EZEQUIEL 24 - Dios Rimashcata Quillcashcami

Timbucuc mangahuan chimbapurashcamanta

¹ Iscun huata, chunga quilla, chunga punzhapi Mandac Dios ñucata rimashpaca:

² «Huañunalla runa, cunan mashna punzha cashcata quillcai. Cunan punzhami Babilonia llactata jatun mandacca Jerusalenta llaquichingapac muyucun.

³ Chai mana cazuc gentecunataca chimbapurashca parlohuan yachachishpa: “Mandac Diosca: Mangata nina jahuapi shayachishpa yacuta churai.

⁴ Quipaca huasha lomo, mama changa alli aichata, alli tulluta pitinacushpa jundachi.

⁵ Shinallatac alli ovejata acllai. Chai quipaca yantata jundachishpa, tullucuna alli yanuringacaman timbuchi.

⁶ Mandac Diosca: ¡Aij, huañuchic llactalla! ¡Yanayashca manga shina llactalla! ¡Yanayashcaca maita mana anchuchipacchu! Chai aichataca callarishpa tucuita llucchi.

⁷ Cai llactaca yahuarpi cahuirishcami. Chai yahuarta allpa tapachunpish mana allpapi tallircachu, ashtahuanpish llambuclla rumi jahuapimi tallishca.

⁸ Ñuca piñarishpa, paicuna llaquichishca shina llaquichingapacmi, chai yahuartaca llambuclla rumi jahuapi tallircani. Chaipica mana ñuto allpa tapangachu.

⁹ Chaimantami Mandac Diosca: ¡Aij, huañuchic llactalla! ¡Ñucapish cantaca rupacuc ninahuanmi tucuchisha!

¹⁰ Achca yantata churashpami aicha apyangacaman timbuchisha. Tullucunatapish rupachishami.

¹¹ Chushaclla mangataca nina jahuapi churashpami, chai mangapi tiyac mapatapish, yanayashcatapish rupachisha.

¹² Manga yanayashcaca mana llucshipacchu. Ashtahuanpish ninallahuanmi llucshinga.

¹³ Canca millaita ruhuashpami mapayarcangui. Ñuca cambac mapata pichasha nicpipish, canca manatac munarcanguichu. Canta llaquichishpa, ñuca yallita piñarishcata pasachingacaman manatac chuyayanguichu.

¹⁴ Ñuca huillashcataca pactachishatacmi. Llaquichishatacmi. Mana llaquishachu, mana tigrarishpa ricushachu. Can imata ruhuashpa, causashca shinallatacmi taripashpa llaquichisha. Chaitaca Mandac Dios ñucami nini” ninmi ningui» nirca.

Ezequielpac huarmi huañushcamanta

¹⁵ Mandac Dios ñucata rimashpaca:

¹⁶ «Huañunalla runa, cambac cuyashca huarmitami cungailla quichugrini. Paimantaca ama llaquiringuichu, ama duelo churanata churaringuichu, ama huacanguichu.

¹⁷ Shungullapi llaquiringui. Ama duelo churanata churaringuichu. Ashtahuanpish umapica turbanteta, chaquipica ushutata churaringui. Ñahuitapish ama taparinguichu, veloriopi micunatapish ama micunguichu» nirca.

¹⁸ Tutamantami gentecunamanca huillarcani. Chishica ñami ñuca huarmica huañurca. Cayandi tutamantaca Dios mandashca shinami ruhuarcani.

¹⁹ Chaimantami gentecunaca: —Can chashna ruhuashpaca, ¿imatatac ningui? Chaita ñucanchicman huillai— nirca.

²⁰ Shina nicpimi ñucaca: —Mandac Dios ñucata rimashpaca:

²¹ “Mandac Diosca israelcunataca: Riquichic, cancunapac sumaimana ricucunalla, fuerzata japina, shungupi cushicuna ñuca huasitaca yangapimi churasha. Shinallatac saquirishca cancunapac churicunatapish, ushicunatapish espadahuanmi huañuchinga.

²² Cutin cancunaca ñuca ima shinami ruhuarcani chashnallatac ruhuanguichic. Cancunapac ñahuitapish ama taparinguichicchu, veloriopi micunatapish ama micunguichicchu.

²³ Umapica turbanteta, chaquipica ushutata churaringuichic. Duelo churanatapish ama churaringuichu. Ashtahuanpish cancuna mana allita ruhuashcamantami tucui huañunguichic. Cancuna mana alli cashcamanta caishuc chaishuc llaquinacunguichic.

²⁴ Ezequiel imata ruhuashcata yuyaringuichic. Pai ruhuashca shinami tucui cancunapish ruhuana canguichic. Shina ruhuashpami ñucataca Mandac Dios cashcata yachanguichic” ninmi ningui.

²⁵ Mandac Diosca: «Huañunalla runa, cunanca ñucahuan tapana huasita, paicunapac sumac churicunatapish, ushicunatapish tucuchishami.

²⁶ Chashna llaquichi punzhapi huañuimanta saquirishca shuc runami ima tucushcata canman huillac shamunga.

²⁷ Chai punzhami huañuimanta saquirishca runahuan rimangapac cambac shimica pascaringa. Chaimantaca ña mana ashtahuan upallachu canguichu. Canmi paicunapacca shuc yuyarina cangui. Chaimantami ñucataca Mandac Dios cashcata yachangacuna» nirca.