EZEQUIEL 33 - Dios Rimashcata Quillcashcami

Torre jahuapi chapac runa imata ruhuanamanta

¹ Mandac Dios ñucata rimashpaca:

² «Huañunalla runa, cambac llacta gentecunataca: “Shuc llactaman jatun macanacuita cachacpica, chai llactapi causaccunapuramanta shuc cuidac runata churachun.

³ Chai runaca ñuca cachashca jatun macanacui shamucpica, cornetapi tocashpa, gentecunaman uyachichun.

⁴ Maijanpish chaita uyashpa, mana miticushpa, jatun macanacuipi huañucca paillatacmi faltayuc canga.

⁵ Chai corneta tocashca uyaricpipish, mana miticushpa huañucca paillatacmi faltayuc canga. Ashtahuanpish corneta tocashcata uyashpa miticushpaca, mana huañungachu.

⁶ Jatun macanacui shamucta ricushpapish chai cuidac runa cornetapi mana tocashpa uyachicpi, maijan mana miticushpa, jatun macanacuipi huañuchicpica, paipac juchamantami huañunga. Shina cashpapish paipac yahuarmantaca cuidac runami juchanchishca canga.

⁷ Huañunalla runa, cantami israelcunata cuidachun churarcani. Canca, ñuca rimashcata allita uyashpa, ñucapac randi paicunata rimangui.

⁸ Ñuca, ñucata mana manchac runata: ‘¡Ñucata mana manchashcamantaca huañunguitacmi!’ nicpipish, can chai runata millaita ruhuanata saquichun mana rimacpica, chai runaca paipac juchamantami huañunga. Shina cashpapish paipac yahuarmantaca canmi juchanchishca cangui.

⁹ Can chai runata millaita ruhuanata saquichun rimacpipish, mana cazushpa huañushpaca, paipac juchamantami huañunga. Ashtahuanpish canca mana huañunguichu” ningui» nirca.

Cashcata ruhuanamanta

¹⁰ Shinallatac Mandac Diosca: «Huañunalla runa, israelcunataca: “Cancunaca: ‘Ñucanchic mana cazushcapish, ñucanchic juchacunapish ñitishcami causacunchic. Chaimantami ismuc shina tucuricunchic. Shina cashpaca, ¿ima shinatac causashunyari?’ nircanguichicmi.

¹¹ Mandac Dios ñuca shutipimi nini: Ñucata mana manchac runa huañuchunca mana munanichu. Ashtahuanpish pai millaita ruhuanata saquishpa, causaita charichunmi munani. Chaimanta millaita ruhuanata saquishpa tigramuichic. Israelcuna, ¿imamantatac huañugringuichicyari? ninmi.

¹² Huañunalla runa, cambac llacta gentecunataca: Cashcata ruhuac runa juchallishpaca huañungami. Pai ñaupaman cashcata ruhuashcaca mana quishpichingachu. Shinallatac ñucata mana manchac runa juchata ruhuanata saquishpa, ñucapacman cutimushpaca quishpiringami. Cutin cashcata ruhuac runa cashpapish juchata ruhuashpaca huañungami. Pai cashcata ruhuashcaca yangallami canga.

¹³ Ñuca cashcata ruhuac runata: ¡Causanguitacmi! nicpi, pai ‘cashcata ruhuacmi cani’ yuyashpami, juchata ruhuanga. Shina ruhuashpaca huañungami. Pai cashcata ruhuashcataca mana yuyarishachu. Ashtahuanpish mana allita ruhuashcamantaca huañungami.

¹⁴ Ñuca, ñucata mana manchac runata: ‘¡Huañunguitacmi!’ nicpi, chai runa juchata ruhuanata saquishpa, ñucapacman cutirishpa, pandata mana ruhuashpa, cashcata ruhuashpa,

¹⁵ tucui shuhuashcatapish cutichishpa, pactachichun cushca mandashcacunatapish pactachishpa, ima mana allita mana ruhuashpa causashpaca, mana huañungachu.

