EZEQUIEL 28 - Dios Rimashcata Quillcashcami

Tiro llactata mandac llaqui tucunamanta

¹ Mandac Dios ñucata rimashpaca:

² «Huañunalla runa, Tiro llactata mandactaca: “Mandac Diosca: Canca shungupi jatun tucushpami: ‘Ñucami dios cani. Chaimantami dioscunapac tiyarinapi tiyarishpa, mama cucha chaupipi tiyacuni’ nircangui. Canca runallami cangui. Mana dioschu cangui. Chashna cashpapish, cambac shungupi dios cashcatami yuyangui.

³ ¿Canca Danielta yalli yachacchu cangui? ¿Canca mana yachaipac, imapish pacallata yachanguichu?

⁴ Canca alli yachac, alli yuyaiyuc cashpami yalli chayucyashpa curitapish, cullquitapish achcata huacaichircangui.

⁵ Catunata, randinata alli yachashpami, yallita chayucyarcangui. Chaimantami cambac shungupica jatun tucushcangui.

⁶ Chaimantami Mandac Dios ñucaca: Cambac shungupi dios shina yachacmi cani yuyashcamantami

⁷ shuctac llactamanta alli sinchi, millai runacunata cachasha. Paicunami espadata llucchishpa, can alli yachac cashcatapish, can sumac cashcatapish yangata ruhuashpa tucuchinga.

⁸ Canca manchana jutcumanmi urai ringui. Chashnami mama cucha chaupipi huañuccuna shina huañungui.

⁹ ¿Canca huañuchiccunapac ñaupapica: ‘Diosmi cani’ ni pudinguichu? ¡Canca huañuchiccunapac ñaupapica runallami cangui! ¡Mana dioschu cangui!

¹⁰ Circuncisionta mana ruhuaccuna shinami, shuctac llacta gentecunapac maquipi huañungui. Chaitaca Mandac Dios ñucami nini” ninmi ningui» nirca.

Tiro llactata jatun mandac llaqui tucunamanta

¹¹ Mandac Dios ñucata rimashpaca:

¹² «Huañunalla runa, Tiro llactata jatun mandac llaqui tucunamanta llaquipi cantana cantota cantashpa: “Mandac Diosca: Canca tucuimanta yalli alli, mana pandaric, yallita yachacmi carcangui.

¹³ Canca ñucapac Edén huertapimi carcangui. Canca cornerina, topacio, diamante, crisólito, ónice, jaspe, zafiro, turquesa, berilo tucuilaya sumac rumicunahuan allichishca churanahuami carcangui. Cambac churana esquinacunapi tiyac zarcillocunaca curimi carca. Can callarishca punzhamanta pachami chashna allichishca carcangui.

¹⁴ Canca Mandac Diospaclla urcupica querubín cuidashcami carcangui. Nina rupacuc rumi chaupipimi purircangui.

¹⁵ Canpica callarishca punzhamanta pachami ima millana mana tiyarca. Shina cashpapish quipaca canpica mana allitami ricurcani.

¹⁶ Yallita catushpa, randishpa causashpami yalli mana allita ruhuashpa juchallircangui. Cuidac querubinmi cantaca Mandac Dios ñucapaclla urcumantapish, nina rupacuc rumi chaupimantapish anchuchirca.

¹⁷ Canca sumac cashpami, shungupi jatun tucurcangui. Achiclla shina sumac cashpami, alli yachaitapish yangallata ruhuarcangui. Cantaca jatun mandaccunapac ñaupapi pambaman shitashpami, tucuipac asinata ruhuasha.

¹⁸ Can yallita charingaraicu catushpa, randishpa llaquichishpami cambac diospac huasita yangapi churashpa juchallircangui. Chaimantami pueblo chaupipi ninata japichishpa, tucuita tucuchisha. Cai pacha tucuipac ñaupapimi cantaca uchupallata saquisha.

¹⁹ Chaimantami tucui canta ricsiccunaca mancharinga. Canca jatun mancharina tucushpami huiñaipac tucuringui” ninmi ningui» nirca.

Sidón llacta llaqui tucunamanta

²⁰ Mandac Dios ñucata rimashpaca:

²¹ «Huañunalla runa, Sidón llacta ladota ricushpa, chai llacta llaqui tucunata huillashpa:

²² “Mandac Diosca: Sidón llactalla, canhuanca piñarishcami cani. Canta llaquichishpami jatunyachishca casha. Chashnami ñucaca jucha illac cashcata ricuchisha. Shina ruhuacpimi, ñucataca Mandac Dios cashcata yachangacuna.

²³ Canta llaquichichunmi ungüita cachasha. Cutin ñancunapica yahuarmi siricunga. Tucui ladopimi espadahuan huañuchishca siricunga. Chaita ricushpami, ñucataca Mandac Dios cashcata yachangacuna.

²⁴ Mandac Diosca: Israelcunataca paicunapac muyundipi causaccunapish, piñaccunapish mana ashtahuan casha aspic shina, auja tucsic shina nanachingachu. Chaimantami ñucataca Mandac Dios cashcata yachangacuna.

²⁵ Mandac Diosca: Ñucaca shuctac gentecunapac chaupipi causacuc israelcunataca tandachishami. Chashna ruhuashpami, llactapi causaccunapac ñaupapica jucha illac cashcata ricuchisha. Israelcunaca paicunapac llactapimi causanga. Chai llactataca ñucata servic Jacobomanmi curcani.

²⁶ Chai llactapimi imatapish mana manchashpa, huasicunata shayachishpa, uvas tarpushpa causanga. Chai llactapica imatapish mana manchashpami causanga. Chai muyundipi causaccunata cashcata ruhuashpa, ñuca llaquichicpimi, chashnaca causanga. Chaita ricushpami, ñucataca Mandac Dios cashcata yachangacuna” ninmi ningui» nirca.