunalla, caitaca mana cancunamantachu ruhuani! ¡Chaitaca allita yachaichic! ¡Cancuna mana allita ruhuashcamantaca cancunallatac pingarishpa upayaichic!

³³ Mandac Dios ñucaca: Cancunapac juchacunata pichai punzhami llactacunapi causachun churasha. Shinallatac tucui urmashca huasicunatapish cutinmi shayachinguichic.

³⁴ Cai llactata pasaccunami llaquinayaita shitashcata ricurca. Chai shitashca allpaca yapushpa allichishcami canga.

³⁵ Chashna cacpimi paicunaca: ‘Llaquinayaita shitashca pambaca Edén huerta shinami tucushca. Urmachishca llactacunapish cunanca allichishca muyundita pircashcami’ nincuna.

³⁶ Cancunapac muyundipi causaccunaca tucui urmachishcacunata ñuca cutin shayachishcatapish, shitashca pambapipish ñuca tarpushcatapish yachangami. Mandac Dios ñucami chashna nini. Chaitaca ruhuashatacmi.

³⁷ Mandac Dios ñucaca: Israelcuna cutin ñucata mañashcata uyashpami, ovejacunata mirachic shina mirachisha.

³⁸ Jatun fiesta punzhacunapica Jerusalenman apamushca ñucapaclla ovejacuna shinami, israelcunaca shitashca llactacunapi jundanga. Chaita ricushpami, ñucataca Mandac Dios cashcata yachangacuna nini” ninmi ningui» nirca.