¹⁶ Pai utcaman juchallishcataca mana yuyarishcachu canga. Allita ruhuashpa, cashcata ruhuashpaca causangatacmi.

¹⁷ Cambac llacta gentecunaca: ‘¡Mandac Diosta catishpa causanaca mana allichu!’ ningacunami. ¡Ashtahuanpish paicuna mana allita ruhuashpa causanami mana alli!

¹⁸ Cashcata ruhuac runa cashcata ruhuanata saquishpa, mana allita ruhuashpaca, chai mana allita ruhuashcamantami huañunga.

¹⁹ Cutin, ñucata mana manchac runa juchata ruhuanata saquishpa, cashcata ruhuashpaca causangami.

²⁰ Shina cacpipish cancunaca: ‘Mandac Diosta catishpa causanaca mana allichu’ nishpami catinguichic. Israelcunalla, ñucami cancuna ima shina causacushcata taripashpa, tucuiman ricuchisha” ninmi ningui» nirca.

Jerusalén tucurinamanta

²¹ Ñucanchicta prezu apashca chunga ishcai huata, chunga quilla, pichca punzhapimi shuc runaca Jerusalenmanta miticushpa shamurca. Pai ñucaman huillashpaca: «¡Pueblotaca ñami quichushca!» nirca.

²² Miticushpa shamuc runa tutamanta ñucapacman manarac chayamucpimi, Mandac Diosca shuc chishipi ñucata rimachirca. Shina rimachicpimi, ña mana upalla carcani.

²³ Mandac Dios ñucata rimashpaca:

²⁴ «Huañunalla runa, llaquinayaita tucuchishca Israel llactapi causaccunaca: “Abrahamca pailla cashpapish llactata japircami. Ñucanchicca achcami canchic. Chaimanta japishunllami” nincunami.

²⁵ Chaimantami canca: “Mandac Diosca: Cancunaca aichatapish yahuarndimi micunguichic. Ruhuashcalla dioscunata adoraccunapish, huañuchiccunapishmi canguichic. ¿Chashna cashca jahuachu llactataca japishunllami nicunguichic?

²⁶ Macanacuna yuyailla causaccuna, millaita ruhuaccuna, shucpac huarmihuan huainayashpa mapayashcacunami canguichic. ¿Chashna cashca jahuachu llactataca japishunllami ninguichic?” ninmi ningui.

²⁷ Shinallatac: “Mandac Diosca: Ñuca shutipimi nini: Llaquinayaita tucuchishca pueblopi causaccunaca jatun macanacuipimi huañunga. Pambapi causaccunataca millai animalcunami micunga. Jatun pircahuan jarcashca llactacunapi, jatun jutcucunapi causaccunaca manchana ungüihuanmi huañunga.

²⁸ Chai llactaca shitashca pambami saquiringa. Yallita sinchi llactaca tucuringami. Israel urcucunapish llaquinayaitami tucuringa. Chaicunataca pipish mana puringachu.

²⁹ Pingaipac juchacunata ruhuashcamantami chai llactaca llaquinayaita shitashca saquiringa. Shina ruhuacpimi, ñucataca Mandac Dios cashcata yachanga” ninmi ningui.

³⁰ Huañunalla runa, cambac llacta gentecunaca pirca ladocunapi, huasi pungucunapi shayarishpami cantaca burlashpa asinga. Paicunaca caishuc chaishucmi: “¡Mandac Dios imata huillashcata uyangapac shamuichic!” nincunami.

³¹ Paicunapish ñuca acllashca gentecuna shinami, can rimashcata uyangapac cambac ñaupaman shamun. Shina cashpapish mana pactachincunachu. Chai gentecunaca shimillahuanmi alli nincuna, ashtahuanpish shungupica chayucyana manaihuanmi purin.

³² Riqui, canca paicunapacca cuyaimanta sumacta cantac, sumacta tocac shinami cangui. Can huillashcata uyashpapish mana pactachincunachu.

³³ Tucui cai huillashcami pactagrin. Shina pactacpimi, paicunapurapi Dios ima nishcata huillac tiyashcata yachangacuna» nirca.