EZEQUIEL 32 - Dios Rimashcata Quillcashcami

Jatun mandac Faraón llaqui tucunamanta

¹ Chunga ishcai huata, chunga ishcai quilla, callari punzhapi Mandac Dios ñucata rimashpaca:

² «Huañunalla runa, Egipto llactata jatun mandac Faraón llaqui tucunamanta llaquipi cantanata cantashpa: “Canca shuctac llactacunapacca león shinami cangui. Mama cuchapi causac dragón shinami cangui. Canca jatun yacucunatapish cuyuchircanguimi. Chaquihuanmi callpacuc yacucunata mapayachishpa, yacu patataca turuyachircangui.

³ Chaimantami Mandac Diosca: Achca llactacunapac chaupipi cacpipish cambac jahuapi linchita shitashpami aisasha.

⁴ Cantaca allpaman aisashpami, shitashca pambapi saquisha. Volac animalcunami cambac jahuapi tiyaringa. Tucui cai pachapi tiyac sacha animalcunami mana nicta micunga.

⁵ Urcucunapimi aichataca shitasha. Huaicucunapimi huañushcacunata jundachisha.

⁶ Yahuarta pambacunapi jicharishpami huaicucunapi jundachisha. Chashnami urcucaman jundanga.

⁷ Can tucurishca quipaca, jahua pachapish amsayangami, lucerocunapish, quillapish mana achicyachingachu. Intitapish puyuhuanmi tapasha.

⁸ Canmantami jahua pachapi tiyac achicyachiccunapish amsayanga. Cambac llactataca pura tutatami ruhuasha. Chaitaca Mandac Dios ñucami nini.

⁹ Can llaqui tucushpa tucurishcata yachashpaca can mana ricsishca llaccunapish shungupi yallita llaquiringami.

¹⁰ Can urmacpica, achca gentecunami mancharishpa, yuyai illac saquiringa. Ñuca espadata paicunapac ñaupapi llucchicpica, jatun mandaccunapish yallita mancharingami. Chai llaquichi punzhapica mancharishpa, ñalla ñallami chucchunga.

¹¹ Mandac Dios ñucaca: Babilonia llactata jatun mandacpac espadami canta llaquichingapac shamunga.

¹² Yallita sinchi runacunapac espadami huañuchinga. Chai runacunaca tucuimanta yalli ashtahuan sinchi millaicunami. Paicunami jatun tucushca Egipto llactatapish, chaipi causaccunatapish chingachinga.

¹³ Yacu ladopi causac animalcunatapish tucuchishami. Yacutaca gentecunapac chaquipish, animalcunapac shillupish mana ashtahuan sarushpa mapayachingachu.

¹⁴ Ashtahuanpish cambac yacuca chuyami canga. Jatun yacucunaca aceite shinami, sumacta callpanga. Chaitaca Mandac Dios ñucami nini.

¹⁵ Egipto llactata shitashca pambata saquicpi, imalla tiyashcacunatapish quichushpa apacpi, chaipi causaccunatapish tucui huañuchicpimi, ñucataca Mandac Dios cashcata yachangacuna.

¹⁶ Caica, llaquipi cantana cantomi. Shuctac llactapi causac huarmicunami Egipto llactamantapish, chaipi causaccunamantapish cantanga. Chaitaca Mandac Dios ñucami nini” ninmi ningui» nirca.

Egipto llactapi causaccuna Seolman rinamanta

¹⁷ Chunga ishcai huata, callari quilla, chunga pichca punzhapi Mandac Dios ñucata rimashpaca:

¹⁸ «Huañunalla runa, ¡Egipto llactapi causaccuna llaqui tucunamanta llaquipi cantana cantota cantai! Paicunatapish, sinchi llactacunapi causac huarmicunatapish, huañushcacunahuan pacta Seolman cachai.

¹⁹ Canca: “¿Shuccunamanta ashtahuan sumaimanachu cangui? ¡Circuncisionta mana ruhuashcacunahuan pacta richic!” ningui.

²⁰ Espadaca huañuchingapac allichishcami. Jatun macanacuipi huañuccunahuan pactami huañunga. Egipto llactata mandacpish, chaipi causaccunapish, chaimanmi ringa.

²¹ Seolpi cac sinchi runacunaca Egipto llactata mandacpish, paita ayudaccunapish chaiman chayacpica: “Paicunapish ñami shamushca. Jatun macanacuipi huañushcacunahuan, circuncisionta mana ruhuashcacunahuan pactami siricun” ningacunami.

²² Enterrashca muyundipimi tucui Asiria llactapi causaccunaca shayacun. Tucui paicunatami espadahuan huañuchirca.

²³ Tucui cai pacha llactacunata manchachishpa causac Asiriaca jatun macanacuipimi huañushca. Seolmanta ashtahuan ucupimi siricun. Chai enterrashca muyundipica paipac gentecunami siricun.

²⁴ Chaipimi Elampish tucui paipac gentecunandi siricun. Tucui paicunami jatun macanacuipi huañurca. Tucui llactacunata manchachishpa causaccunaca circuncisionta mana ruhuashca gentecunahuan pactami ashtahuan ucuman rishca. Paicunapish caishuc enterrashca gentecuna shinami mana alli nishca siricun.

²⁵ Elamtaca paipac gentecunandimi huañushcacunapac chaupipi shitarca. Chai huañushcacunaca circuncisionta mana ruhuashcachu carca. Paicunaca cai pachapi causaccunata yallita manchachishcamantami jatun macanacuipi huañurca. Paicunapish enterrana jutcuman riccuna shinallatacmi pingai tucurca. Paipish huañushcacunapac chaupipimi siricun.

²⁶ Chaillapitacmi Mesecpish, Tubalpish tucui paicunapac gentecunandi siricun. Paicunaca circuncisionta mana ruhuashcachu carca. Paicunaca cai pachapi causaccunata yalli manchachishcamantami jatun macanacuipi huañurca.

²⁷ Paicunaca mana circuncisionta ruhuashca sinchi runacunahuan pactachu Seolman rirca. Ashtahuanpish jatun macanacuipi macanacuna espadacunata apashpami Seolman rirca. Espadata saunashpami siricurca. Cai pachapi sinchi runacunata manchachishpa causashcamantami paicunapac tullucunataca llaquichinga.

²⁸ Egipto llactata jatun mandaclla, canca circuncisionta mana ruhuashcacunahuan, jatun macanacuipi huañushcacunahuan pactami enterrashca cangui.

²⁹ Edom llactapish jatun mandaccunandi, quipa mandaccunandimi chaipi siricun. Paicunaca yalli sinchi cashpapish jatun macanacuipi huañushcacunahuan, circuncisionta mana ruhuashcacunahuan pactami enterrashca siricun.

³⁰ Jahua lado llacta mandaccunapish, Sidón llactapi causaccunapish chaipimi siricun. Paicunaca yalli sinchi cashpapish mana alli nishca tucushpami, circuncisionta mana ruhuashcacunahuan, jatun macanacuipi huañushcacunahuan pacta enterrashca siricun.

³¹ Faraonca cai tucui paipac gentecuna huañushcata ricushpami cushicunga. Faraonpish, paipac tucui soldadocunapish, jatun macanacuipimi huañunga.

³² Ñucami Faraontaca cai pachapi causaccunata manchachishpa causachun mandarcani. Shina cashpapish Faraonpish, paipac gentecunapish, jatun macanacuipi huañushcacunahuan, circuncisionta mana ruhuashcacunahuan pactami enterrashca canga» nirca.