EZEQUIEL 29 - Dios Rimashcata Quillcashcami

Egipto llacta llaqui tucunamanta

¹ Chunga huata, chunga quilla, chunga ishcai punzhapi Mandac Dios ñucata rimashpaca:

² «Huañunalla runa, Egipto llactata ricushpa, chai llactapish, jatun mandac Faraonpish llaqui tucunata huillashpa:

³ “Mandac Diosca: Egipto llactata jatun mandac Faraonlla, canhuanca piñarishcami cani. Canca yacu chaupipi tiyacuc dragón shinami cangui. Canca: ‘Nilo yacuca ñucapacmi, ñucami ruhuarcani’ ninguimi.

⁴ Chaimantami ñucaca ganchota cambac jazhapi churashpa, challuacunata cambac escamapi llutachishpa jatun yacumanta tauca challuacunandi llucchisha.

⁵ Shina llucchishpami cantapish, cambac yacupi tiyac challuacunatapish shitashca pambapi shitasha. Chai pambamantaca pipish mana japingachu, pipish mana enterrangachu. Sacha animalcuna, jahuata volac animalcuna micuchunmi saquisha.

⁶ Shina ruhuacpimi, Egiptopi causaccunaca ñucataca Mandac Dios cashcata yachangacuna. Egiptopi causaccunaca israelcunapacca carrizo tauna shinami carca.

⁷ Paicuna tuparicllapimi paquirishpa, rigrata paquircangui. Paicuna ayudaricpica, paquirishpami lomo tulluta paquircangui.

⁸ Chaimantami Mandac Dios ñucaca: Ñucaca canta llaquichichunmi espadata apamuni. Chaihuanmi gentecunatapish, animalcunatapish tucuchisha.

⁹ Egipto llactaca llaquinayaita tucuchishca, shitashcami saquiringa. Shina ruhuacpimi, ñucataca Mandac Dios cashcata yachangacuna. Canca: ‘Nilo yacuca ñucapacmi, ñucami ruhuarcani’ nircanguimi.

¹⁰ Chaimantami ñucaca canhuanpish, tucui jatun yacucunahuanpish yallita piñarishca cani. Egipto llactataca Migdolmanta, Asuán llactacaman, Etiopía llacta linderocamanmi llaquinayai shitashca pambata saquisha.

¹¹ Chai llactataca gentecunapish, animalcunapish mana pasangachu. Chuscu chunga huatacamanmi shitashca siricunga.

¹² Egipto llactataca tucui llactamanta yalli llaquichishpami shitashca pambata saquisha. Llactacunatapish tucui llactamanta yallitami llaquichisha. Chashnami chuscu chunga huatacaman shitashca saquiringa. Egipto llactapi causaccunataca shuctac llactacunamanmi shic-huashpa cachasha.

¹³ Shinallatac Mandac Dios ñucaca: Egipto gentecunataca chuscu chunga huata quipami caimanta, chaimanta tandachisha.

¹⁴ Egiptomanta prezu apashcacunata cutichimushpami, paicuna huacharishca Patros llactallaman pushasha. Chaipimi uchilla llactata ruhuashpa causanga.

¹⁵ Shuctac jatun llactacunahuan chimbapuracpica, yangalla llactami canga. Ña mana shuctac llactacunata llaquichingapac jataringachu. Ashtahuanpish ñucami paicunataca shuctac llactacunata ama mandashpa causachun, ashallata saquisha.

¹⁶ Israelcunaca Egipto gentecunapi mana ashtahuan shunguta churangachu. Ashtahuanpish paicunata catishpa juchallishcataca mana yuyaringachu. Shina ruhuacpimi, ñucataca Mandac Dios cashcata yachangacuna nini” ninmi ningui» nirca.

¹⁷ Ishcai chunga canchis huata, callari quilla, callari punzhapi Mandac Dios ñucata rimashpaca:

¹⁸ «Huañunalla runa, Babilonia llactata jatun mandac Nabucodonosorca Tiro llactata atina yuyaihuanmi caita, chaita ruhuarca. Chaimantami paica uma acchapish pilarishca, huasha lomotapish chugririshca. Chashna Tiro llactata llaquichishcamantaca paipish, paipac soldadocunapish imata mana japircachu.

¹⁹ Chaimantami Mandac Dios ñucaca: “Egipto llactataca Babilonia llactata jatun mandac Nabucodonosorpac maquipimi churani. Paimi chai llactapi imalla tiyashcacunatapish, macanacushpa quichumushcacunatapish tucuita japishpa, paipac soldadocunaman cunga.

²⁰ Paipac soldadocunahuan Tiro llactata llaquichishcamantami Egipto llactataca curcani. Paicunaca ñucamanmi allita ruhuarca. Chaitaca Mandac Dios ñucami nini” ninmi.

²¹ Chai punzhacunami israelcunataca cutin sinchiyachisha. Ezequiel, canmi paicunapac chaupipi rimangui. Chaita ruhuacpimi, ñucataca Mandac Dios cashcata yachangacuna» nirca.