EZEQUIEL 35 - Dios Rimashcata Quillcashcami

Seir urcu llaqui tucunamanta

¹ Mandac Dios ñucata rimashpaca:

² «Huañunalla runa, Seir urcuta ricushpa, chai urcu llaqui tucunata

³ huillashpa: “Mandac Diosca: Seir urculla, canhuanca piñarishcami cani. Chaimantami llaquichishpa shitashca pambata saquisha.

⁴ Llactacunatapish llaquinayaitami tucuchisha. Chaipimi ñucataca Mandac Dios cashcata yachangui.

⁵ Tucui causaipimi israelcunahuan piñanacushpalla causarcangui. Chaimantami ñuca paicunata llaquichicui punzhapica espadahuan huañuchircangui.

⁶ Ñuca shutipimi nini: Canca huañunatacmi cangui. Huañuchiccunami cantaca catinga. Canca huañuchinata mana mancharcanguichu. Chaimantami cantapish huañuchinata mana manchanga.

⁷ Seir urcutaca shitashca pambatami saquisha. Tucui chaita pasaccunatami huañuchisha.

⁸ Urcucunapipish, lomacunapipish, pambacunapipish, yacu huaicucunapipish, jatun macanacuipi huañushcacunami jundanga.

⁹ Cantaca huiñaitami llaquinayai shitashca pambata saquisha. Chaipica llactacunatapish mana cutin shayachingachu. Shina ruhuacpimi, ñucataca Mandac Dios cashcata yachanguichic.

¹⁰ Mandac Dios ñucallatac Israel llactapi cacpipish canca: ‘Israel llactatapish, Judá llactatapish japisha’ nircanguimi.

¹¹ Ñuca shutipimi nini: Chaimantami Mandac Dios ñucaca can ima shinami israelcunata piñashpa llaquichishpalla causarcangui, chashnallatac ñucapish cantaca llaquichisha. Chashna llaquichicpimi, israelcunaca ñucata ricsingacuna.

¹² Shinallatac canca Israel llactapi tiyac urcucunata piñashpa: ‘¡Urcucunaca shitashcami siricun, micuc shina tucuchichunmi saquishca!’ nishcatapish ñuca uyashcata yachanguimi.

¹³ Canca ñucata piñashpami, yallita rimarircangui. ¡Chaitaca ñucallatacmi uyarcani!

¹⁴ Chaimantami Mandac Dios ñucaca: Cantaca tucui llactacuna ricushpa, cushicuchunmi llaquinayai shitashca pambata saquisha.

¹⁵ Canca israelcunaman ñuca cushca llacta llaquinayai tucuchishcata ricushpaca cushicurcanguimi. Chashnallatacmi cantapish llaquichisha. Seir urcupish, Edom llactapish chaipi tucui causaccunandimi llaquinayaita tucuchishca canga. Shina ruhuacpimi, ñucataca Mandac Dios cashcata yachangacuna nini” ninmi ningui.