EZEQUIEL 22 - Dios Rimashcata Quillcashcami

Jerusalenpi causaccunapac juchamanta

¹ Mandac Dios ñucata rimashpaca:

² «Huañunalla runa, chai pueblopi causac huañuchic runacunataca, ¿manachu juchanchigringui? Paicuna millaita ruhuashcataca, ¿manachu ricuchigringui?

³ Paicunataca: “Mandac Diosca: Callecunapi huañuchic pueblolla, ruhuashcalla dioscunata ruhuashpami mapayashcangui. Cunanca canta llaquichina punzhami chayamushca.

⁴ Huañuchishcamanta, ruhuashcalla dioscunata adorashpa mapayashcamantami juchanchishca cangui. Chashnami can tucurina punzhacunata quichquiyachishpa, tucurina huatacunapi cangui. Chaimantami cantaca mana alli nishpa rimachun, burlashpa asichun shuctac llactapi causaccunaman curcani.

⁵ ¡Ruhuashcalla dioscunata adorashpa mapayashca, tucuipac mana alli nishca pueblolla, cuchupi causaccunapish, carupi causaccunapish asingacunami!

⁶ Riquichic, Israel llacta mandaccunaca ‘mandacmi cani’ nishpami huañuchishpa, yahuarta jichancuna.

⁷ Taita mamatapish mana cazunchu. Caru llacta runatapish, taita mama illac huahuacunatapish, viudacunatapish llaquichishpami causan.

⁸ Ñucapaclla chicanyachishca pushtucunatapish, samana punzhatapish yangatami ruhuancuna.

⁹ Maijancunaca yanga juchanchishpami huañuchincuna. Lomacunapi tiyac altar ladopi micushpami, millaita ruhuancuna.

¹⁰ Quiquin taitapac huarmihuanmi sueñun, quilla ungüihuan cac huarmitapish japirinmi.

¹¹ Maijancunaca shucpac huarmihuanmi huainayan. Quiquin nuerahuan, quiquin panillahuan sueñushpami pingana juchata ruhuan.

¹² Maijanca huañuchingapacmi cullquita japin. Cullquita mañachishpapish yalli interestami japin. Shuccunata llaquichinguimi. Ñucataca cungarircami. Chaitaca Mandac Dios ñucami nini.

¹³ Riquichic, cancuna shuhuashpa chayucyashcamanta, huañuchishpa yahuarta jichashcamantaca yallita piñarishcami cani.

¹⁴ Ñuca llaquichi punzhapica, ¿cambac shungupish, maquipish fuerzata charinguichu? Mandac Dios ñucami nini. Chaitaca pactachishatacmi.

¹⁵ Shuctac llactacunaman, shuctac llactacunaman shic-huashpa cachashpami, cambac mapata anchuchisha.

¹⁶ Shuctac llactacunapac mana alli nishcami cangui. Shina cashpami, ñucataca Mandac Dios cashcata yachangui” ninmi ningui» nirca.

¹⁷ Mandac Dios ñucata rimashpaca:

¹⁸ «Huañunalla runa, israelcunaca ñucamanca hornopi bronceta, estañota, fierrota, plomota shitacpi, chicanyashca mapa shinami.

¹⁹ Chaimantami Mandac Dios ñucaca: “Tucui cancunami cullquimanta chicanyachishca mapa shina tucurcanguichic. Cancunataca Jerusalén chaupipimi tandachisha.

²⁰ Ima shinami cullquita, bronceta, fierrota, plomota, estañota tandachishpa, hornopi churashpa, yacuyachic shinami ruhuasha. Chashnami ñucaca yallita piñarishpa, chai pueblollapitac tandachishpa tucuchisha.

²¹ Chashnami tandachishpa, ñuca yallita piñarishpa ninata cancunapac jahuapi japichisha. Tucuimi chai nina ucupi yacuyanguichic.

²² Cullquita hornopi yacuyachic shinami cancunataca ninapi yacuyachisha. Shina ruhuacpimi, Mandac Dios ñuca piñarishpa, cancunata llaquichishcata yachanguichic nini” ninmi ningui» nirca.

²³ Mandac Dios ñucata rimashpaca:

²⁴ «Huañunalla runa, Israel llactataca: “Canca yallita piñarishpa llaquichi punzhapica mana tamyashca, mana chuyayachishca llactami tucungui.

²⁵ Cancunapurapica león huacashpa, animalta japic shina, gentecunata huañuchishpa, ima charishcacunatapish, ima alajacunatapish quichuc mandaccunami tiyan. Chashna achcata huañuchicpimi, achca viudacunata saquirca.

²⁶ Curacunapish, ñuca mandashcacunata mana cazushpami, ñucapaclla chicanyachishca pushtucunata mapayachin. Imami ñucapaclla cashcatapish, imami mapa cashcatapish mana yachancunachu. Imami chuya, imami mapa cashcatapish mana yachancunachu. Samana punzhatapish mana yuyarincunachu. Chashnami ñucata yangapi churancuna.

²⁷ Mandaccunapish animalcunata japic atuc shinami, millaita ruhuashpa cullquita japingaraicu gentecunata huañuchishpa, yahuarta jichancuna.

²⁸ Huillaccunapish, pircata yurac-huan pintashca shinami, imatapish llullashpa huillashpaca: ‘Mandac Diosca chashnami nin’ nincuna. Ashtahuanpish Mandac Dios ñucaca imata mana nircanichu.

²⁹ Cai pueblopi causaccunaca llaquichina, shuhuana, llullana yuyaillahuanmi causancuna. Llaquilla causaccunatapish, huacchacunatapish, shuctac llacta runacunatapish yallitami llaquichin.

³⁰ Chai llactata mana llaquichisha nishpami, ñucaca maijan cai llactamanta ñucahuan rimachun, shuc runata mashcarcani. Shina mashcashpapish mana tarircanichu.

³¹ Chaimantami ñucaca nina japiric shina yallita piñarishpa, paicunataca tucuchisha. Chashnami paicuna mana allita ruhuashca shinallatac llaquichisha. Chaitaca Mandac Dios ñucami nini” ninmi ningui» nirca.