EZEQUIEL 25 - Dios Rimashcata Quillcashcami

Amón llactata llaquichinamanta

¹ Mandac Dios ñucata rimashpaca:

² «Huañunalla runa, amonitacunapac ladota ricushpa, paicunata llaqui tucunata huillashpa,

³ amonitacunataca: “Mandac Dios rimashcata uyaichic. Paica: Ñucapaclla huasita yangapi churashcatapish, Israel llactata llaquinayaita tucuchishcatapish, Judá llactapi causaccunata prezu apashcatapish ricushpaca: ‘¡Allita chashna tucurca!’ nircanguichicmi.

⁴ Chaimantami cancunataca inti llucshina ladopi causaccunapac maquipi churani. Paicunami cancunapac llactapica carpa huasicunata shayachishpa causanga. Cancuna tarpushca granotapish paicunami micunga, lechetapish paicunami ubianga.

⁵ Rabá llactataca camellocuna michina pambata, Amón llacta pueblocunataca ovejacuna michina pambatami ruhuanga. Shina ruhuacpimi, ñucaca Mandac Dios cashcata yachanguichic.

⁶ Mandac Dios ñucaca: Israel llactata burlashpa, maquita huactashpa, saltashpa asircanguichicmi.

⁷ Chaimantami ñuca maquita alzashpa cancunata llaquichisha. Cancuna imata charishcatapish quichushpa apachunmi, shuctac llactacunapac maquipi churasha. Cancunataca llactacunapac chaupimanta, pueblo chaupimanta llucchishpami tucuchisha. Shina ruhuacpimi, ñucataca Mandac Dios cashcata yachanguichic nini.

Moab llactata llaquichinamanta

⁸ Mandac Diosca: Moab, Seir llactacunapi causaccunaca: ‘¡Judá llactaca shuctac llactacuna shinallatacmi!’ nincunami.

⁹ Chaimantami Moab llactata jarcashcata pascashpa tucuchic gentecuna cachagrini. Chashna ruhuacpimi, Paicunapac munashca Bet-jesimot, Baal-maón, Quiriataim llactacunata tucuchinga.

¹⁰ Inti llucshina ladopi causaccunamanmi Moab llactatapish, amonitacunatapish cusha. Chashna cucpimi, amonitacunataca pipish mana ashtahuan yuyaringa.

¹¹ Moab llactapi causaccunatapish taripashpa llaquichishami. Shina ruhuacpimi, ñucataca Mandac Dios cashcata yachangacuna.

Edom llactata llaquichinamanta

¹² Mandac Diosca: Edom llactapi causaccunaca Judá llactapi causaccunata yallita llaquichishpami juchallishca.

¹³ Chaimantami Mandac Dios ñucaca Edom llacta ladota maquita alzashpa gentecunatapish, animalcunatapish tucui tucuchisha. Temán llactamantaca Dedán llactacamanmi jatun macanacuita cachashpa tucuchisha.

¹⁴ Edom llactataca ñuca acllashca israelcunami llaquichinga. Paicunami chai llactataca ñuca yallita piñarishpa llaquichicuc shinallatac llaquichinga. Shina ruhuacpimi, ñuca ima shina llaquichic cashcata yachangacuna.

Filisteocunata llaquichinamanta

¹⁵ Mandac Diosca: Filisteocunaca utcapi piñanacushcata mana cungarishpa, chai yuyailla puricushpami Judá llactata llaquichirca. Chaimantami yallita piñarishpa llaquichirca.

¹⁶ Chaimantami filisteocunataca llaquichisha. Ñuca maquita alzashpa cereteocunatapish, mama cucha ladopi causaccunatapish tucuchisha.

¹⁷ Paicunatami yallita piñarishpa, llaquichisha. Chashna yallita llaquichicpimi, ñucataca Mandac Dios cashcata yachangacuna” ninmi ningui» nirca.