EZEQUIEL 27 - Dios Rimashcata Quillcashcami

Tiro llacta llaqui tucunamanta

¹ Mandac Dios ñucata rimashpaca:

² «Huañunalla runa, Tiro llacta llaqui tucunamanta llaquipi cantana cantota cantai.

³ Can chai mama cucha ladopi tiyac llactacunahuan catushpa, randishpa causac Tiro llactamanta cantashpaca: “Mandac Diosca: Tiro llactalla, canca: ‘Tucuimanta yalli sumacmi cani’ nishpami yuyangui.

⁴ Canca tucui mama cuchatami mandangui. Canta callarichiccunaca shuc sumac barcota apac pañota shinatami ruhuarca.

⁵ Senir urcumanta ciprés tablahuanmi ruhuarca. Pilarcunataca Líbano urcumanta cedro caspihuanmi ruhuarca.

⁶ Barcota purichinacunataca Basán llactamanta encina caspimantami ruhuarca. Catataca Quitim llactamanta pino caspihuan, marfilhuanmi ruhuarca.

⁷ Barcota apac pañoca Egiptopi bordashca sumac pañomi carca. Carpaca mama cucha ladopi cac Elisa llactamanta azul, yana puca telami carca.

⁸ Barcota purichiccunaca Sidón, Arvad llactacunamantami carca. Tiro llactalla, chai purichiccunaca allita yachac runacunami carca.

⁹ Barco dañarishcata allichiccunaca Gebalmanta alli yachac, yuyac runacunami carca. Barcocunapish, barcota purichiccunapish randingapac, catungapacmi shamurca.

¹⁰ Cambac macanacunata alli yachac soldadocunaca Persas, Lidia llactacunamantami carca. Escudocunatapish, cascocunatapish pircapimi huarcurca. Chaicunami cantaca sumacta allichirca.

¹¹ Arvad llacta soldadocunami pirca jahuapica muyundita shayacurca. Gamad llacta runacunami torre jahuapica shayacurca. Paicunapac escudocunataca muyundi pircapimi huarcurca. Chaicunahuanmi sumaimana carcangui.

¹² Can tucuilayata charicpimi, Tarsispi causaccunaca cullquihuan, fierrohuan, estañohuan, plomohuan plazacunapi randingapac shamurca.

¹³ Grecia, Tubal, Mesec llacta gentecunahuanmi randishpa, catushpa causarcangui. Paicunaca gentecunahuan, broncemanta ruhuashcacunahuanmi randic carca.

¹⁴ Bet-togarma llacta gentecunaca yanga caballocunahuan, macanacuna caballocunahuan, mulacunahuanmi randic carca.

¹⁵ Rodas llactamanta gentecunapish, mama cucha ladopi causaccunapish canhuanmi catushpa, randishpa causac carca. Paicunaca marfil quirucunata, ébano caspicunatami canman apamuc carca.

¹⁶ Canca yallitami charircangui. Chaimantami Edom llacta gentecunapish canhuan randishpa, catushpa causac carca. Paicunaca perlascunata, yana puca telacunata, bordashca churanacunata, tucuimanta yalli alli lino telacunata, coralta, rubíes rumicunata apashpami, randingapac shamuc carca.

¹⁷ Judá llacta gentecunapish, israelcunapish canhuanmi catushpa, randishpa causac carca. Paicunaca plazacunapica trigohuan, mirrahuan, mishquihuan, aceitehuan, resinahuanmi randic carca.

¹⁸ Can tucuilayata charishcamantami Damasco gentecunapish canhuan randishpa, catushpa causac carca. Paicunaca Helbón llactamanta vinohuan, yurac millmahuanmi randic carca.

¹⁹ Dan llacta gentecunapish, Grecia gentecunapish Uzal llactamantami cambac charishcacunahuan cambiangapac sumacta allichishca fierrohuan, canelahuan, mishqui ashnacuc huiruhuan shamuc carca.

²⁰ Dedán llacta gentecunapish caballo parejocunahuanmi randic carca.

²¹ Arabia gentecunapish, Cedar llactata mandaccunapish, malta ovejacunahuan, carnero ovejacunahuan, cari chivocunahuanmi randic carca.

²² Sabá llactatapish, Raama llactapish, canhuanmi randishpa, catushpa causac carca. Paicunaca tucuimanta yalli valishca mishquilla ashnacuc-huan, tucuilaya alaja rumicunahuan, curihuanmi randic carca.

²³ Harán, Cane, Edén, Sabá llactamanta randiccunapish, Asiria, Quilmad llacta gentecunapish, canhuanmi randishpa, catushpa causac carca.

²⁴ Paicunaca azul churanacunahuan, bordashca churanacunahuan, yana puca sumac churanacunahuan, tucuilaya pañocunahuan, trenzashca sumac cordoncunahuanmi randic carca.

²⁵ Tarsismanta jatun barcocunami randishcacunataca apac carca. Canca mama cucha chaupipi achca cargacuna jundachishca barco shinami carcangui.

²⁶ Barcota purichiccunami cantaca jatun yacu chaupiman aparca. Inti llucshina ladomanta huaira shamushpami, mama cucha chaupipi cantaca paquirca.

²⁷ Llaquichina punzhapica, cambac charishcapish, catunacunapish, imalla tiyaccunapish, barcota purichiccunapish, barco dañaricpi allichiccunapish, catunata cuidaccunapish, soldadocunapish, tucui cambac gentecunapish, mama cucha chaupipimi tucuringa.

²⁸ Barcopi caccuna yallita caparicpimi, mama cucha muyundipi causaccunapish,

²⁹ barcota purichiccunapish, chucchushpa, barcomanta uricunga. Mama cuchapi jatun barcota purichiccunapish, caspihuan purichiccunapish allpapimi saquiringa.

³⁰ Canmantami llaquinayaita caparishpa huacashca uyaringa. Umapi allpata churashpami, uchupapi singunga.

³¹ Canmantami acchata pitirishpa, sharpa churanata churaringa. Canmantaca shungupi llaquirishpami, yallita huacanga.

³² Canmanta llaquipi cantana cantota cantashpaca: ‘Mama cucha chaupipi cac Tiro llacta shinaca, ¿pitac tiyarcayari?’ ningami.

³³ Cambac jatun barcocunapi apashca catunacunaca achca gentecunatami cushichirca. Jatun mandaccunapish, cambac charishcahuan, can catushcacunahuanmi yallita charicyarca.

³⁴ Cunanca mama cucha chaupipimi cambac catunacunapish, tucui cambac gentecunapish canhuan pacta yacupi tucurishca.

³⁵ Chashna llaqui tucushcata ricushpami, mama cucha ladopi cac llactacunapi causaccunapish, jatun mandaccunapish mancharishpa chucchunga. Paicunapac ñahuicunapish, cera tucushpami saquirin.

³⁶ Shuctac llacta catuccunapish can llaqui tucushcata ricushpaca silbangacunami. Canca jatun mancharinami tucungui, huiñaipacmi chingaringui” ninmi ningui» nirca.