EZEQUIEL 23 - Dios Rimashcata Quillcashcami

Ñañandi Samariamantapish, Jerusalenmantapish

¹ Mandac Dios ñucata rimashpaca:

² «Huañunalla runa, shuclla mamapac ishcai huarmi huahuacunami tiyarca.

³ Paicunaca huambramanta pachami Egipto llactapi huainayarca. Chaipimi pi mana japirishca chuchutapish japirichun saquirca.

⁴ Punta ñañaca Ohola, quipa ñañaca Oholibami carca. Paicunaca ñuca huarmicunami carca. Chaimantami churicunatapish, ushicunatapish ñucaman curcacuna. Oholaca Samariatami ricuchin, Oholibaca Jerusalentami ricuchin.

⁵ Oholaca ñucapac cashpapish ñucata shitashpami asiriocunata yallita cuyai callarirca.

⁶ Paicunaca sumac puca churanata churarishca mandaccuna, soldadocunata mandaccuna, caballopi ric alaja mosocunami carca.

⁷ Paicunahuanmi huainayashpa, mana allita ruhuarca. Paicunaca Asiria llactamanta ashtahuan acllashca runacunami carca. Shinallatac paicunapac ruhuashcalla dioscunata adorashpami mapayarca.

⁸ Egiptopi huainayanata callarishcataca manatac saquircachu. Paihuanca huambramanta pachami huainayarca. Paipac chuchuta japirishpami yallita munarirca.

⁹ Chaimantami Oholataca pai yallita munashca asiriocunapac maquipi churarcani.

¹⁰ Paicunami pingaichishpa, paipac cari huahuacunatapish, huarmi huahuacunatapish quichushpa, paitaca espadahuan huañuchirca. Paica sumac huarmimi carca. Shina cashpapish burlashpa asina huarmimi tucurca.

¹¹ Paipac ñaña Oholiba chaita ricushpaca, ashtahuanmi paipac ñañata atishpa, mana allita ruhuashpa juchallirca.

¹² Asiriocunatami yallita munarca. Chashnami chai mandaccunatapish, soldadocunata mandaccunatapish munarca. Paicunaca alli churanata churarishca, macanacunata yachac, caballopi ric alaja mosocunami carca.

¹³ Paicunahuan chashna mapayashpa, ishcai ñañandita mana allita ruhuashpa caticuctami ricurcani.

¹⁴ Ashtahuanpish Oholibaca pirca quingraipi dibujashca runacunata, chaipi puca colorhuan pintashca caldeocunata ricushpami, ashtahuan huainayarca.

¹⁵ Chai runacunaca chumbillishca, umacunapipish tauca color turbanteta churashcami carca. Tucui paicunami Caldeapi huacharishca shina, Babilonia llacta runacuna shina, soldadocunata mandaccuna shina carcacuna.

¹⁶ Babilonia llacta runacunata yallita munashpami, Caldea llactaman huillaccunata cacharca.

¹⁷ Chashnami Babilonia llacta gentecuna shamushpa, paihuan huainayashpa cushicurca. Chai gentecunahuanmi millanayachingacaman huainayashpa mapayarca.

¹⁸ Chashnami paica lluchulla tucushpa, tucuipac ricuipi huainayarca. Chaimantami ñuca shungupica paitapish, paipac ñañatapish millanayachircani.

¹⁹ Huambrarac cashpa, Egipto llactapi huainayashcata mana cungarishpami, yallita huainayashpa catirca.

²⁰ Chai solteraca yallita huainayana munaita charic Egipto runacunatami munarca. Paicunaca burrocuna shina, caballocuna shina huarmita munac runacunami carca.

²¹ Huambramanta pachami pi mana tuparishca chuchucunata Egipto llacta gentecuna japirichun saquirca.

²² Chaimantami Mandac Dios ñucaca Oholibataca: “Riqui, can millanayachingacaman huainayashca gentecunallatatacmi tucui ladomanta canta llaquichichun cachasha.

²³ Babilonia llacta gentecunata, caldeocunata, Pecod, Soa, Coa llacta gentecunata, Asiria llacta gentecunatami cachasha. Paicunaca alaja mosocuna, mandaccuna, soldadocunata mandaccunami. Shinallatac alli sinchi, caballocunapi alli montac, alaja mosocunami can.

²⁴ Canta llaquichingapacca, jahua ladomantami macanacuna carretacunata, micunata apac carretacunata apashpa, muyunacushpa shamunga. Chashnami jatun escudocunahuan, uchilla escudocunahuan, umapipish fierro churanata churarishca cambac ladopi shayaringa. Paicunaca ñuca llaquichichun cachacpimi, paicunapac mandashcacunapi nishca shina cantaca taripashpa llaquichinga.

²⁵ Ñuca yallita piñarishpami, cantaca yallita llaquichisha. Chashnami gentecunaca yallita piñarishpa cantaca llaquichinga. Cambac singatapish, ringritapish pitingami. Cutin cambac huahua huahuacunataca espadahuanmi huañuchinga. Cambac cari huahuacunatapish, huarmi huahuacunatapish apangami. Maijan saquirishcacunataca ninami tucuchinga.

²⁶ Cambac churanacunatapish quichushpami, lluchullata saquinga. Cambac sumac churanacunatapish quichungami.

