EZEQUIEL 31 - Dios Rimashcata Quillcashcami

Jatun mandacta cedro yurahuan chimbapurashcamanta

¹ Chunga shuc huata, quimsa quilla, punta punzhapi Mandac Dios ñucata rimashpaca:

² «Huañunalla runa, Egipto llactata jatun mandac Faraontapish, tucui gentecunatapish rimashpaca: “Cambac podertaca, ¿imahuantac chimbapurasha?

³ Riqui, Líbano llacta tucuita llanduc jatun cedro yura shinami cangui. Chai yura ñahuica puyucamanmi carca.

⁴ Chai yurataca tamyapish, allpa ucu yacupishmi huiñachirca. Paipac jatun yacucunaca paipac muyundita rishpami, shuctac yuracunatapish parcurca.

⁵ Paica achca yacuhuan cashcamantami tucui yuracunata atishpa, yalli jatun tucurca.

⁶ Chai ramapimi tucui volac animalcunapish cuzhata ruhuarca. Chai rama ucupica sacha animalcunami huacharca. Tauca llactacunami chai yura ucupi llandurirca.

⁷ Chai yuraca yacu patapi cashcamantami yalli ramasapa tucushpa, yallita huiñashpa sumaimana tucurca.

⁸ Chai yuraca Diospac huertapi tiyac cedro yuracunatapish, ciprés yuratapish yalli sumacmi carca. Castaño yuracunapish mana pai shina ramasapachu carca. Diospac huertapica maijan yurapish mana pai shina sumacca tiyarcachu.

⁹ Ñucami ramasapa sumac yurata ruhuarcani. Chaimantami Diospac Edén huertapi tiyac yuracunapish envidian.

¹⁰ Chaimantami Mandac Diosca: Chai yuraca tucui yuracunata yalli jatunyashpa, ñahuipish puyucaman cashpami shungupi jatun tucurca.

¹¹ Chaimantami paitaca shuctac llacta sinchi millai gentecunapac maquipi churarcani. Chaimantami yallita llaquichinga. Chaita ruhuachunmi ñucaca shitashpa saquircani.

¹² Caru llacta millai gentecunami pitishpa shitanga. Chai sumaimana ramacunaca urcucunapi, pambacunapi, tucui llactacunapi tiyac jatun yacucunapi urmanga. Shinallatac shuctac llacta gentecuna chai yura ucupi llandurishpa causacushpapish shitashpami ringa.

¹³ Chai urmashca yura sapi ucupica tucui volac animalcunami causanga. Chai ramacuna ucupica sacha animalcunami siriringa.

¹⁴ Chaica, ima yurapish mashnata parcushca cashpapish ama yalli jatun tucuchun, yura ñahuipish shuctac yuracunata ama atichun, yacuhuan cashpapish ama yalli huiñachunmi chashnaca tucunga. Tucui yurami huañushpa, cai pacha allpa ucupi caccunahuan pacta cangapac ringa.

¹⁵ Cutinllatac Mandac Diosca: Chai yura Seolman ri punzhami allpa ucupi tiyac yacutaca chaquichisha. Uchilla yacucunatapish, jatun yacucunatapish jarcashami. Líbano urcutapish pura tutahuanmi tapasha. Pambapi shayacuc yuracunapish chaquishpami urmanga.

¹⁶ Chai yurata tigrachicpimi, tucui llactapi causaccunaca chucchunga. Huañushcacunahuan pacta Seolman cachacpica, Edén huertapi tiyac acllashca yuracunapish, Líbano urcupi tiyac tucuimanta yalli sumac yuracunapish, yacuta sungac yuracunapish cushicungami.

¹⁷ Chai yuracunapish, chai yurahuan pactami Seolman urai ringa. Jatun macanacuipi huañuchishcacunapish, paita ayudac, paihuan apanacuc shuctac llactacunapish, tucuimi urai ringa.

¹⁸ Can sumac cashcatapish, jatun tucushca cashcatapish, ¿Edén huertapi tiyac yuracunamantaca maijan yurahuantac chimbapurashayari? Ashtahuanpish Edén huertapi tiyac yuracunandimi allpa ucupi shitashca cangui. Circuncisionta mana ruhuashca gentecunahuan, jatun macanacuipi huañushcacunahuan pactami ucuman ringa. Cai yuraca Faraonmantapish, chaipi causac gentecunamantapishmi nisha nin” ninmi ningui» nirca.