EZEQUIEL 30 - Dios Rimashcata Quillcashcami

Egipto llacta llaqui tucunamanta

¹ Mandac Dios ñucata rimashpaca:

² «Huañunalla runa, ñuca rimashcata huillashpa: “Mandac Diosca: Llaquirishpa: ‘¡Mandac Dios llaquichi punzhapica, imachari tucushun’ nishpa huacaichicyari!

³ Ñuca llaquichina punzhaca caillapimi, ñami chayamucun. Chai llaquichicui punzhaca puyu tapashcami canga.

⁴ Egipto llactaman jatun macanacui chayamushpa, taucata huañuchicpica, Etiopía llactapica yalli manchaimi tiyanga. Paicuna charishcacunatapish quichungami. Huasicunatapish callari rumicamanmi tucuchinga.

⁵ Etiopía, Libia, Lidia llactapi causaccunapish, Arabia, Cub llactacunapi causaccunapish, Egipto llactahuan apanacuc llactacunapish jatun macanacuipimi huañunga.

⁶ Cutinllatac Mandac Diosca: Egipto llactata ayudac gentecunaca huañungami. Paicuna jatun tucushpa, mandacushcapish chingaringami. Migdol llactamanta Asuán llactacamanmi jatun macanacuipi huañunga. Chaitaca Mandac ñucami nini” ninmi ningui.

⁷ Egipto llactataca tucui llactamanta yalli llaquinayaitami saquisha. Llactacunapish tucui pueblocunamanta yalli llaquinayaimi shitashca pamba saquiringa.

⁸ Egipto llactapi ninata japichishpa, paita ayudaccunandi tucuchicpimi, ñucataca Mandac Dios cashcata yachangacuna.

⁹ Chai huatacunapica huillaccunami barcocunapi imatapish mana manchac Etiopía llactata manchachingapac ringa. Egipto llactata llaquichicpi, mancharishca shinallatacmi mancharinga. ¡Chai punzhaca ñami chayamun!

¹⁰ Cutinllatacmi Mandac Diosca: Egipto llactapi causaccunataca Babilonia llactata jatun mandac Nabucodonosorpac maquipi churashpami tucuchisha.

¹¹ Nabucodonosormi paipac gentecunahuan, paipac sinchi soldadocunahuan shamushpa, Egiptopi causaccunata espadacunahuan huañuchishpa, chai llactapi jundachinga.

¹² Nilo yacutapish chaquichishami. Chai llactataca mana allita ruhuac runacunapac maquipimi saquisha. Chaipi tiyashcacunataca caru llacta gentecunami tucuchinga. Chaitaca Mandac Dios ñucami nini.

¹³ Cutinllatac Mandac Diosca: Menfis llactapi tiyac ruhuashcalla dioscunatapish, imaman riccha dioscunatapish tucuimi chingachisha. Egipto llactata mandacca tucuringami. Chai llactapica yalli manchaillami tiyanga.

¹⁴ Patros llactatapish llaquinayaitami tucuchisha. Zoán llactapica ninatami japichisha. Tebas llactataca cashcata ruhuashpami taripashpa llaquichisha.

¹⁵ Yallita piñarishpami Sin llactatapish, Egipto llacta pircacunatapish tucuchisha. Tebaspi tiyaccunatapish tucuchishami.

¹⁶ Egiptopica ninatami japichisha. Sin llactapi causaccunaca sajuarina nanaihuan shinami canga. Tebas llactaca ñutuchishcami canga. Cutin Menfis llactapi causaccunaca punzhantami llaquihuan canga.

¹⁷ Avén, Pibeset llactacunapi causac mosocunaca jatun macanacuipimi huañunga. Maijancunataca prezumi apanga.

¹⁸ Jatun tucushca Egipto llactata llaquichicui punzhami Tafnes llactapica punzha tutayanga. Chaipimi jatun tucushca mandacca tucuringa. Chai llactataca manchana puyumi tapanga. Muyundi uchilla llactapi causaccunataca prezumi apanga.

¹⁹ Egipto llactataca cashcata ruhuashpami llaquichisha. Shina ruhuacpimi, ñucataca Mandac Dios cashcata yachangacuna» nirca.

²⁰ Chunga shuc huata, callari quilla, canchis punzhapi Mandac Dios ñucata rimashpaca:

²¹ «Huañunalla runa, Egipto llactata jatun mandac Faraonpac shuc rigratami paquircani. Riqui, chaitaca mana jambishcachu, mana huatachishcachu. Chai rigra alli tucushpa, espadata japichunpish mana jambishcachu.

²² Chaimantami Mandac Dios ñucaca: Egipto llactata jatun mandac Faraontaca, paipac alli rigratapish, paquishca rigratapish paquishami. Chashnami maquipi charicuc espadataca cacharichisha.

²³ Egipto runacunataca shuctac llactacunaman, shuctac pueblocunamanmi shic-huashpa cachasha.

²⁴ Babilonia llactata jatun mandacpac rigrata sinchiyachishpami, ñucapac espadata paipac maquipi churasha. Ashtahuanpish ñucami Faraonpac rigrataca paquisha. Shina ruhuacpimi, huañunalla tucushpa, chai mandacpac ñaupapi yallita huacanga.

²⁵ Babilonia llactata jatun mandacpac rigrata sinchiyachishpami, Faraonpac rigrataca fuerza illacta saquisha. Babilonia llactata jatun mandacpac maquipi ñuca espadata churashpami, Egipto llactata llaquichisha.

²⁶ Egipto runacunataca shuctac llactaman, shuctac pueblocunamanmi shic-huashpa cachasha. Chaita ricushpami, ñucataca Mandac Dios cashcata yachangacuna nini» nirca.