²⁷ Chashnami millaita ruhuaccunatapish, Egipto llactamanta huainayac huainayaccunata anchuchisha. Shina ruhuacpica, Egipto gentecunataca ña mana alzarishpa ricunguichu. Ña mana ashtahuan yuyaringuichu.

²⁸ Mandac Diosca: Cantaca can mana ricunayachishca, can millanayachingacaman huainayashca gentecunapac maquipimi churani.

²⁹ Paicunami cantaca yallita mana ricunayachishpa llaquichinga. Tucui can charishcacunata quichushpami lluchullata saquinga. Chashna ruhuacpimi, can huainayashpa mapayashcapish, mana allita ruhuana munaihuan purishcapish, cullquimanta huainayashcapish ricuringa.

³⁰ Shuctac llactapi causaccunahuan huainayashcamanta, paicunapac ruhuashcalla dioscunata adorashpa mapayashcamantami cai llaquicunaca japinga.

³¹ Cambac ñaña shinallatacmi mana allita ruhuashpa causarcangui. Chaimantami cambac ñañaman cushca ubiana shina llaquillatatac canmanca cusha.

³² Chaimantami Mandac Diosca: Cambac ñañaman cushca ubiana shina llaquillahuantacmi llaquichisha. Chai ubiana vasoca ancho, shinallatac jatunmi can. Shuctac llactapi causaccunaca burlashpami cantaca asinga.

³³ Canca, cambac ñaña Samariata llaquichishca shina llaquichicpimi, machashca shinapish, nanaihuanpish cangui.

³⁴ Chai vasopi tiyac llaquicunataca tucuimi ubiangui. Chashna ubiashpami, cambac chuchucunatapish aspiringuimi. Chaitaca Mandac Dios ñucami nini.

³⁵ Chaimantami Mandac Dios ñucaca: Canca ñucata cungarishpa huashata ricuchircanguimi. Chashna mana alli yuyaihuan purishpa, huainayashcamantami llaquishca cana cangui” nini» nirca.

³⁶ Cutinllatac Mandac Dios ñucata rimashpaca: «Huañunalla runa, ¿manachu Ohola huarmitapish, Oholiba huarmitapish, paicuna mana allita ruhuashcata taripashpa ricuchigringui? Millanayai mana allita ruhuashcata huillaiyari.

³⁷ Paicunaca huainayaccunami, huañuchiccunami ruhuashcalla dioscunata adoraccunami. Shinallatac ñucahuan charishca churicunatapish chai dioscunaman cushpami rupachirca.

³⁸ Ashtahuan millaicunatami ruhuarcacuna. Ñucapaclla huasitapish mapayachircami, samana punzhatapish yangatami ruhuarca.

³⁹ Paicunapac huahuacunata paicunapac dioscunaman cushpa, rupachishca punzhallatacmi, ñucapaclla huasita mapayachingapac yaicurca. ¡Chaitami ñuca huasi ucupica ruhuarcacuna!

⁴⁰ Chaipac jahuapica caru llacta gentecunata pushamuchunmi huillaccunata cacharca. Shina shamucpica, paicunaman alaja ricuringapacmi armarishpa, ñahuitapish pintarirca. Shinallatac tucuilaya sumaccunatapish churarircami.

⁴¹ Allichishca miza ladopi cac sumac tiyarinapimi tiyarirca. Chai miza jahuallapitacmi ñuca inciensotapish, aceitetapish churarca.

⁴² Paihuan tandanacushca gentecunami caparishca uyarirca. Paicunaca shitashca pambamanta shamushca sabeocuna, yanga gentecunami carca. Chai gentecunami cai huarmicunapac maquipica brazaletecunata, umapica sumac coronacunata churachirca.

⁴³ Chaimanta yallita huainayashpa mapayashca huarmimanta yuyarishpaca: “¿Yalli huainayashpa mapayashca huarmihuanchu huainayashpa catincuna?

⁴⁴ Cullquimanta huainayac huarmipacman shamuc shinami, chai mana pingac Ohola, Oholiba huarmicunapacmanca shamurcacuna” nircani.

⁴⁵ Cashcata ruhuac gentecunami huarmicunatapish, huañuchic huarmicunatapish mandashcapi nishca shina taripashpa llaquichinga. Paicunaca huainayaccuna, shinallatac huañuchic huarmicunami.

⁴⁶ Chaimantami Mandac Diosca: “Ñucami chai huarmicunata llaquichichun achca soldadocunata huichai cachasha. Paicunami manchachishpa, tucui shuhuanga.

⁴⁷ Chai gentecunami rumicunahuan shitashpa, espadahuan chugrichishpa huañuchinga. Paicunapac cari huahuacunatapish, huarmi huahuacunatapish huañuchishpami, huasicunatapish rupachinga.

⁴⁸ Chashnami chai llactamantaca millaita ruhuaccunata anchuchisha. Chaita ricushpami, tucui huarmicunaca paicuna ruhuashca shina, yalli millaita mana ruhuangacuna.

⁴⁹ Paicunallatac yalli mana allita ruhuashcamanta, ruhuashcalla dioscunata adorashpa mapayashcamantami chashna llaquita apangacuna. Chashna llaquita apashpami, ñucataca Mandac Dios cashcata yachangacuna” ninmi» nirca.