EZEQUIEL 26 - Dios Rimashcata Quillcashcami

Tiro llactata llaquichinamanta

¹ Chunga shuc huata, callari quilla, punta punzhapi Mandac Dios ñucata rimashpaca:

² «Huañunalla runa, Tiro llactapi causaccunaca Jerusalén llaqui tucushcata ricushpaca: “¡Llactacunapac pungu shina, Jerusalenca tucurishcami! ¡Chai llacta tucuricpica, ñucami achcata charisha, Jerusalenca shitashcami! ¡Allita chashna tucurca!” nircami.

³ Chaimantami Mandac Dios ñucaca: Tiro llactahuanca piñarishcami cani. Ñucami canta llaquichichun llactacunata cachagrini. Paicunaca mama cucha jatarishpa shamuc shinami tucuchinga.

⁴ Paicunami Tiro llacta pircacunatapish tuñishpa, torrecunatapish ñutuchinga. Chashnami ñuto allpatapish pichashpa, llambuclla rumi shinata saquisha.

⁵ Mama cucha chaupipi tiyac linchicunata chaquichina pamba shinami tucunga. Ima tiyashcacunataca shuctac llacta gentecunami quichushpa apanga. Mandac Dios ñucami nini.

⁶ Mama cucha patapi causaccunaca jatun macanacuipimi huañunga. Chaita ricushpami, ñucataca Mandac Dios cashcata yachanguichic.

⁷ Mandac Dios ñucaca: Tiro llactata llaquichichunca, jahua Babilonia llactata jatun mandac Nabucodonosortami pushamusha. Paica jatun mandaccunatapish jatun mandacmi. Paimi achca caballocunahuan, carretacunahuan, caballopi ric soldadocunahuan, achca runacunahuan shamunga.

⁸ Paicunami mama cuchapi causaccunataca espadahuan huañuchinga. Torrecunata muyundipi shayachishpa, macanacuna pushtucunata ruhuashpami, escudocunahuan sinchita macanacunga.

⁹ Pircacunata tuñingapacca ariete nishcacunahuan, torrecunata urmachingapacca barretahuanmi shamunga.

¹⁰ Yalli achca caballocuna shamushpami, polvota jatarichishpa tucui llactata tapanga. Caballocuna sarushpa, carreta ruedacuna tarac nishpa shamucpimi, muyundi pircacunapish chucchunga. Chashnami llactaman yaicunata, pirca tallirishcata yaicunga.

¹¹ Caballocunaca tucui ñancunatami sarushpa puringa. Gentecunataca espadahuanmi huañuchinga. Sinchi rumi pilarcunatapish tigrachingami.

¹² Ima charishcacunatapish, ima catushcacunatapish quichushpami apanga. Pircacunatapish urmachishpami, sumac huasicunatapish tucuchinga. Rumicunatapish, caspicunatapish, ñuto allpatapish yacu chaupipimi shitanga.

¹³ Chashnami cantaccunatapish, arpapi tocaccunatapish tucuchisha. Chaicunaca jaicapi mana uyaringachu.

¹⁴ Llambuclla rumita shinami saquisha, linchicunata tendina pambata shinami saquisha. Jaicapi mana llacta tucunguichu. Chaitaca Mandac Dios ñucami nini.

¹⁵ Mandac Dios ñuca, Tiro llactataca: Canta tigrachicpi, achca runacuna huañucpi, caparinacui uyaricpica, ¿manachu mama cucha patapi causaccunapish mancharingacuna?

¹⁶ Jatun llaquita uyashpaca, mama cucha patapi causac jatun mandaccunapish mandashpa tiyanamanta anchurishpami, jahualla churanatapish, bordashca churanatapish llucchinga. Chaimantaca duelo churanata churarishpami, allpa jahuapi tiyarishpa chucchucunga. Chashnami can llaqui tucushcamantaca tucunga.

¹⁷ Can llaqui tucushcamanta llaquipi cantana cantota cantashpaca: “¡Alli nishca llactalla, ima shinatac chingarircanguiyari! ¡Mama cucha muyundi pueblopi causac achca gentecuna causanami carcangui! Mama cucha muyundipi causaccunapac manchanami carcangui. Chaipi causaccunatapish, muyundipi causaccunatapish manchachishpami causarcangui” ningui.

¹⁸ Cunan llaqui tucucpica, mama cucha patapi causaccunapish, islacunapish, chucchushpami mancharinga.

¹⁹ Mandac Dios ñucaca: Canca pipish mana causana llactacuna shinami, llaquinayaita shitashca saquiringui. Mama cuchamanta yacuta cachashpami cantaca tucuchisha.

²⁰ Shinami huañushcacunahuan pacta ucuman cachasha. Ñaupa huata gentecunahuan pactami enterrashca cangui. Ñaupa punzhacunapi enterrashca shinami, allpa ucupi cangui. Chashna ruhuacpimi, cai allpapica pipish ña mana causanga.

²¹ Cantaca jatun mancharinatami ruhuasha. Ña mana causanguichu. Canta mashcashpapish jaicapi mana taringacunachu. Chaitaca Mandac Dios ñucami nini» nirca.